အမေဇုံတောထဲက လူမျိုးစုသစ်တစ်စုကို ရှာတွေ့

  • ကယ်ရို ကွီရို နဲ့ ဖိလစ်ပေ ဆူဇာ
  • ဘီဘီစီဘရာဇီးလ်

ခရီးလမ်းကြောင်း လွဲချော်သွားရာကနေ အခုလို ရှားရှားပါးပါး ရှာဖွေတွေ့ရှိမှု ဖြစ်လာပါတယ်။ မနုဿဗေဒပညာရှင် တစ်ယောက်နဲ့ ဘရာဇီးက နာမည်ကျော် ဓာတ်ပုံဆရာတစ်ယောက်တို့က အမေဇုံတောထဲက အရင်က တွေ့ထားဖူးတဲ့ လူမျိုးစု တစ်စုဆီ ရဟတ်ယာဉ်နဲ့ အသွားမှာ မထင်မှတ် မမျှော်လင့်ပဲ ဘယ်တုံးကမှ မသိခဲ့ရဖူးတဲ့ တောတွင်းနေ လူမျိုးစုတစ်စုကို တွေ့လိုက်ကြရတာဖြစ်ပါတယ်။

ဓာတ်ပုံ ပုံစာ,

တောတွင်းသားတွေက အပေါ်က လာကြည့်နေတဲ့လူတွေကို ရန်လိုစိတ်တဝက်၊ စူးစမ်းလိုစိတ် တဝက်နဲ့ စောင့်ကြည့်နေခဲ့ပါတယ်။

ဘရာဇီးအစိုးရရဲ့ စာရင်းအရ မုတ်သုန်တောတွေထဲမှာ ပြင်ပနဲ့ လုံးဝ ထိတွေ့မှု မရှိတဲ့ လူမျိုးစု အုပ်စုပေါင်း ၁၀၇ ခုလောက် ရှိနေနိုင်တယ်လို့ဆိုပါတယ်။

ဓာတ်ပုံ ပုံစာ,

အပေါ်က ရဟတ်ယာဉ် ဝဲပျံလာတာကို တွေ့လိုက်တာနဲ့ သူတို့ သစ်ပင်နောက်မှာ ပုန်းဝပ်လိုက်ကြပါတယ်။

အခုလို လူမျိုးစု အသစ်တစ်ခုကို တွေ့လိုက်ရတဲ့ နေရာဟာ ဘရာဇီး နိုင်ငံမြောက်ပိုင်း ပီရူးနဲ့ နယ်စပ်က အက်ကရီဆိုတဲ့ ပြည်နယ်ထဲမှာ ဖြစ်ပါတယ်။

ဓာတ်ပုံ ပုံစာ,

ရဟတ်ယာဉ်နဲ့ လာကြသူတွေရဲ့ ရည်ရွယ်ချက်ကို မသိတဲ့အတွက် ဒီ လူစုကလည်း မြားတွေနဲ့ ပစ်ခတ်ခဲ့ပါတယ်။

ရဟတ်ယာဉ်နဲ့ ဝဲ ပျံကြည့်နေရာက မိုးတွေသည်းသည်းမဲမဲ ရွာလာလို့ သူတို့ အောက်ကို ဆင်းခဲ့ကြရပါတယ်။ မိုးစဲသွားတော့ မမှောင်ခင်မှာ စောစောက တွေ့ခဲ့ရတဲ့ လူတွေဆီ သူတို့ ပြန်သွားခဲ့ပါတယ်။

ကောက်ရိုးပုံထဲ အပ်ရှာရသလို

"မိုးတိတ်သွားတော့ ကျွန်တော်တို့ ပြန်လှည့်ပြီး သွားကြည့်တယ်။ အဲဒီတော့မှ အောက်မှာ ကောက်ရိုးနဲ့ လုပ်ထားတဲ့ အိမ်တန်းကို တွေ့ရတယ်။ သီးနှံတချို့ စိုက်ထားတာလည်း တွေ့ရတယ်။ ကျွန်တော်တို့ ရဟတ်ယာဉ်က အရှိန်နဲ့ မောင်းနေတာ၊ ဒါပေမယ့် ကျွန်တော် စပြီး ဓာတ်ပုံတွေ ရိုက်ယူခဲ့ပါတယ်" လို့ ဓာတ်ပုံဆရာ ရော်ဘတ်တို စတုကတ်က ပြောပါတယ်။

