မြန်မာအစိုးရစစ်တပ်မှ တပ်ရင်းမှူးတဦးတိုက်ပွဲကျ

ရှမ်းပြည်ရောက်မြန်မာအစိုးရတပ်များ ဓာတ်ပုံ မူပိုင် Reuters
Image caption ရှမ်းပြည်ရောက်မြန်မာအစိုးရတပ်များ

ဗိုလ်မှုးကြီး ရွက်ဆစ် ဦးဆောင်တဲ့ ရှမ်းပြည် တပ်မတော် တောင်ပိုင်းရဲ့ တပ်ဖွဲ့က ရှမ်းပြည် တောင်ပိုင်း မိုင်းကိုင်မြို့နယ်ဘက် ကို မေလ ၉ ရက်နေ့ က တက် လာတဲ့ မြန်မာ အစိုးရ စစ်တပ် ကို ချုံခို တိုက်ခိုက် ခဲ့လို့ မြန်မာအစိုးရ စစ်တပ်ဘက် က တပ်ရင်းမှူး အပါအ၀င် တခြား အရာရှိ ငယ် ၁၀ယောက် ထက်မနည်း သေဆုံး သွား ပါတယ်။

ရှမ်းပြည်တောင်ပိုင်း ဖယ်ခုံ အခြေစိုက် စစ်ဆင်ရေး ကွပ်ကဲမှု ဌာနာချုပ် (စကခ) ၇ လက် အောက်ခံ ခြေမြန် တပ်ရင်း(ခမရ) ၄၂၂ က တပ်ရင်းမှူး ဦးဆောင်တဲ့ စစ် ကြောင်း တစ်ကြောင်း က တောင်ကြီး-လွိုင်လင် ကနေ မိုင်းကိုင်မြို့နယ်ဘက်ကို ထော်လာဂျီ တွေ နဲ့ တက်လာခဲ့ရာမှာ ရှမ်းပြည် တပ်မတော် SSA က ချုံခို တိုက်ခိုက် ခဲ့ တဲ့ အတွက် မြန်မာ အစိုးရ စစ်တပ်ဘက် က တပ်ရင်းမှူး ဒု-ဗိုလ်မှူးကြီး သိန်းဦးအပါ၀င် အရာရှိ အရာခံတွေ နဲ့ စုစုပေါင်း ၉ ယောက် သေဆုံးသွားပြီး ၁၅ ယောက် ဒဏ်ရာ ရ သွားတယ် လို့ SSA ရဲ့လက်ထောက် ပြောခွင့်ရသူ စိုင်းဆိုင်းမိန်း က ဘီဘီစီ ကို ပြောပါတယ်။

အဲဒီ သေဆုံးသွားတဲ့သူတွေ ကတော့ တပ်ရင်းမှူး ဒုဗိုလ်မှူးကြီးသိန်းဦး၊ အရာခံဗိုလ် စိုးမင်း၊ တပ်ကြပ်ကြီး ထွန်းအောင်၊ တပ်ကြပ်ကြီး သိန်းလှိုင်၊ တပ်ကြပ် ထွန်းထွန်း လွင်၊ တပ်ကြပ် ကျော်စိုးမင်း၊ တပ်ကြပ် ထွန်းခိုင်၊ ရဲဘော်ကိုဇော် နှင့် ရဲဘော် မျိုးဇော်ဦး တို့ပဲ ဖြစ်ပါတယ်။

အခုလို မြန်မာအစိုးရ စစ်တပ်ကို စောင့်ပြီး တိုက်ခိုက်တဲ့ SSA တပ် ရဲ့အင်အား က ၈၀ လောက် ရှိတယ် လို့ ဆိုပါတယ်။

ဒီတိုက်ပွဲမှာ အပြန်အလှန် ၁ နာရီလောက် ပစ်ခတ် ကြတယ် လို့ သိရ ပါတယ်။

ဒီမိုင်းကိုင်မြို့နယ်မှာ ရှမ်းပြည်တပ်မတော် တောင်ပိုင်း နဲ့ မြန်မာအစိုးရ စစ်တပ်တို့ မကြာခဏ တိုက်ပွဲ ဖြစ်လေ့ ရှိတဲ့ ဒေသ ပဲ ဖြစ်ပါတယ်။