တရုတ် ကျန်းမာရေး ဝန်ထမ်း ၆ ဦး ကိုရိုနာဗိုင်းရပ်စ်ကြောင့်သေဆုံး

လူစုဝေးခန်းမတစ်ခုကို ဆေးရုံအသွင် အရေးပေါ် ပြောင်းခဲ့ရ ဓာတ်ပုံ မူပိုင် AFP
Image caption လူစုဝေးခန်းမတစ်ခုကို ဆေးရုံအသွင် အရေးပေါ် ပြောင်းခဲ့ရ

တရုတ်မှာ ကိုဗစ်-၁၉ ရောဂါ ကူးစက်နေစဉ် ကျန်းမာရေး အကာအကွယ် ဝတ်စုံတွေ မလုံလောက်မှုအတွက် စိုးရိမ်နေရချိန်မှာပဲ ဒီဗိုင်းရပ်စ် ကူးစက်ခံခဲ့ရတဲ့ ကျန်းမာရေး ဝန်ထမ်း ဘယ်လောက်ရှိတယ်ဆိုတာကို အစိုးရက ထုတ်ပြောလိုက်ပါတယ်။

ဗိုင်းရပ်စ်ကူးစက်မှုကြောင့် ကျန်းမာရေး ဝန်ထမ်း ခြောက်ဦး သေဆုံးခဲ့ပြီး ဝန်ထမ်း ၁၇၁၆ ဦး ကူးစက်ခံထားရတယ်လို့ ဆိုပါတယ်။

ဗိုင်းရပ်စ်အကြောင်း စောစောစီးစီး စတင် တပ်လှန့်သတိပေးခဲ့တဲ့ ဒေါက်တာ လီဝမ်လျန်း သေဆုံးခဲ့ပြီးနောက် လူတွေက အစိုးရ လုပ်ဆောင်ချက်တွေအပေါ် ဒေါသထွက်ခဲ့ကြပါတယ်။

ဖေဖော်ဝါရီ ၁၄ ရက် မှာ လူ ၁၂၂ ယောက် ထပ်မံ သေဆုံးခဲ့လို့ တရုတ်မှာ သေဆုံးသူ ၁၃၈၁ ယောက် အထိရှိလာပါပြီ။

ကူးစက်ခံထားရသူကလည်း ၆၃,၉၂၂ ထိ ရောက်လာပြီလို့ တရုတ် အမျိုးသား ကျန်းမာရေး ကော်မရှင်ရဲ့ စာရင်းတွေအရ သိရပါတယ်။

တရုတ်မှာ ဗိုင်းရပ်စ် ကူးစက်မှု အဓိက ဖြစ်နေတဲ့ ဟူဘေးပြည်နယ်မှာ အခု ရက်ပိုင်းအတွင်း သေဆုံးသူ ရုတ်တရက် များပြားသွားပေမဲ့ ဗိုင်းရပ်စ်ရဲ့ ကူးစက်သေဆုံးမှု ပုံစံ သိသိသာသာ မပြောင်းသွားဘူးလို့ ကမ္ဘာ့ကျန်းမာရေးအဖွဲ့ WHO က ပြောပါတယ်။

အခုလို ရုတ်တရက်များသွားတာဟာ ကုသပေးဖို့ လူစာရင်း သတ်မှတ်ပုံ ပိုကျယ်ပြန့် သွားလို့ ဖြစ်တယ်လို့ WHO လို့ အရေးပေါ် ကျန်းမာရေး အစီအစဉ်က မိုက်ရိုင်ယန်က ပြောပါတယ်။

အဲဒါအပြင် တရုတ်ပြင်ပမှာလည်း ကူးစက်သူ သိသိသာသာ တိုးလာတာ မရှိဘူးလို့ WHO က ပြောပါတယ်။

ဒါပေမဲ့ ဂျပန်မှာ ကမ်းကပ်ထားရတဲ့ Diamond Princess ခရီးသည်တင်သင်္ဘောပေါ်မှာတော့ ကူးစက်မှု အသစ် ၄၄ ခု ထပ်တွေ့ခဲ့လို့ အဲဒီသင်္ဘောပေါ်မှာ ကူးစက်သူ ၂၁၈ ယောက်ထိ ရှိလာပြီ ဖြစ်ပါတယ်။

ဓာတ်ပုံ မူပိုင် Li Wenliang
Image caption ဝူဟန် ဗဟို ဆေးရုံမှာ တာဝန်ထမ်းဆောင်ရင်း ဗိုင်းရပ်စ် ကူးစက် သေဆုံးခဲ့တဲ့ ဒေါက်တာလီ

ကျန်းမာရေးဝန်ထမ်းတွေ အခြေအနေ ဘယ်လိုရှိလဲ

ဝူဟန်မှာ ဗိုင်းရပ်စ် ကူးစက်ခံထားရတဲ့ ကျန်းမာရေး ဝန်ထမ်း ၁၁၀၂ ယောက်ရှိပြီး ဟူဘေးပြည်နယ်ထဲမှာ နောက်ထပ် ၄၀၀ ကူးစက်ခံထားရတယ်လို့ တရုတ်အမျိုးသားကျန်းမာရေး ကော်မရှင်က ဒုတိယ ခေါင်းဆောင် ကျန်းရီရှင်းက ပြောပါတယ်။

