Covid-19 ကိုရိုနာ ဗိုင်းရပ်စ် ကူးစက် ခံထားရသူ တစ်သိန်း ရှိပြီလို့ WHO ပြောကြား

ဆေးဖြန်းနေစဉ်

ဓာတ်ပုံ ရင်းမြစ်, Getty Images

ဓာတ်ပုံ ပုံစာ,

အီရန် နိုင်ငံ က ရောဂါပိုး ကူးစက်မှုကို စိုးရိမ်နေရ

တကမ္ဘာလုံးမှာ နိုဗယ် ကိုရိုနာ ဗိုင်းရပ်စ် ကူးစက် ခံထား ရသူ တစ်သိန်း ရှိသွား ပြီလို့ ကမ္ဘာ့ကျန်းမာရေး အဖွဲ့ကြီး WHO က ပြောပါတယ်။

အခုလို လျင်လျင် မြန်မြန် ကူးစက် ခံနေရတာ ဟာ စိုးရိမ် စရာ ကောင်းတယ် လို့လည်း WHO အကြီး အကဲ ဒေါက်တာ တက်ဒရို့စ် ဂိုင်းဘရေးစီးယက်စ် က ဆိုပါတယ်။

ကိုရိုနာ ဗိုင်းရပ်စ် ကုသရေး မှာ မရှိမဖြစ် ဆေးဝါး ကိရိယာ တွေကို WHO က ထုတ်ပြန် ခဲ့ရာမှာ လူနာတွေ အတွက် အောက်ဆီဂျင် နဲ့ အောက်ဆီဂျင် ပေးစက် တွေဟာ မဖြစ်မနေ ဖြည့်ဆည်း ထား ရမယ့် ပစ္စည်း ဖြစ်တယ် လို့ နိုင်ငံ အသီးသီး က အစိုးရတွေကို WHO က ဆော်သြလိုက်ပါတယ်။

ကိုဗစ်ဒ် 19 ကူးစက် ခံထားရသူတွေကို ရှာဖွေပြီး ကုသမှု ပေးတာဟာ ရောဂါ ဖြစ်ပွား မှု ကို လျော့ချ ရာရောက်တယ်လို့လည်း WHO အဖွဲ့ အကြီးအကဲ က ပြောပါတယ်။

လောလောဆယ်မှာ ကိုရိုနာ ဗိုင်းရပ်စ် ကူးစက် ခံထားရသူ အရေအတွက် ဟာ တစ်သိန်း ပြည့်မြောက်ပြီး ဖြစ်ပါတယ်။

ဓာတ်ပုံ ရင်းမြစ်, Getty Images

ဓာတ်ပုံ ပုံစာ,

တောင်ကိုရီးယား နိုင်ငံ ဒေဂူး မြို့က မြင်ကွင်း

တရုတ် နိုင်ငံ ဟူဘေ ခရိုင်မှာ ဆိုရင်တော့ ပြည်တွင်းမှာ ကူးစက် ခံရသူ အရေအတွက် ကျဆင်း လာပြီး နိုင်ငံရပ်ခြား ကနေ ပြန်လာသူတွေ ထဲမှာ ကူးစက်မှုတွေ ရှိနေပါတယ်။

ဟူဘေ ခရိုင် အပြင်ဘက်မှာ ကြာသပတေးနေ့ က ဗိုင်းရပ်စ် ကူးစက် ခံရသူ ၁၇ ဦး ရှိရာမှာ ၁၆ ဦး က နိုင်ငံခြား ကနေ ကူးစက် ခံထားရသူတွေလို့ တာဝန်ရှိသူတွေက ပြောပါတယ်။

Skip ပေါ့ဒ်ကတ်စ် and continue reading
ပေါ့ဒ်ကတ်စ်
ဘီဘီစီမြန်မာပိုင်း ညနေခင်းသတင်းအစီအစဉ်