ကောက်ရိုးပုံကြီးထဲက အပ်ကို ရှာရသလိုပါပဲ၊ ကံကောင်းလွန်းလို့ တွေ့ခဲ့ရတာပါလို့ သူက ပြောပါတယ်။

ဓာတ်ပုံဆရာ ရော်ဘတ်တို စတုကတ်ဟာ သမ္မတရဲ့ ပင်တိုင်ဓာတ်ပုံဆရာအဖြစ် နှစ်တော်တော်များများ လုပ်ခဲ့ပါတယ်။ သူနဲ့ အတူ အခု လေ့လာရေး ခရီးသွားခဲ့သူကတော့ ဘရာဇီးရဲ့ အမေဇုံတောတွေထဲက လူမျိုးစုတွေအကြောင်း နှစ်ပေါင်း ၄၀ ကျော် လေ့လာသုတေသန ပြုလုပ်နေခဲ့သူ ပညာရှင် ဟိုဆေး ကာရော့စ် မေရယ်လက်စ် ပါ။

ဓာတ်ပုံ ပုံစာ,

A construction made by the Indians

အခုလို လူမျိုးစုတွေနေတဲ့ နေရာအပေါ် ဖြတ်ပြီး ပျံသန်းတာကိုက ပြင်ပနဲ့ မထိတွေ့သေးတဲ့ လူမျိုးစုတွေရဲ့ ဒေသထဲကို ကျူးကျော်ရာ ရောက်နိုင်တယ်လို့ မေရယ်လက်စ်က ပြောပါတယ်။

ဒီလူတွေကို စာရင်းပြုစု မှတ်တမ်းတင်ရတာ လုပ်သင့်တဲ့ အလုပ်ပါ၊ ဒါပေမယ့် သူတို့ ကြောက်လန့်သွားမှာ စိုးရလို့ သိတ်လည်း နိမ့်နိမ့် မပျံရပါဘူး။ တစ်ဖက်မှာတော့လည်း ဒီလို လူတွေ ရှိနေတယ်ဆိုတာ ကမ္ဘာက သိဖို့လိုပါတယ်။ ပြီးတော့ သူတို့ကို ဘယ်လို ထိန်းသိမ်းစောင့်ရှောက်မလဲဆိုတဲ့ မူဝါဒလည်း ချမှတ်နိုင်ဖို့ပါလို့ သူက ဆက်ပြောပါတယ်။

ဓာတ်ပုံ ပုံစာ,

ဒီလူမျိုးစုတွေ ရှင်သန်နေနိုင်တာဟာ သူတို့ နေတဲ့ နေရာက သိတ်ဝေးလံ ခေါင်သီလို့ဖြစ်မယ်လို့ ယူဆကြ

ခြိမ်းခြောက်မှုလား

ရဟတ်ယာဉ်နဲ့ လာကြတဲ့ အဖွဲ့ရဲ့ ရည်ရွယ်ချက်က ဘယ်လိုပဲ ကောင်းကောင်း၊ အောက်က တောတွင်းသားတွေကတော့ သူတို့အတွက် ခြိမ်းခြောက်မှုလို့ မြင်ကြပါတယ်။

သူတို့မျက်နှာပေါ်က စိုးရိမ်ထိတ်လန့်မှုနဲ့ မကြေနပ်မှုတို့ကို ဓာတ်ပုံဆရာရဲ့ ကင်မရာက အမိအရ မှတ်တမ်းတင်နိုင်ခဲ့ပါတယ်။

ပြီးတော့ အောက်နေ မြားတွေနဲ့လည်း ဆက်တိုက် ပစ်ခဲ့ပါတယ်။ ရဟတ်ယာဉ်ကတော့ ၇ မိနစ်ကြာအောင် ပျံဝဲနေပြီးမှ အဲဒီ နေရာက ခွာခဲ့ပါတယ်။

