တော်ဝင် မင်္ဂလာပွဲကို မြန်မာတွေလည်း စိတ်ဝင်စား

Royal Wedding
Image caption ဝီလျံမင်းသားနဲ့ ကက်သရင်း မစ်ဒယ်တန်တို့ အခုတော့ ဇနီးမောင်နှံဖြစ်သွားကြပါပြီ

ဗြိတိန်နိုင်ငံမှာ နှစ်ပေါင်း ၃၀ အတွင်း အကြီးကျယ် အခမ်းနားဆုံး ဖြစ်တဲ့ မင်းသား ဝီလျံနဲ့ သူ့ချစ်သူ ကက်သရင်း တို့ရဲ့ တော်ဝင် လက်ထပ်မင်္ဂလာပွဲ ကို မြန်မာနိုင်ငံမှာလည်း စိတ်ဝင်စားကြ သူတွေက ရုပ်မြင်သံကြားကနေ တိုက်ရိုက် ထုတ်လွှင့်ချက်ကို စောင့်ကြည့်ခဲ့ကြပါတယ်။

မင်္ဂလာမောင်နှံနဲ့အတူ ပျော်ရွှင် စိတ်လှုပ်ရှားရပါတယ်လို့ နိုင်ငံကျော် အဆိုတော် တဦးဖြစ်တဲ့ ဟေမာနေဝင်းက ဆိုပါတယ်။

မင်္ဂလာပွဲမတိုင်ခင် နောက်ဆုံးအချိန်အထိ လျှို့ဝှက်ထားခဲ့တဲ့ သတို့သမီးရဲ့ ဝတ်စုံဟာလည်း ရိုးရိုးနဲ့ ကြက်သရေ ရှိတယ်လို့ မဟေမာက မှတ်ချက်ပြုပါတယ်။

မြန်မာပြည်တွင်းက သတင်းမီဒီယာတွေကတော့ ဒီသတင်းကို ဖော်ပြဖို့ ရှိပေမယ့် မျက်နှာဖုံးသတင်းလိုမျိုး ဖော်ပြဖို့တော့ ရည်ရွယ်မထားဘူး လို့ ဂျာနယ်အယ်ဒီတာ တွေကဆိုပါတယ်။

သာမန် ပြည်သူတွေထဲမှာလည်း တဝမ်းတခါးအတွက် ရုန်းကန်နေကြရသူ အများအပြားက ဒီသတင်းကို သိပ် စိတ်မဝင်စားနိုင်ကြဘူးလို့ ဒီမင်္ဂလာဆောင် အပေါ် အများပြည်သူရဲ့ စိတ်ဝင်စားမှုအကြောင်းသတင်း စုဆောင်းနေသူတဦးက ပြောပါတယ်။

ဗြိတိန်ရောက် မြန်မာတွေထဲမှာတော့ မနက်အစောကြီး ကတည်းက လူအုပ်ထဲမှာ တိုးဝှေ့ရင်း မင်္ဂလာစုံတွဲ အပါအဝင် တော်ဝင်မိသားစုကို အပြင်မှာ မြင်ရဖို့အတွက် သွားရောက် စောင့်ဆိုင်းနေကြ သူတွေရှိပါတယ်။

ဝက်စ်မင်စတာဘုရားကျောင်းကနေ မင်္ဂလာစုံတွဲ ရဲ့အိမ်အပြန်လမ်းမှာ စောင့်နေတဲ့ မြန်မာတဦးကဆိုရင် မြန်မာ ဆန်ဆန် ခေါင်းပေါင်းပေါင်းပြီး ဓါတ်ပုံတွေ လိုက်ရိုက်နေ တာကိုတောင် တွေ့ခဲ့ရပါတယ်။

ကက်သရင်း မစ်ဒယ်တန်ကို တော်ဝင် မင်းသမီးအဖြစ် ခင်ပွန်းဖြစ်သူ ဝီလျံမင်းသားနဲ့အတူ မြင်းရထားနဲ့ နန်းတော်ကို အပြန်မှာ မြင်လိုက်ရတဲ့ မြန်မာ အမျိုးသမီး မကြူကြူကလည်း သူ့ရဲ့ဝမ်းသာ ကျေနပ်မှုကို ပြောပြခဲ့ပါတယ်။

သူ့အနေနဲ့ ဗြိတိသျှဘုရင်မကြီးနဲ့ ကက်သရင်းကို လူကိုယ်တိုင် ခုလိုမြင်ရတာ ပထမဆုံး အကြိမ်ဖြစ်တယ်လို့ မကြူကြူက ဆိုခဲ့ပါတယ်။