ထမ့်လွန်ဂူအကြောင်းဖြစ်ရပ်မှန်ရုပ်ရှင်ရိုက်ပြီး ဂူကိုလည်း ပြတိုက်အဖြစ်ပြောင်းလဲမယ်

ဓာတ်ပုံ မူပိုင် ThAI NAVY SEAL
Image caption ကယ်ဆယ်ရေးသမားတွေရှာတွေ့ခဲ့တဲ့ တောဝက်ဘောလုံး အသင်းသားတွေနဲ့သူတို့ရဲ့နည်းပြ

ထိုင်းတောဝက်ဘောလုံးအသင်းသား ၁၂ ဦးနဲ့ သူတို့ရဲ့နည်းပြဖြစ်သူတို့ နှစ်ပတ်ကျော်ကြာပိတ်မိခဲ့တဲ့ ထိုင်းနိုင်ငံမြောက်ပိုင်းက မယ်ဆိုင်ထမ့်လွန်ဂူကိုပြတိုက် အဖြစ် ပြသဖို့ ပြင်ဆင်နေပါတယ်။

ကယ်ဆယ်ရေးတွေကို ဘယ်လိုလုပ်ခဲ့ရတယ် ဆိုတဲ့အပိုင်းတွေကို ပြသသွားမှာဖြစ်ပြီး ဒီဂူဟာ ထိုင်းနိုင်ငံ အတွက် စိတ်ဝင်စားစရာနေရာတခု ဖြစ်လာလိမ့်မယ်လို့ ကယ်ဆယ်ရေးအဖွဲ့က တရားဝင်ပြောကြားခဲ့ ပါတယ်။

ကယ်ဆယ်ရေးလုပ်ဆောင်ခဲ့တဲ့ အကြောင်းကို ဖြစ်ရပ်မှန်ဇာတ်လမ်းအဖြစ် ပုံဖော်ရိုက်ကူးဖို့ လုပ်နေတဲ့ ကုမ္ပဏီတွေကလည်း အနည်းဆုံး ၂ ခုရှိနေတာပါ။

ပိတ်မိခဲ့တဲ့ ကလေးငယ်အားလုံးဟာ အခုအခါမှာတော့ ဆေးရုံမှာ ရှိနေပြီး ကျန်းမာရေးကလည်း ကောင်းမွန် လာပြီဖြစ်ပါတယ်။

စိတ်ရောကိုယ်ပါကျန်းမာနေပြီဆိုတာ ထိုင်းအစိုးရက တရားဝင်ထုတ်ပြန်ခဲ့တဲ့ ရုပ်သံဗီဒီယိုထဲမှာ မြင်တွေ့နိုင် ပေမယ့် အနည်းဆုံး သီတင်းတပတ်လောက်ကြာအောင်တော့ အထူးကုသရေးအခန်းထဲမှာ နေထိုင်ရဦး မှာပါ။

ထိုင်းတော်ဝင်ရေတပ်အထူးအဖွဲ့က ထုတ်ပြန်ခဲ့တဲ့ ကယ်ဆယ်ရေးတွေလုပ်ခဲ့တဲ့ ရုပ်သံတွေထဲမှာ ရေငုပ်သမားတွေရဲ့ ကျွမ်းကျင်မှုကို မြင်တွေ့ရပြီး တောဝက်အသင်းသားတွေဆီ သွားတဲ့ လမ်းကြောင်းတလျှောက် ဘယ်လောက် အန္တရာယ်များတယ်ဆိုတာကလည်း မြင်သာလှပါတယ်။

ဓာတ်ပုံ မူပိုင် FACEBOOK.COM/MIKKO.PAASI.3
Image caption တောဝက်ဘောလုံးသင်းသားတွေနဲ့သူတို့နည်းပြရှိရာဆီ ခက်ခက်ခဲခဲသွားရတဲ့အခြေအနေ

ထမ့်လွန်ဂူဟာ ထိုင်းနိုင်ငံမှာရှိတဲ့ အကြီးဆုံးလိုဏ်ဂူတွေထဲကတခုဖြစ်ပြီး ဒီဂူဟာထိုင်းမြန်မာနယ်စပ်က ချင်းရိုင် ခရိုင်အတွင်းက မယ်ဆိုင်မြို့လေးနားမှာရှိတဲ့ တောင်တန်းတွေအောက်မှာ တည်ရှိတာ ဖြစ်ပါတယ်။

အဲဒီဒေသဟာ ဖွံ့ဖြိုးမှုနည်းပြီး ခရီးသွားလုပ်ငန်းအတွက် ဝန်ဆောင်မှုပေးနိုင်တဲ့ အဆောက်အအုံတွေ လောလောဆယ်မှာတော့ မရှိသလောက်ပါပဲ။

