ကိုယ်ဝန်ဆောင်၊ နို့တိုက်မိခင်နဲ့ ၈၅နှစ်အထက်ဘိုးဘွားတွေကို ကျပ်သုံးသောင်းနှုန်းစီ ထောက်ပံ့မယ်

တစ်ဦးကိုကျပ်သုံးသောင်းနှုန်းနဲ့ ထောက်ပံ့ပေးသွားဖို့ စီစဉ်နေ

ဓာတ်ပုံ ရင်းမြစ်, Reuters

ဓာတ်ပုံ ပုံစာ,

တစ်ဦးကိုကျပ်သုံးသောင်းနှုန်းနဲ့ ထောက်ပံ့ပေးသွားဖို့ စီစဉ်နေ

ကိုယ်ဝန်ဆောင်မိခင်တွေ၊ နို့တိုက်မိခင်တွေနဲ့ အသက် ၈၅ နှစ်အထက် အဘိုးအဘွားတွေကို တစ်ဦးကိုကျပ်သုံးသောင်းနှုန်းနဲ့ ထောက်ပံ့ပေးသွားဖို့ လူမှုဝန်ထမ်းဦးစီးဌာနက စီစဉ်နေပါတယ်။

ဒီအစီအစဉ်ကို ကိုဗစ်ကာလအတွက်ရည်ရွယ်ကာ အသက်မွေးဝမ်းကျောင်းမှုနဲ့ စားနပ်ရိက္ခာဖူလုံရေး ရန်ပုံငွေ(LIFT) အဖွဲ့နဲ့ မိတ်ဘက်အလှူရှင်နိုင်ငံတွေဖြစ်တဲ့ ဥရောပသမဂ္ဂ၊အမေရိကန်၊ ဆွစ်ဇာလန်၊ သြစတြေးလျ စတဲ့နိုင်ငံတွေရဲ့လှူဒါန်းမှုနဲ့ အမေရိကန်ဒေါ်လာ ၉ သန်းဖိုးထောက်ပံ့သွားမှာဖြစ်တယ်လို့ သိရပါတယ်။

' ' ၆လပိုင်းကစပြီး ထောက်ပံ့သွားမယ်။ အကျိုးခံစားခွင့်ရှိသူတစ်ယောက်ကို သုံးသောင်း တစ်ကြိမ်ထဲထောက်ပံ့မှာ။ ရပ်ကွက်ကျေးရွာအုပ်ချုပ်ရေးမှူးတွေကတဆင့် ထောက်ပံ့သွားမှာပါ။ ကိုယ်ဝန်ဆောင်မိခင်တွေ၊ သူတို့ကမွေးလာတဲ့အသက်၂နှစ်အောက်ကလေးငယ်တွေပါမယ်။ တစ်နိုင်ငံလုံးက အသက်၈၅နှစ်အထက် အကျိုးခံစားခွင့်ထောက်ပံ့ပေးနေတဲ့သူတွေရှိတယ်။ နဂိုခံစားခွင့်ရှိသူအားလုံးက ဒီထပ်ဆောင်းအစီအစဉ်ထဲမှာပါမှာပါ။''လို့ လူမှုဝန်ထမ်းဦးစီးဌာနက ညွှန်ကြားရေးမှူး ဦးကျော်လင်းထက်က ဘီဘီစီကိုပြောပါတယ်။

ဒီထောက်ပံ့မှုမှာ အသက် ၈၅နှစ်အထက် သက်ကြီးဘိုးဘွားတွေအနေနဲ့ တစ်နိုင်ငံလုံးအတိုင်းအတာနဲ့ ထောက်ပံ့ပေးသွားမှာဖြစ်ပေမယ့် ကိုယ်ဝန်ဆောင်မိခင်နဲ့ နို့တိုက်မိခင်တွေအတွက် ကိုတော့ လက်ရှိလူမှုဝန်ထမ်းကထောက်ပံ့နေတဲ့ ကရင်ပြည်နယ်၊ ကယားပြည်နယ်၊ ချင်းပြည်နယ်၊ ရခိုင်ပြည်နယ်နဲ့ နာဂဒေသတွေပဲ ပါဝင်မှာဖြစ်တယ်လို့သိရပါတယ်။

အဆိုပါ ပြည်နယ် ၄ခုနဲ့ ကိုယ်ပိုင်အုပ်ချုပ်ခွင့်ရဒေသတို့ဟာ မြန်မာနိုင်ငံမှာ ကလေးသူငယ်ပုညှက်မှုနှုန်း များပြားတဲ့ဒေသတွေအဖြစ်ရွေးချယ်ထောက်ပံ့မှုပေးနေတဲ့ဒေသတွေလည်းဖြစ်ပါ တယ်။

အမေရိကန်ဒေါ်လာ ၉ သန်းဖိုး ထောက်ပံ့သွားမယ့်အစီအစဉ်အတွက် မြန်မာနိုင်ငံက ကိုယ်ဝန်ဆောင်နဲ့ နို့တိုက်မိခင် ၂သိန်းလေးသောင်းကျော်နဲ့ သက်ကြီးဘိုးဘွားခံစားခွင့်ရှိသူဦးရေက ၂ သိန်း ကျော်ရှိပြီး စာရင်းအတိအကျကိုတော့ ထပ်မံပြုစုနေတယ်လို့ ဦးကျော်လင်းထက်ကပြောပြပါတယ်။

၂၀၁၇-၁၈ ဘဏ္ဍာနှစ်ကစလို့ ကိုယ်ဝန်ဆောင် မိခင်လောင်းတွေကို လူမှုဝန်ထမ်း ကယ်ဆယ်ရေးနဲ့ ပြန်လည်နေရာချထားရေးဝန်ကြီးဌာနရဲ့ လူမှုကာကွယ်စောင့်ရှောက်ရေး အစီအစဉ်ကနေ တစ်လကိုကျပ်တစ်သောင်းခွဲနှုန်းနဲ့ ထောက်ပံ့ပေးနေတာဖြစ်ပါတယ်။

ဒီထောက်ပံ့မှုဟာ မွေးဖွားလာတဲ့ကလေးငယ်တွေ ဖွံ့ဖြိုး တိုးတက်မှု၊ ကြီးထွားမှုကို ရည်ရွယ်ပြီး အာဟာရဖြည့်စွက်တဲ့အစားအသောက်တွေ ဝယ်ယူစားသောက်နိုင်အောင် ရည်ရွယ်တာ ဖြစ်တယ်လို့ သိရပါတယ်။