လူဦးရေ မနည်း

အခု တွေ့လိုက်ရတဲ့ လူမျိုးစုတွေကို သူတို့နေတဲ့ နေရာနားက မြစ်အမည်ကို အစွဲပြုပြီး မိတ်တာက အင်ဒီးယန်းတွေလို့ လောလောဆယ် အမည်ပေးထားတယ်လို့ မေရယ်လက်စ်က ဆိုပါတယ်။ စုစုပေါင်း လူဦးရေ ၃၀၀ လောက်ရှိမယ်လို့လည်း သူက ခန့်မှန်းပါတယ်။ ပြင်ပနဲ့ အဆက်အသွယ်မရှိတဲ့ လူမျိုးစု တစ်စု အနေနဲ့ ဒီ အရေအတွက်ဟာ မနည်းလှဘူးလို့ သူက ယူဆပါတယ်။

သူတို့ လူစုဟာ အဲဒီ ဒေသထဲကပဲ တခြား လူမျိုးစု အုပ်စုတွေနဲ့ အဆက်အသွယ်မရှိဘူးလို့လည်း ယူဆရပါတယ်။

ဓာတ်ပုံ ပုံစာ,

The tribe lives in an area with dense vegetation

စတုကတ်ရိုက်ယူလာတဲ့ ဓာတ်ပုံတွေကို လေ့လာပြီးတဲ့ အခါ မေရယ်လက်စ်က ပြင်ပလူတွေနဲ့ အထိအတွေ့မရှိတဲ့ လူမျိုးစုတွေမှာ တွေ့ရတဲ့ လက္ခဏာတွေကို ဒီ လူမျိုးစုမှာလည်း တွေ့ရတယ်လို့ ပြောပါတယ်။

အမျိုးသမီးတွေက စကပ်တစ်မျိုးဝတ်ကြပြီး၊ အနားမှာ ချည်တွေ စိုက်ထားတာလည်း တွေ့ရတယ်၊ ချည်တွေကနေ အထည်ရက်လုပ်ကြတဲ့ ပုံမျိုးလည်း တွေ့ရတယ်။ ပြောင်း၊ ငှက်ပျော နဲ့ အာလူးတွေ စိုက်ကြတာလည်း တွေ့ရတယ်လို့ သူက ဆိုပါတယ်။

ဓာတ်ပုံ ပုံစာ,

ဒီလူမျိုးစုတွေအတွက် လတ်တလော ခြိမ်းခြောက်မှုတွေတော့ မတွေ့ရဘူးလို့ ကျွမ်းကျင်သူတွေကပြော

တချို့ အမျိုးသားတွေမှာ ထူးခြားတဲ့ ဆံပင်ပုံစံတွေလည်း တွေ့ရပါတယ်။ ရှေ့ကို အပြောင်ရိတ်ထားပြီး နောက်ဘက်နားမှာ အရှည်ထားတာလည်း တွေ့ရပါတယ်။

သူတို့ဟာ အဲဒီ ဒေသအတွင်း တွေ့ရတဲ့ တခြား လူမျိုးစုတွေထက် အရပ်ရှည်ကြပြီး အမျိုးသားတွေက သူတို့ရဲ့ လိင်အင်္ဂါတွေကို အဝတ်စနဲ့ ချည်ထားတာလည်း တွေ့ခဲ့ရတယ်လို့ မေရယ်လက်စ်က ဆိုပါတယ်။

သူတို့ အခုအထိ အုပ်စုလိုက် ရှင်သန်နေနိုင်ကြတာဟာ ပြင်ပနဲ့ ထိတွေ့မှု မရှိလို့ လို့ ယူဆနိုင်ပါတယ်။

ဓာတ်ပုံဆရာ စတုကတ်ကတော့ သူ အဲဒီနေရာကို ထပ်သွားချင်သေးပေမယ့် သွားဖြစ်ော့မယ်လို့ မထင်တဲ့ အကြောင်း၊ ဒီလူတွေကို သူတို့ နယ်ပယ်ထဲမှာပဲ စိတ်အေးချမ်းသာ နေစေတာ၊ အနှောက်အယှက် မပေးတာ အကောင်းဆုံး ဖြစ်မယ်လို့ ထင်တဲ့ အကြောင်း ပြောသွားပါတယ်။