လေယာဉ်မောင်းခန်းထဲက အမျိုးသမီးတစ်ဦးရဲ့ ဓာတ်ပုံကြောင့် လေယာဉ်မှူး အလုပ်ပြုတ်

တရုတ်၊ လေယာဉ်မှူး၊ ဝေဘို လူမှုကွန်ရဂ ဓာတ်ပုံ မူပိုင် Weibo/Screenshot
Image caption လေယာဉ်မောင်းခန်းထဲမှာ ငြိမ်းချမ်းရေးသင်္ကေတ လက်နှစ်ချောင်း ထောင်ပြနေပုံကို အဲဒီအမျိုးသမီးခရီးသည်က ဝေဘို လူမှုကွန်ရက်ပေါ်တင်ခဲ့

အမျိုးသမီး ခရီးသည်တစ်ဦးရဲ့ လေယာဉ်မောင်းခန်းထဲက ဓာတ်ပုံ လူမှုကွန်ရက်ပေါ် ပျံ့နှံ့သွားခဲ့အပြီးမှာ တရုတ် လေယာဉ်မှူးတစ်ယောက် လေယာဉ်မောင်းခွင့် ရာသက်ပန် အပိတ်ခံလိုက်ရပါတယ်။

အဲဒီဓာတ်ပုံကို ပြီးခဲ့တဲ့ ဇန်နဝါရီလက ကွိလင်မြို့ကနေ ယန်ကျိုးမြို့အသွား ကွိလင်လေကြောင်းပိုင် လေယာဉ်ခရီးစဉ်တစ်ခုအတွင်း ရိုက်ခဲ့တာပါ။ ဒါပေမဲ့ အခုသီတင်းပတ်ကမှ လူမှုကွန်ရက်တွေပေါ်မှာ ပျံ့နှံ့သွားခဲ့ပြီး လေကြောင်းကုမ္ပဏီက အဲဒီလေယာဉ်မှူးကို အရေးယူလိုက်တာ ဖြစ်ပါတယ်။

အဲဒီအမျိုးသမီးကို ဘေးမှာ စားစရာ သောက်စရာတွေနဲ့အတူ လေယာဉ်မောင်းခန်းထဲမှာ ဓာတ်ပုံရိုက်ဖို့ အိုက်တင်ပေးနေတာ တွေ့ရပါတယ်။

လေယာဉ်မှူးဟာ လေကြောင်း ဘေးကင်းလုံခြုံမှုဆိုင်ရာ စည်းမျဉ်း စည်းကမ်းတွေ ချိုးဖောက်ခဲ့တယ်လို့ ကွိလင်လေကြောင်း ကုမ္ပဏီရဲ့ ထုတ်ပြန်ချက်ထဲမှာ ဖော်ပြထားပါတယ်။

"လေယာဉ်မှူးကို ကျေးဇူးတင်လိုက်တာ"

ဒီဖြစ်ရပ်ဟာ ပြီးခဲ့တဲ့ ဇန်နဝါရီလ ၄ ရက်နေ့က ကွိလင်မြို့ကနေ ယန်ကျိုးမြို့ ဆီအသွား ကွိလင် လေကြောင်းပိုင် လေယာဉ်ခရီးစဉ်အမှတ် GT1011 မှာ ဖြစ်ခဲ့တာလို့ တရုတ်အစိုးရပိုင် The Global Times သတင်းက ဆိုပါတယ်။

ဒါပေမဲ့ အဲဒီ အမျိုးသမီးရဲ့ ပို့စ်ပေါ်က ဓာတ်ပုံကို ဝေဘို လူမှုကွန်ရက်ပေါ်မှာ အကြီးအကျယ် ဝေမျှခဲ့ကြအပြီးမှာတော့ တနင်္ဂနွေနေ့က လေကြောင်းကုမ္ပဏီက ဒီကိစ္စကို သတိပြုမိသွားခဲ့တာပါ။

တရုတ်နိုင်ငံမှာ ရေပန်းစားတဲ့ ပုံစံတစ်ခုဖြစ်တဲ့ ငြိမ်းချမ်းရေး သင်္ကေတ လက်နှစ်ချောင်းထောင်ပြနေတဲ့ သူ့ရဲ့ ဓာတ်ပုံအောက်မှာ အဲဒီ အမျိုးသမီးက "လေယာဉ်မှူးကို ကျေးဇူးတင်လိုက်တာ၊ အရမ်းပျော်တာပဲ"လို့ ရေးထားတာ တွေ့ရပါတယ်။