ဒီနေရာဟာ သက်ဝင်လှုပ်ရှားလာမယ့် ပြတိုက်တခုဖြစ်လာမှာဖြစ်ပြီး ကယ်ဆယ်ရေးလုပ်ငန်းတွေကို ဘယ်လို လုပ်ဆောင်ခဲ့ရတယ် ဆိုတာကို ပြသထားမှာဖြစ်တယ်လို့ ကယ်ဆယ်ရေးအဖွဲ့ရဲ့အကြီးအကဲ ချင်းရိုင် ခရိုင် အုပ်ချုပ်ရေးမှူးဟောင်းဖြစ်တဲ့ နာရုန်ဆက် အိုဆော့ သနက်ခွန်က သတင်းစာ ရှင်းလင်းပွဲမှာ ပြောခဲ့ပါတယ်။

အချက်အလက်တွေအားလုံးကို စုပြီးတည်ဆောက်သွားမယ်၊ ဒါတွေက ထိုင်းနိုင်ငံအတွက် အဓိက ဆွဲဆောင်မှုတခု ဖြစ်လာစေမှာပါ။

ထိုင်းဝန်ကြီးချုပ် ပရာယွတ်က တော့ ခရီးသွားဧည့်တွေအတွက် ဂူအတွင်းရော အပြင်မှာ လုံခြုံစိတ်ချရစေဖို့ ကိရိယာတွေကို ကြိုတင်ကာကွယ်မှုအနေနဲ့ လုပ်ဆောင်ထားမှာဖြစ်တယ်လို့ ဆိုပါတယ်။

ထိုင်းနိုင်ငံဟာ ဇွန်လ ကနေ အောက်တိုဘာလအထိ မုတ်သုန်ရာသီမှာ အကြီးအကျယ် ရေကြီးလေ့ရှိတာကြောင့် ကယ်ဆယ်ရေး လုပ်ဆောင်ချက်တွေကို ပြသသွားမယ့် ဒီပြတိုက်ဟာ တနှစ် ပတ်လုံး ဖွင့်လှစ်ထားမှာလား ဆိုတာတော့ တိတိကျကျမသိရသေးပါဘူး။

ကလေးတွေ မိုးရာသီမှာ လေ့လာရေးခရီးထွက်ရင်း ဂူအနက်ပိုင်းထဲမှာ မတော်တဆ ပိတ်မိသွားခဲ့တာ ဖြစ်ပါတယ်။

ဓာတ်ပုံ မူပိုင် AFP/GETTY
Image caption ကယ်ဆယ်ရေးလုပ်ဆောင်ခဲ့တဲ့ နိုင်ငံတကာက ရေငုပ်ကျွမ်းကျင်သူတွေ

ကယ်ဆယ်ရေးလုပ်ဆောင်ခဲ့တဲ့ မယုံကြည်နိုင်ဖွယ် ဖြစ်ရပ်မှန်ဒီဇာတ်လမ်းကို ရုပ်ရှင်အနေနဲ့ ဖန်တီးဖို့အတွက် ရုပ်ရှင်ကုမ္ပဏီ ၂ ခုကအပြိုင်အဆိုင်လုပ်နေပြီ ဖြစ်ပါတယ်။

တောဝက်ဘောလုံးအသင်းသားတွေနဲ့သူတို့ရဲ့နည်းပြတွေ အပြင်ပြန်မရောက်ခင်ကတည်းက အမေရိကန် စတူဒီယိုတခုဖြစ်တဲ့ Pure Flix ကတော့ သူရဲ့ရုပ်ရှင်ထုတ်လုပ်ရေးအဖွဲ့တွေက အဲဒီနေရာကိုရောက်ရှိနေပြီး ကယ်ဆယ်ရေး လုပ်ဆောင်နေသူတွေနဲ့ တွေ့ဆုံမေးမြန်းတာတွေကို လုပ်ဆောင်နေပြီလို့ ကြေညာထားပါတယ်။

လော့စ်အိန်ဂျလိစ် အခြေစိုက် အိုင်ဗန်ဟိုးရုပ်ရှင်ကုမ္ပဏီကတော့ ထိုင်းအာဏာပိုင်နဲ့ ရေတပ်က ဒီရုပ်ရှင်ကို ရိုက်ဖို့ သူတို့ကို ရွေးချယ်ထားပြီးပြီလို့ ဆိုပါတယ်။

ဆက်စပ် အကြောင်းအရာများ