တောင်ကုတ်မြို့နယ် စည်ပင်ဥက္ကဋ္ဌကို ရဲကခေါ်စစ်

တောင်ကုတ်မြို့နယ် စည်ပင်သာယာ ရေးကော်မတီ ဥက္ကဋ္ဌ ဦးဇေယျကျော်

ဓာတ်ပုံ ရင်းမြစ်, U Zay Ya Kyaw FB

ဓာတ်ပုံ ပုံစာ,

တောင်ကုတ်မြို့နယ် စည်ပင်သာယာ ရေးကော်မတီ ဥက္ကဋ္ဌ ဦးဇေယျကျော်

ရခိုင်ပြည်နယ်၊ တောင်ကုတ်မြို့နယ် စည်ပင်သာယာ ရေးကော်မတီ ဥက္ကဋ္ဌ ဦးဇေယျကျော်ကိုမေလ ၉ ရက်နေ့က ရဲတပ်ဖွဲ့က စစ်ဆေးဖို့ဆိုပြီး ခေါ်ယူသွားကြောင်း ဦးဇေယျကျော်ရဲ့ ညီ ဖြစ်သူကဘီဘီစီကို ပြောပါတယ်။

ဦးဇေယျကျော်ကို မိသားစုဝင်တွေ က အခုထိအဆက်အသွယ် မရရှိသေးဘဲ တောင်ကုတ်မြို့မရဲစခန်းမှာ စစ်ဆေးမှုတွေပြုလုပ်နေတယ်လို့သိရကြောင်းဦးဇေယျကျော်ရဲ့ ညီဖြစ်သူကပြောပါတယ်။

မေလ ၉ ရက်နေ့ နေ့လယ် ၃ နာရီကျော်လောက်မှာ ရပ်ကွက်အုပ်ချုပ်ရေးမှူး၊ မြို့နယ်ရဲတပ်ဖွဲ့မှူးနဲ့ သတင်းရဲတပ်ဖွဲ့၊ တပ်မတော်စစ်ဖက်ရေးရာလုံခြုံရေးအဖွဲ့ (စရဖ) အဖွဲ့ တွေဟာ ကံပိုင်ရပ်ကွက်မှာရှိတဲ့ ဦးဇေယျကျော် ရဲ့နေအိမ်ကိုရောက်ရှိလာခဲ့ပြီး ခေါ်ဆောင်သွားခဲ့တာဖြစ်တယ်လို့ တောင်ကုတ်မြို့ခံ ဦးစိုးသီဟက ပြောပါတယ်။

ဦးဇေယျကျော်ကိုလာရောက်ခေါ်ဆောင်တဲ့အချိန်မှာ မေးမြန်းစရာတွေရှိနေတယ်လို့ပြောပြီး ခေါ်သွားတာလို့ ဦးစိုးသီဟက ပြောပါတယ်။

ဓာတ်ပုံ ရင်းမြစ်, U Zay Ya Kyaw

ဓာတ်ပုံ ပုံစာ,

တောင်ကုတ်မြို့နယ် ကိုဗစ် ၁၉ ကာကွယ်ရေးလုပ်ငန်းတွေမှာလည်း ဒေသအာဏာပိုင်တွေနဲ့ ပူးပေါင်းဆောင်ရွက်နေသူ ဖြစ်တယ်လို့ဒေသခံတွေကပြော

" ရပ်ကွက်အုပ်ချုပ်ရေးမှူးပါတယ်။ စရဖပါတယ်။ သတင်းတပ်ဖွဲ့က ပါတယ်။ မြို့မစခန်းမှူးကိုယ်တိုင်ပါတယ်။ မနေ့ကညနေပိုင်း စခန်းကိုသွားစုံစမ်းတဲ့အခါမှာ စခန်းမှူးက စရဖနဲ့ သတင်းတပ်ဖွဲ့ က စုံစမ်း စစ်ဆေး မေးမြန်းစရာရှိလို့ ရဲတပ်ဖွဲ့အနေနဲ့ ကူညီခေါ်ဆောင်တာဖြစ်တယ်၊တခြားဟာကိုမသိဘူးလို့ပြောတယ်" လို့ ဦးဇေယျကျော်ရဲ့ညီဖြစ်သူကပြောပါတယ်။