အဲဒီအမျိုးသမီးဟာ ကွိလင်မြို့က တက္ကသိုလ်တစ်ခုမှာ လေယာဉ်မယ် သင်တန်း တက်နေသူ ဖြစ်တယ် ဆိုပြီး ထင်ကြေးပေး ပြောနေကြတယ်လို့ တရုတ်သတင်းဌာနရဲ့ သတင်းစာမျက်နှာမှာ ဖော်ပြထားပါတယ်။

ဒီဓာတ်ပုံကို လေယာဉ်ပျံသန်းနေတုန်း ဝေဟင်မှာ ရိုက်ခဲ့တာလား ဆိုတာကို ကွိလင်လေကြောင်းကုမ္ပဏီက အတိအကျ ထုတ်ဖော် မပြောခဲ့ပါဘူး။ ဒါပေမဲ့ တရုတ် လေယာဉ်မှူးတွေနဲ့ အကဲခတ်တွေကတော့ ဒီပုံဟာ လေယာဉ်ခရီးစဉ်အတွင်း ရိုက်ခဲ့ပုံ ရတယ်လို့ ယူဆနေကြပါတယ်။

အမည်မဖော်ပြတဲ့ အဲဒီ လေယာဉ်မှူးကို လေကြောင်းနဲ့ ပတ်သက်တဲ့ လုပ်ငန်းအားလုံးကနေ အလုပ်ဖြုတ်လိုက်သလား ဆိုတာ အသေအချာ မသိရပေမဲ့ လေယာဉ်မောင်းခွင့်ကိုတော့ ရာသက်ပန် ပိတ်ပင်လိုက်ပါတယ်။

သူဟာ လေယာဉ်မောင်းခန်းထဲ မသက်ဆိုင်သူကို ခေါ်သွင်းခဲ့တဲ့အတွက် စည်းမျဉ်း ချိုးဖောက်တယ်လို့ ကွိလင်လေကြောင်းကုမ္ပဏီရဲ့ ထုတ်ပြန်ချက်မှာ ဖော်ပြထားပါတယ်။

အထူးခွင့်ပြုချက် ဒါမှမဟုတ် မရှိမဖြစ် လိုအပ်တဲ့အခြေအနေ မဟုတ်ရင် လေယာဉ်မောင်းခန်းထဲ ခရီးသည်တွေ ဝင်ခွင့် မရှိဘူးလို့ တရုတ် အရပ်ဘက်လေကြောင်း အုပ်ချုပ်ရေးအဖွဲ့က ဆိုပါတယ်။

ဒီဖြစ်ရပ်မှာ ပါဝင်ပတ်သက်နေတဲ့ တခြား ဝန်ထမ်းတွေကိုလည်း နောက်ထပ် စုံစမ်း စစ်ဆေးမှုတွေ လုပ်နေတုန်းမှာ ရာထူးကနေ ရက်အကန့်အသတ်မရှိ ဆိုင်းငံ့ထားလိုက်ပါတယ်။

"ခရီးသည်တွေ ဘေးကင်းလုံခြုံရေးဟာ ကွိလင် လေကြောင်းကုမ္ပဏီရဲ့ ဦးစားပေးတာဝန် ဖြစ်ပါတယ်။၊ လေကြောင်းလုံခြုံမှုကို ထိပါးစေနိုင်တဲ့ လုပ်ငန်းသဘောမဆန် မလျော်ကန်တဲ့ အပြုအမူမှန်သမျှကို လုံးဝ သည်းမခံဘူး ဆိုတဲ့ မူဝါဒ ချမှတ်ထားပါတယ်" လို့ ကွိလင် တရုတ်လေကြောင်း ကုမ္ပဏီက ပြောပါတယ်။

မနှစ်တုန်းကလည်း တုန်ဟိုင်း တရုတ်လေကြောင်းကုမ္ပဏီက လေယာဉ်မှူးတစ်ဦး သူ့ဇနီးကို လေယာဉ်မောင်းခန်းထဲ ဝင်ခွင့်ပြုခဲ့တဲ့အတွက် ကုမ္ပဏီက သူ့ကို လေယာဉ်မှူးရာထူးကနေ ၆ လဆိုင်းငံ့ခဲ့ပြီး သူ့ရဲ့ လေကြောင်းနည်းပြ သင်တန်းလက်မှတ်ကို ပြန်ရုပ်သိမ်းခဲ့ပါတယ်။