နောက်ဆုံးရ သတင်းနဲ့ မျက်မှောက်ရေးရာအစီအစဉ်များ

ပေါ့ဒ်ကတ်စ်အစီအစဉ်များ

End of ပေါ့ဒ်ကတ်စ်

သြစတြေးလျမှာ ဆိုရင် ၁၆ နှစ် အရွယ် လူငယ် တစ်ဦး ဗိုင်းရပ်စ် ကူးစက် ခံထား ရလို့ ကျောင်းတွေကို ပိတ်ဖို့ အစိုးရ က ညွှန်ကြားလိုက်ပါပြီ။

တောင်ကိုရီးယား နိုင်ငံမှာတော့ ဗိုင်းရပ်စ် ကူးစက် ခံထား ရသူ ၆၂၈၄ ဦး ရှိပြီး ၄၃ ဦး သေဆုံး ခဲ့ပါတယ်။

ဘူတန် နိုင်ငံမှာလည်း အမေရိကန် က လာရောက်တဲ့ အမျိုးသား တစ်ဦး မှာ ကိုရိုနာ ဗိုင်းရပ်စ် စစ်ဆေး တွေ့ ရှိခဲ့ရတဲ့ အတွက် ဗိုင်းရပ်စ် ကူးစက် ခံထားရတဲ့ နောက်ထပ် နိုင်ငံများ စာရင်းဝင်ခဲ့ပါတယ်။

နယူးဇီလန် နိုင်ငံမှာတော့ အသက် ၃၀ အရွယ် ဗိုင်းရပ်စ် ကူးစက် ခံထားရသူဟာ တေးဂီတ ဖျော်ဖြေပွဲ ကို သွားရောက် ခဲ့တယ်လို့ တာဝန်ရှိသူတွေက ပြောပါတယ်။ ဒါကြောင့် အဲဒီ တေးဂီတ ပွဲ သွားရောက် ခဲ့သူတွေ အနေနဲ့ ဗိုင်းရပ်စ် ရောဂါ လက္ခဏာတွေကို စောင့်ကြည့်ကြဖို့ ကျန်းမာရေး ဝန်ကြီး ဌာန က နှိုးဆော် ထားရပါတယ်။

ဗြိတိန် မှာတော့ ကိုရိုနာ ဗိုင်းရပ်စ် ကူးစက် ခံထားရတဲ့ ၁၆၃ ဉီး အထိ ရှိလာခဲ့ပြီး အသက် ၇၀ အရွယ် အမျိုးသမီး တစ်ဦး ကွယ်လွန် သွားတယ်လို့ အစိုးရ က သတင်းထုတ်ပြန် ထားပါတယ်။

ကုလသမဂ္ဂ အဖွဲ့ကြီး ရဲ့ သဘာဝ ပတ်ဝန်းကျင် ထိန်းသိမ်းရေး အဖွဲ့ကြီး အနေနဲ့ လည်း လူချင်း တွေ့ဆုံ ဆွေးနွေးတဲ့ အစည်းအဝေး တွေကို ဖျက်သိမ်း လိုက်ပြီး အွန်လိုင်း ကနေ တဆင့်ပဲ အစည်းအဝေးတွေ လုပ်တော့မယ်လို့ ကြေညာ ပါတယ်။

နောက်ပြီး ကိုရိုနာ ဗိုင်းရပ်စ် ကြောင့် ကမ္ဘာ့ တဝန်း က ကျောင်းသားပေါင်း သန်း ၂၉၀ ခန့်ဟာ ကျောင်းတွေ ပိတ်လိုက်ရလို့ ပညာသင်ကြားရေးမှာ အနှောက် အယှက် ဖြစ်ခဲ့တယ်လို့လည်း UN က စာရင်း ထုတ်ပြန် ထားပါတယ်။

ဗီဒီယို ပုံစာ,

ကိုရိုနာဗိုင်းရပ်စ်ကြောင့် သြစတြေးလျ တက္ကသိုလ်တွေ အခက်တွေ့