ကူးစက်ခံရတဲ့ ကျန်းမာရေး ဝန်ထမ်းအရေအတွက်လည်း တိုးလာတယ်လို့ သူက ပြောပါတယ်။

အဲဒီဒေသက ဆေးရုံတွေမှာ အကာအကွယ် နှာခေါင်းစည်းတွေ၊ မျက်မှန်တွေနဲ့ ဝတ်စုံတွေ ဖြည့်ဆည်းမပေးနိုင်ဘဲ မလုံလောက် ဖြစ်နေပါတယ်။

ဆရာဝန်တစ်ယောက်က သူနဲ့ အတူ ကျန်းမာရေး ဝန်ထမ်း ၁၆ ယောက်မှာ ကိုဗစ်-၁၉ ရောဂါ လက္ခဏာတွေ တွေ့နေရတယ်လို့ ပြောပါတယ်။

နောက်ထပ် ကျန်းမာရေး ဝန်ထမ်းတစ်ယောက်ကတော့ သူတို့ဆေးရုံမှာ သူနဲ့အတူ ကျန်းမာရေး ဝန်ထမ်း ၁၀၀ ကျော် သီးသန့်ခွဲနေရပြီလို့ ပြောပါတယ်။

ဝန်ထမ်း ၅၀၀ ကျော် ရှိတဲ့ ထဲမှာ နောက်ထပ် ၃၀ မှာလည်း ကူးစက်ခံရတာကို တွေ့ထားတယ်လို့ ပြောပါတယ်။

ဒီဗိုင်းရပ်စ် ကူးစက်မှုအကြောင်းကို ဒီဇင်ဘာ ၃၀ ရက်မှာ စတင် သတိပေးခဲ့တဲ့ ဝူဟန် ဗဟို ဆေးရုံကြီးက ဒေါက်တာ လီဝမ်လျန်း ဖေဖော်ဝါရီ ၇ ရက်မှာ သေဆုံးခဲ့ပြီးနောက် ကျန်းမာရေး ဝန်ထမ်းတွေရဲ့ စွန့်စားရမှုတွေကို လူတွေ ပိုသတိထားမိလာပါတယ်။

ဓာတ်ပုံ မူပိုင် AFP
Image caption ဗီယက်နမ်လေကြောင်းလိုင်းက လေယာဉ်ကို ပိုးသတ်သန့်စင်နေစဉ်

တခြားနေရာတွေ

တရုတ်က ကျောင်းတွေ- ကျောင်းတွေကို ပြန်ဖွင့်ဖို့ ခက်ခဲနေပြီး ပြည်နယ်တော်တော်များများမှာ ဖေဖော်ဝါရီ လကုန်အထိ ပိတ်ထားပါတယ်။

တရုတ်နိုင်ငံ ပြင်ပ- ကူးစက်မှု ၄၅၆ ခုရှိပြီး ၂၄ နိုင်ငံမှာ ကူးစက်ခံထားရပါတယ်။

စင်ကာပူ - ကျန်းမာရေး ဝန်ကြီးဌာနက ကူးစက်မှု အသစ် ၉ ခု ထပ်တွေ့ခဲ့လို့ ကူးစက်မှု ၆၇ ခု ရှိ လာပါပြီ။

ယူကေ - နောက်ဆုံးကူးစက်ခံရသူနဲ့ ထိတွေ့ခဲ့တဲ့ သူတွေကို ရှာဖွေနေပါတယ်။ တရုတ်ကနေ ပြီးခဲ့တဲ့ ရက်ပိုင်းက လန်ဒန်ကို ပြန်လာတဲ့ အမျိုးသမီးကို ယူကေမှာ ကိုးယောက်မြောက် ကူးစက်သူ အဖြစ် တွေ့ခဲ့တာပါ။

သြစတြေးလျ - တရုတ်ကလာသူတွေကို ဝင်ခွင့်ပိတ်တာ နောက်ထပ် တစ်ပတ်ထပ်တိုးပြီး ဖေဖော်ဝါရီ ၂၂ ရက်ထိ ပိတ်ထားပါတယ်။

ဗီယက်နမ် - တရုတ်နဲ့ နယ်စပ်ချင်းထိနေတဲ့ ဗီယက်နမ် နိုင်ငံမှာ မြို့တော် ဟနွိုင်းနားက လူထောင်ချီနေတဲ့ ရွာတွေက လူတချို့မှာ ကူးစက်မှုတွေ့လို့ သီးသန့်ခွဲထားရပါတယ်။ ဗီယက်နမ်မှာ ကူးစက်မှု ၁၆ ခုရှိနေပါပြီ။

မြောက်ကိုရီးယား - မြောက်ကိုရီးယားကို ချမှတ်ထားတဲ့ ပိတ်ဆို့မှုတွေ ဖြေလျှော့ပေးဖို့ ကြက်ခြေနီအဖွဲ့ကြီးက တောင်းဆိုလိုက်ပါတယ်။ မြောက်ကိုရီးယားအတွက် လိုအပ်တဲ့ ကျန်းမာရေး အသုံးအဆောင်တွေ ဝယ်ဖို့ ကျန်းမာရေး အဖွဲ့အစည်းတွေက ရံပုံငွေ အထောက်အပံ့တွေ ပံ့ပိုးပေးနိုင်ဖို့ဖြစ်ပါတယ်။ အဲဒီမှာ ကူးစက်မယ်ဆိုရင် ကူးစက်မှု စစ်ဆေးတဲ့ ပစ္စည်းတွေနဲ့ အကာအကွယ် ဝတ်စုံတွေ လိုအပ်လာမှာ ဖြစ်ပါတယ်။

ဆက်စပ် အကြောင်းအရာများ