ပုဂံဘုရားတွေမှာ စည်းကမ်း ပိုတင်းကြပ်မယ်။

ဓာတ်ပုံ မူပိုင် AP
Image caption ရှေးဟောင်း ဘုရား ပုရဝဏ်တွေမှာ စည်းကမ်း သတ်မှတ်ချက်တွေ ပိုတင်းကြပ်သွားမယ်။

ပြီးခဲ့တဲ့ ဖေဖေါ်ဝါရီလ ၁၇က်က ပုဂံ ပြဿဒ်ကြီးဘုရားပေါ်မှာ ကုမ္ပဏီတခုက လူတွေ အသံချဲ့စက်တွေဖွင့်၊ အဖွဲ့လိုက် ဆူဆူညံညံ ကခုန်နေတဲ့ ဗီဒီယိုပုံတွေ ဓါတ်ပုံတွေ အင်တာနက် စာမျက်နှာတွေပေါ်မှာ ပျံ့နှံ့ ခဲ့အပြီးမှာ ဝေဖန်မှုတွေ ထွက်ပေါ်လာခဲ့ပါတယ်။

ဒီဖြစ်ရပ်ကြောင့် ပုဂံ ရှေးဟောင်း ဘုရားနယ်မြေတွေမှာ နောက်ထပ် စည်းကမ်း သတ်မှတ်ချက်တွေ ပိုတင်းကြပ် ထုတ်ပြန်သွားမယ်လို့ ယဉ်ကျေးမှု ဝန်ကြီးဌာန ဒုတိယ ဝန်ကြီး ဒေါ်စန္ဒာခင်က ဘီဘီစီကို ပြောပါတယ်။

သတ်မှတ်ထားတဲ့ နေရာတွေက လွဲလို့ ဘုရားပေါ်မှာ ဖြစ်စေ၊ ဘုရားပုထိုး အနီးဝန်းကျင်မှာ ဖြစ်စေ၊ အရက်သေစာ သောက်စားတာ၊ စားပွဲ သောက်ပွဲ ကျင်းပတာမျိုး မလုပ်ရဘူးဆိုတဲ့ စည်းကမ်းချက် ရှိပြီးသားလို့ ဆိုပါတယ်။

မူလကတည်းက ဘုရားပုထိုးတွေ ရှေ့မှာ အဂါရဝ ဖြစ်စေမယ့် အပြုအမူမျိုးတွေ၊ ဟီရိသြတပ္ပ ဖြစ်တဲ့ ဝတ်စားဆင်ယင်မှုမျိုးတွေကို မလုပ်ရဘူးဆိုတဲ့ စည်းကမ်း သတ်မှတ်ချက်တွေ ထုတ်ပြန်ထားပြီး ဖြစ်ကြောင်းနဲ့ အခုဒီဖြစ်ရပ်ကတော့ မမျှော်လင့်ပဲ အမှတ်တမဲ့ ဖြစ်သွားတာကြောင့် အချိန်မီ မတားဆီးနိုင်ခဲ့တာ ဖြစ်ကြောင်း ဒေါ်စန္ဒာခင်က ပြောပါတယ်။

ဘုရားနယ်မြေ အတွင်း ဝင်ရောက်တဲ့ ဧည့်သည် များတာက တကြောင်း၊ ဘုရားအရေအတွက်ကလည်း များ၊ ဧရိယာကလည်း ကျယ်ပြန့်ပြီး အစောင့်ဝန်ထမ်း အရေအတွက် နည်းပါးတဲ့အတွက် ဒီလို ဖြစ်ရပ်မျိုးတွေကို ကာကွယ်တားဆီးရာမှာ အားနည်းချို့ယွင်းချက်တွေ ရှိနေတယ်လို့ ဆိုပါတယ်။

ရှေးဟောင်းဘုရားတွေ ရေရှည် တည်တန့်ခိုင်မြဲဖို့နဲ့ ဘုရားပေါ် တက်တဲ့ ဧည့်သည်တွေ အန္တရာယ် မကျရောက်စေဖို့ ရည်ရွယ်ပြီး ၂၀၁၁-၂၀၁၂ ပတ်ဝန်းကျင်ကစလို့ ဘုရားတချို့ပေါ် တက်ခွင့် ပိတ်ပင်ထားခဲ့ကြောင်း၊ ဒါပေမယ့်လည်း အခု ဒီဖြစ်ရပ်ကြောင့်တော့ ဘုရားတွေ အားလုံးပေါ် တက်ခွင့် ပိတ်ပင်တာမျိုး လုပ်မှာမဟုတ်ကြောင်း၊ ဒါပေမယ့် စည်းကမ်း သတ်မှတ်ချက်တွေကိုတော့ ပိုတင်းတင်းကြပ်ကြပ် ချမှတ်သွားမှာ ဖြစ်ကြောင်း ယဉ်ကျေးမှု ဝန်ကြီးဌာန ဒုတိယ ဝန်ကြီး ဒေါ်စန္ဒာခင်က ပြောပါတယ်။