ကိုရိုနာဗိုင်းရပ်စ် ကူးစက်သူ တရုတ်ခရီးသွား ပြင်သစ်မှာ သေဆုံး

ပြင်သစ်မှာ ကူးစက်ခံထားရသူ ၁၁ ဦးရှိပြီ ဓာတ်ပုံ မူပိုင် Getty Images
Image caption ပြင်သစ်မှာ ကူးစက်ခံထားရသူ ၁၁ ဦးရှိပြီ

ကိုရိုနာဗိုင်းရပ်စ်သစ် ကူးစက်ခံရသူ တရုတ်ခရီးသွားတစ်ဦး ပြင်သစ်နိုင်ငံမှာ သေဆုံးခဲ့လို့ အာရှပြင်ပမှာ ဒီဗိုင်းရပ်စ်ပိုးကြောင့် ပထမဆုံးသေဆုံးသူ ဖြစ်လာပါတယ်။

သေဆုံးခဲ့သူဟာ တရုတ်နိုင်ငံ ဟူဘေးပြည်နယ်က လာသူ အသက် ၈၀ အမျိုးသားဖြစ်တယ်လို့ ပြင်သစ် ကျန်းမာရေး ဝန်ကြီးက ပြောပါတယ်။

သူပြင်သစ်ကို ဇန်နဝါရီ ၁၆ မှာ ရောက်လာခဲ့ပြီး ပြင်သစ်က ဆေးရုံမှာ ဇန်နဝါရီ ၂၅ မှာ သီးသန့်ခွဲထားခဲ့တယ်လို့ ဝန်ကြီးက ပြောပါတယ်။

အခုသေဆုံးခဲ့သူ အမျိုးသားရဲ့ သမီးလည်း ကူးစက်ခံထားရပြီး သူကတော့ ပြန်ကျန်းမာလာမယ်လို့ ယူဆရပါတယ်။

အခု ပြင်သစ်က သေဆုံးသူမတိုင်ခင်က တရုတ်ပြည်မကြီး ပြင်ပမှာ သေဆုံးသူ သုံးယောက်ရှိခဲ့ပြီး ဟောင်ကောင်၊ ဖိလစ်ပိုင်နဲ့ ဂျပန်တို့မှာ ဖြစ်ပါတယ်။

တရုတ်မှာ ကူးစက်မှု ကာကွယ်ရေး ထပ်တင်းကြပ်

နှစ်သစ်ကူး ပိတ်ရက်အပြီး တရုတ်နိုင်ငံ မြို့တော် ဘေဂျင်းကို တခြားနေရာအသီးသီးက ပြန်လာကြတဲ့ မြို့ခံတွေအားလုံး ကိုယ့်အိမ်မှာကိုယ် ၁၄ ရက် သီးသန့်ခွဲနေမယ်လို့ ညွှန်ကြားလိုက်ပြီး မလိုက်နာသူတွေ အပြစ်ပေးခံရမယ်လို့ ပြောပါတယ်။

အဲဒါက အီဂျစ်မှာ ပထမဆုံး ကူးစက်ခံရသူတွေ့အပြီး အခုလို ပြောလိုက်တာပါ။ ဘေဂျင်းမှာ လူဦးရေ သန်း ၂၀ ကျော် ရှိပါတယ်။

ဒီဗိုင်းရပ်စ်ကြောင့် သေဆုံးသူ ၁၅၀၀ ကျော်ရှိပြီး အများစုက ရောဂါပိုး စပြန့်ခဲ့တဲ့ တရုတ် နိုင်ငံ ဟူဘေးပြည်နယ်မှာ ဖြစ်ပါတယ်။

တရုတ်မှာ ကူးစက်ခံရသူ ၂၆၄၁ ယောက် ထပ်တွေ့ခဲ့လို့ ရောဂါပိုးကူးစက်သူ ၆၆,၄၉၂ ယောက် ရှိလာပြီ ဖြစ်ပါတယ်။

တရုတ်ပြင်ပ

တရုတ်နိုင်ငံပြင်ပမှာတော့ ကူးစက်ခံရသူ ၅၀၀ ကျော်ရှိပြီး နိုင်ငံပေါင်း ၂၄ နိုင်ငံမှာ ကူးစက်ခံထားရပါတယ်။

ပြင်သစ် - ပြင်သစ်မှာတော့ ကူးစက်ခံရသူ ၁၁ ဦး ရှိတယ်လို့ အတည်ပြုထားပြီး ၆ ဦးက ဆေးရုံတက် ကုသနေရပါတယ်။

အမေရိကန်- ကိုရိုနာဗိုင်းရပ်စ် ကူးစက်မှုတွေ တွေ့ရှိလို့ ဂျပန်မှာ ကမ်းကပ်ထားတဲ့ Diamond Princess ခရီးသည် သင်္ဘောပေါ်က အမေရိကန်တွေကို သွားခေါ်မယ့် လေယာဉ်စေလွှွတ်မယ်လို့ ပြောပါတယ်။ ခရီးသည်တွေဟာ အခုချိန်မှာ သင်္ဘောပေါ်မှာ သီးသန့်ခွဲထားခံရပါတယ်။

ခရီးသည်နဲ့ ဝန်ထမ်း ၃၇၀၀ မှာ ၂၁၈ ယောက်မှာ ဗိုင်းရပ်စ် ကူးစက်ခံထားရပါတယ်။

သြစတြေးလျ - အဲဒီသင်္ဘောပေါ်မှာ ပိတ်မိသူတွေကို ကယ်ထုတ်ဖို့ စဉ်းစားမယ်လို့ သြစတြေးလျကလည်း ပြောပါတယ်။

အီဂျစ် - အီဂျစ်မှာ ပထမဆုံး ကူးစက်သူတွေ့တယ်လို့ အစိုးရက သောကြာနေ့က ထုတ်ပြောပါတယ်။ ကူးစက်ခံထားရသူက နိုင်ငံခြားသားလို့ပြောပြီး ဘယ်နိုင်ငံသားဆိုတာတော့ မသိရသေးပါဘူး။ အဲဒါဟာ အာဖရိကမှာ ပထမဆုံး ကိုရိုနာဗိုင်းရပ်စ်သစ် ကူးစက်ခံရတာ တွေ့ရှိမှု ဖြစ်ပါတယ်။

ဒါဟာ အရှေ့အလယ်ပိုင်းဒေသအနေနဲ့ဆိုရင်တော့ ယူအေအီးမှာ ကူးစက်မှု တွေ့ရှိအပြီး ဒုတိယမြောက် ကူးစက်မှု တွေ့ရတဲ့နိုင်ငံ ဖြစ်လာပါတယ်။