ဦးဇေယျကျော်ကို မိသားစုတွေနဲ့တွေ့ခွင့်မရပေမယ့် သူ့အတွက် အစားအသောက်တွေကိုတော့ သွားရောက်ပို့ဆောင်ပေးခဲ့ရပြီး ကျန်းမာရေးအခြေနေ ကောင်းမွန်နေတယ်လို့ စုံစမ်းသိရှိခဲ့ရတယ်လို့ပြောပါတယ်။

တာဝန်ရှိသူတွေအနေနဲ့ ဘာကြောင့်ခေါ်သွားရတယ်၊ ဘယ်အကြောင်းရာကိုစုံစမ်းစစ်ဆေး မေးမြန်းရတယ်ဆိုတာကို မေးမြန်းရာမှာတော့ အချိန်တန်ရင် သိရမယ်လို့ ပြောဆိုတယ်လို့ဆိုပါတယ်။

လက်ရှိမှာ ဦးဇေယျကျော်ဟာ စည်ပင်သာယာ ရေးကော်မတီ ဥက္ကဋ္ဌ တစ်ယောက်အနေနဲ့ စည်ပင်လုပ်ငန်းစဉ်တွေကို ဆောင်ရွက်နေသလို တောင်ကုတ်မြို့နယ် ကိုဗစ် ၁၉ ကာကွယ်ရေးလုပ်ငန်းတွေမှာလည်း ဒေသအာဏာပိုင်တွေနဲ့ ပူးပေါင်းဆောင်ရွက်နေသူဖြစ်တယ်လို့ လည်း တောင်ကုတ်မြို့ခံတွေဆီကနေသိရပါတယ်။

ဓာတ်ပုံ ရင်းမြစ်, U Zay Ya Kyaw

ဓာတ်ပုံ ပုံစာ,

အရပ်ဘက်အဖွဲ့အစည်းတွေနဲ့ပူးပေါင်းပြီး လူမှုရေးလုပ်ငန်းတွေမှာ ပါဝင်သူလို့ ဒေသခံတွကပြော

သူ့ကိုခေါ်ဆောင် စစ်ဆေးနေတာနဲ့ပတ်သက်လို့တာဝန်ရှိသူတွေအနေနဲ့ ပွင့်ပွင့်လင်းလင်း ပြောဆိုတာမရှိဘဲ ၂၄ နာရီကျော်သွားပြီး အခုချိန် အထိပြန်လွှတ်ပေးတာ မရှိသေးလို့ စိတ်ပူနေတယ်လို့လည်း မိသားစုဝင်တွေကပြောပါတယ်။

ဦးဇေယျကျော်ဟာ ယခင်က အရပ်ဘက်အဖွဲ့အစည်းတွေနဲ့ပူးပေါင်းပြီး လူမှုရေးလုပ်ငန်းတွေမှာ ပါဝင်ခဲ့ဖူးကာ လက်ရှိမှာတော့ တောင်ကုတ်စည်ပင်ကော်မတီဥက္ကဋ္ဌ အဖြစ် တာဝန်ထမ်းဆောင်နေသူဖြစ်တယ်လို့ တောင်ကုတ် မြို့ခံ ဦးစိုးသီဟက ပြောပါတယ်။

" ကျွန်တော်တို့ခေါ်သွားတာမဟုတ်ဘူး။ သတင်းတပ်ဖွဲ့ကခေါ်သွားတာပါ။ စစ်ဆေးတာမဟုတ်ဘူး။ မေးမြန်းနေတာပါ။ လောလောဆယ်တော့ ပြောနေကြတုန်းပါပဲ"လို့ တောင်ကုတ်မြို့မရဲစခန်းမှူးက ဘီဘီစီကိုပြောပါတယ်။

ပြီးခဲ့တဲ့ မေလ ၅ ရက်နေ့ကလည်း ရခိုင်ပြည်နယ်၊ တောင်ကုတ်မြို့နယ်၊ ဘူးရွှေမော်ကျေးရွာက ကိုဗစ်-၁၉ ရောဂါ ကာကွယ်စောင့်ရှောက်ရေးကော်မတီမှာ ဥက္ကဋ္ဌဖြစ်သူ ရွာသား ဦးသန်းရွှေကို မေလ ၅ ရက်နေ့ မနက်အစောပိုင်းမှာ အေအေ အဖွဲ့ က လာရောက်ဖမ်းဆီးသွားတယ်လို့ တပ်မတော်ကာကွယ်ရေးဦးစီးချုပ်ရုံးကလည်း သတင်းထုတ်ပြန်ခဲ့ပါတယ်။