လွှတ်တော်မှာ ကိုယ်ကျိုး မရှာဖို့ ဒေါ်စုပြော

Members of Parliament
Image caption လွှတ်တော် ကိုယ်စားလှယ်တွေ အားလုံးကို စွမ်းရည်မြှင့် သင်တန်းပေး

NLD အမျိုးသား ဒီမိုကရေစီ အဖွဲ့ချုပ် ပါတီ ဥက္ကဋ္ဌ ဒေါ်အောင်ဆန်း စုကြည်က လွှတ်တော် ဆိုတာဟာ ကိုယ်ကျိုးအတွက် အသုံးချဖို့ စင်မြင့် မဟုတ်သလို ရာထူးနေရာရဖို့ ခုတုံး လှေကားထစ်လည်း မဟုတ်ဘူးလို့ ပြောလိုက်ပါတယ်။

ဖေဖော်ဝါရီလ ၁၅ ရက်နေ့က စတင်ပြီး UNDP ကုလ သမဂ္ဂ ဖွံ့ဖြိုးတိုးတက်ရေး အစီအစဉ်က ကြီးမှူးတဲ့ ပြည်သူ့လွှတ်တော်နဲ့ အမျိုးသားလွှတ်တော် ကိုယ်စားလှယ်တွေ အတွက် ငါးရက်ကြာ စွမ်းဆောင်ရည် မြှင့်တင်ရေး သင်တန်း အဖွင့် မိန့်ခွန်းမှာ အခုလို ပြောခဲ့တာ ဖြစ်ပါတယ်။

ပြည်သူ့ ကိုယ်စားလှယ်တွေဟာ ပြည်သူ့မျက်နှာကို အဓိက ကြည့်ရမှာဖြစ်ပြီး ကိုယ့်အစုအဖွဲ့ မျက်နှာကိုတောင် အဓိက မကြည့်ရဘူးလို့လည်း သူက ပြောပါတယ်။

ဒါအပြင် ပထမအကြိမ် လွှတ်တော်က ချမှတ်ခဲ့တဲ့ ပါတီစွဲ ပုဂ္ဂိုလ်စွဲ မထားဘဲ နိုင်ငံနဲ့ ပြည်သူ့အတွက် ဝိုင်းဝန်း တာဝန် ထမ်းဆောင်ကြမယ် ဆိုတဲ့ စိတ်ဓါတ်ကို ဆက်လက် ထိန်းသိမ်း သွားဖို့လည်း ဒေါ်အောင်ဆန်း စုကြည်က ပြောခဲ့ပါတယ်။ ဒီသင်တန်းကို ဟောင်ကောင်၊ အင်္ဂလန်၊ တောင်ကိုရီးယားက လွှတ်တော် ကိုယ်စားလှယ်တွေနဲ့ ပြည်တွင်းက ပညာရှင်တချို့ လာရောက် ပို့ချတာဖြစ်ပါတယ်။

ပထမအကြိမ် လွှတ်တော်တုန်းက စွမ်းဆောင်ရည်သင်တန်းတွေ ပြုလုပ်ခဲ့ပေမဲ့ အခုလို လွှတ်တော် ကိုယ်စား လှယ်အားလုံး အတွက် မဟုတ်သလို ပြည်တွင်းက ပညာရှင်တွေ ကပဲ ပို့ချ ခဲ့တာဖြစ်ပါတယ်။

အခုအခြေအနေကို ကြည့်ခြင်အားဖြင့် အခု ဒုတိယအကြိမ်လွှတ်တော်ဟာ နိုင်ငံတကာအကူအညီ အထောက်အပံ့ ပိုရလာတယ်လို့ ရှမ်းတိုင်းရင်းသားများ ဒီမိုကရေစီ အဖွဲ့ချုပ် ပြည်သူ့ လွှတ်တော် ကိုယ်စားလှယ် ဦးစိုင်းသီဟကျော်က ပြောပါတယ်။

ဒီသင်တန်းကို ဒေါ်အောင်ဆန်းစုကြည်နဲ့ လွှတ်တော်ဥက္ကဋ္ဌ ဒုတိယ ဥက္ကဋ္ဌတွေလည်း တက်ရောက်ခဲ့ ပါတယ်။

ဒီသတင်းနဲ့ပတ်သက်သမျှ