Global Witness ဖော်ပြချက် မဟုတ်မှန်ကြောင်း ဦးမောင်မောင်သိန်း ငြင်းဆို

Image caption သားဖြစ်သူ အမည်သာ အမှန်ဖြစ်ပြီး ကျန် အချက်များ မမှန်ကန်ဘူးလို့ ဦးမောင်မောင်သိန်းက ပြော

နိုဝင်ဘာလ ၂၇ ရက်နေ့မှာ ကြံ့ခိုင်ရေး ပါတီက အထွေထွေ အတွင်းရေးမှူးဟောင်း ဦးမောင်မောင်သိန်း ဟာ အောက်တိုဘာလ အတွင်းက Global Witness အဖွဲ့ ရဲ့ အစီရင်ခံစာထဲမှာ ပါရှိသလို မဟုတ်မှန်ကြောင်း သတင်းဌာနတွေကို တွေ့ဆုံပြီး ငြင်းဆို လိုက်ပါတယ်။

အစီရင်ခံစာထဲမှာ ဦးမောင်မောင်သိန်းဟာ မျိုးနွယ် နဲ့ မြယမုံ ကျောက်မျက် ကုမ္ပဏီ (၂) ခု ကို လိုင်စင် ထုတ်ပေးခဲ့ပြီး သားဖြစ်သူ ဦးနေအောင်ဟာ မျိုးနွယ် ကျောက်မျက် ကုမ္ပဏီမှာ ဒါရိုက်တာ အဖြစ် တာဝန်ထမ်းဆောင် နေကြောင်း ဖော်ပြ ပါရှိခဲ့ပါတယ်။

ဒါ့အပြင် ဒီကုမ္ပဏီ (၂) ခု ကနေ ကျောက်စိမ်းတွေကို တရုတ် နိုင်ငံကို ခိုးထုတ်နေပြီး အကျိုးအမြတ် တွေ ရရှိခဲ့ကြောင်းကိုလည်း Global Witness အဖွဲ့ရဲ့ အစီရင်ခံစာမှာ ဖော်ပြခဲ့ပါတယ်။

အဆိုပါ အစီရင်ခံစာထဲက ဖော်ပြပါရှိချက်တွေထဲက သားဖြစ်သူ ဦးနေအောင်ရဲ့ နာမည်သာ အမှန် ဖြစ်ပြီး ကျန် အကြောင်းအရာတွေဟာ မဟုတ်မှန်ဘူးလို့ ဦးမောင်မောင်သိန်းက ဘီဘီစီ ကို ပြောပါတယ်။

Global Witness အစီရင်ခံစာ မှာတော့ (၂၀၁၄) ခုနှစ်အတွင်း တနိုင်ငံလုံးအတိုင်းအတာအနေနဲ့ ကျောက်စိမ်း ထုတ်လုပ်မှု တန်ဖိုးက အမေရိကန်ဒေါ်လာ (၃၁)ဘီလျံ ရှိခဲ့တယ်လို့ ဖော်ပြပါရှိ ခဲ့ပါတယ်။

အငြိမ်းစား ဗိုလ်ချုပ်မှူးကြီးဟောင်း ဦးသန်းရွှေ မိသားစု အပြင် ဝန်ကြီးဟောင်း ဦးမောင်မောင်သိန်း၊ လက်ရှိ ဝန်ကြီး ဦးအုန်းမြင့် ၊ ဒုဝန်ကြီး ဦးဘုန်းဆွေ နဲ့ နောက်ထပ် ဒုဝန်ကြီး ဦးဝင်းသန်း တို့ဟာလည်း ကျောက်စိမ်းကဏ္ဍ ကနေ ဝင်ငွေ အမြောက်အမြား ရရှိခဲ့တယ်လို့ ဖော်ပြ ခဲ့ပါတယ်။

အစီရင်ခံစာထဲမှာ ပါရှိတဲ့ စွပ်စွဲ ခံရသူတွေ အများကြီးထဲက ဦးမောင်မောင်သိန်း တစ်ယောက်သာ ရှင်းလင်း တုန့်ပြန်ခဲ့တာဖြစ်ပြီး တခြားသူတွေကတော့ အခုထိတော့ ဘာမှ တုန့်ပြန့်တာ မျိုး မရှိသေးပါဘူး။

ဒီသတင်းနဲ့ပတ်သက်သမျှ