မြေလွတ်မြေရိုင်း ဥပဒေ

land law
Image caption မြေလွတ် မြေရိုင်း ဥပဒေသစ် လယ်သမားတွေ အတွက် အကျိုးရှိမလား

အသစ် ပြဌာန်းမယ့် မြေလွတ်မြေရိုင်း ဥပဒေအရ ပြည်တွင်းပြည်ပ က လုပ်ငန်းရှင်တွေဟာ တကြိမ်ကို ဧက ၅၀၀၀ အထိ ရှင်းလင်း စိုက်ပျိုးခွင့် ရမှာ ဖြစ်ပြီး၊ စုစုပေါင်း ဧက ငါးသောင်းအထိ လုပ်ကိုင်ခွင့် ရမှာ ဖြစ်ပါတယ်။

ခုတ်ထွင်ရှင်းလင်းထားတဲ့ မြေမှာ နှစ်အကန့် အသတ်မရှိ လုပ်ကိုင်ခွင့်ရမယ်လို့လည်း ဆိုပါတယ်။

ဒါပေမဲ့ ၃ နှစ်ကြာတဲ့ အထိ မစိုက်ပျိုးရင်တော့ မြေကို ပြန်သိမ်းမယ်လို့လည်း ဥပဒေမှာ ပြဌာန်းထားပါတယ်။

ဒီလို လုပ်ကိုင်ခွင့်ရှိသူဟာ ပြည်တွင်းပြည်ပ စီးပွားရေး လုပ်ငန်းရှင်တွေသာ ဖြစ်ပြီး၊ သာမန်ပြည်သူတွေအနေနဲ့ ဧက ၅၀ သာ ခုတ်ထွင် ရှင်းလင်း စိုက်ပျိုးခွင့်ရှိမယ်လို့ ဆိုပါတယ်။

နိုင်ငံခြား ကုမ္ပဏီတွေက မြေဧက အမြောက်အများ ပိုင်ဆိုင်ခွင့်ရပြီး မြန်မာနိုင်ငံသားတွေက အဲဒီမြေတွေမှာ အလုပ်သမား ဖြစ်ကုန်မယ့် အစီအစဉ်မျိုး ဖြစ်နေသလားလို့ ဘီဘီစီက မေးမြန်းရာမှာတော့ နိုင်ငံခြားက နည်းပညာနဲ့ ရင်းနှီးမြုပ်နှံမှုတွေကို ရချင်လို့ ဒီဥပဒေကို ပြဌာန်းတာဖြစ် တယ်လို့ ကျားဖြူပါတီရဲ့ ပြည်သူ့လွှတ်တော်ကိုယ်စားလှယ် ဦးရဲထွန်းက ပြောပါတယ်။

ဥပဒေကို ပြည်သူ့လွှတ်တော်ကရော၊ အမျိုးသားလွှတ်တော်ကရော အတည်ပြုပြီး ဖြစ်ပေမဲ့ ကွဲလွဲချက်တွေရှိနေသေးလို့ ပြည်ထောင်စု လွှတ်တော်မှာ ပြန်လည် ဆွေးနွေးဦးမယ်လို့ ဆိုပါတယ်။

လယ်သမား အရေးဆောင်ရွက်သူတွေ မကွေးတိုင်း ကမ္မမြို့နယ်မှာ ပြုလုပ်ခဲ့တဲ့ တောင်သူလယ်သမား နှီးနှောဖလှယ်ပွဲကတော့ ဒီဥပဒေကို ပြဌာန်းရာမှာ လယ်သမားတွေရဲ့ သဘောဆန္ဒကို မရယူခဲ့သလို လယ်သမားတွေရဲ့ အကျိုးစီးပွားကို ထိခိုက်စေတယ်ဆိုပြီး သမ္မတ ဦးသိန်းစိန် ဆီ ကန့်ကွက်စာပေးပို့ထားခဲ့ပါတယ်။