ကိုရိုနာဗိုင်းရပ်စ် ပြင်သစ် ရောက်တာ ထင်တာထက် ပိုစော

ပဲရစ်မြို့နားမှာ စမ်းသပ်တွေ့ခဲ့သူဟာ ဒီဇင်ဘာလ ထဲက ဗိုင်းရပ်စ် ကူးစက်ခံရ

ဓာတ်ပုံ ရင်းမြစ်, AFP

ဓာတ်ပုံ ပုံစာ,

ပဲရစ်မြို့နားမှာ စမ်းသပ်တွေ့ခဲ့သူဟာ ဒီဇင်ဘာလ ထဲက ဗိုင်းရပ်စ် ကူးစက်ခံရ

ပြင်သစ်နိုင်ငံကို ကိုရိုနာဗိုင်းရပ်စ် ရောက်တဲ့အချိန်ဟာ အရင်ကထင်ထားတဲ့အချိန်ထက် တစ်လနီးပါးပိုစောတယ်လို့ ဆရာဝန်တစ်ဦးက ပြောပါတယ်။

အဆုတ်အအေးမိရောဂါ ဖြစ်နေတယ် ဆိုပြီး ဒီဇင်ဘာလ ၂၇ ရက်နေ့က ပဲရစ်မြို့နားမှာ စမ်းသပ်တွေ့ခဲ့သူ လူနာဟာ တကယ်တမ်း ကိုရိုနာဗိုင်းရပ်စ်ရောဂါ ဖြစ်နေတာလို့ သူ့ရဲ့ဆရာဝန်ကပြောပါတယ်။

ဒါကိုကြည့်ခြင်းအားဖြင့် ကနဦး ထင်ထားတာထက် တစ်လနီးပါးစောပြီး ဥရောပဒေသကို ဗိုင်းရပ်စ် ရောက်လာနိုင်ဖွယ် ရှိပါတယ်။

အဲဒီအချိန်က လူနာဆီက ယူခဲ့တဲ့ တို့ဖတ်နမူနာကို အခု ပြန်စစ်ဆေးကြည့်တဲ့အခါ ကိုဗစ်၁၉ ရောဂါ ရှိနေတယ်ဆိုတာ အတည်ပြုတွေ့ခဲ့ရတယ်လို့ ဒေါက်တာ အိဗ် ကိုဟန် က ပြင်သစ်သတင်းမီဒီယာကိုပြောပါတယ်။

ဓာတ်ပုံ ရင်းမြစ်, AFP

ဓာတ်ပုံ ပုံစာ,

အဲဒီလူနာဟာ ပဲရစ်မြို့ အရှေ့မြောက်ပိုင်း ဘော့ဘီးညီးမြို့က ဖြစ်

လူနာကတော့ နေမကောင်းဖြစ်အပြီး အဲဒီအချိန်ကတည်းက အပြည့်အဝ ပြန်ကျန်းမာလာခဲ့ပြီး ရောဂါဖြစ်တဲ့နေရာ တစ်နေရာကိုမှ သူမသွားခဲ့တဲ့အတွက် ဘယ်ကနေ ရောဂါပိုး ကူးခဲ့သလဲဆိုတာ လုံးဝမသိဘူးလို့ ဆိုပါတယ်။

ဗိုင်းရပ်စ်ပိုး ဘယ်လို ကူးစက်ပြန့်ပွားလာသလဲဆိုတာ နားလည်သဘောပေါက်နိုင်ဖို့အတွက် ရောဂါပိုးပထမဆုံးကူးစက်ခဲ့သူ ဘယ်သူလဲဆိုတာကို သိဖို့ လိုပါတယ်။

ဒီလူနာအကြောင်း ဘယ်လောက် သိရသလဲ

အဲဒီလူနာဟာ ပဲရစ်မြို့ အရှေ့မြောက်ပိုင်း ဘော့ဘီးညီးမြို့က အသက် ၄၃ နှစ်အရွယ် ပြင်သစ်အမျိုးသားတစ်ဦး ဖြစ်တယ်လို့ ပဲရစ်မြို့နားက Avicenne ဆေးရုံနဲ့ Jean-Verdier ဆေးရုံရဲ့ အရေးပေါ်ဆေးဝါးဌာန အကြီးအကဲ ဒေါက်တာကိုဟန် ကပြောပါတယ်။

Skip ပေါ့ဒ်ကတ်စ် and continue reading
ပေါ့ဒ်ကတ်စ်
ဘီဘီစီမြန်မာပိုင်း ညနေခင်းသတင်းအစီအစဉ်

နောက်ဆုံးရ သတင်းနဲ့ မျက်မှောက်ရေးရာအစီအစဉ်များ

ပေါ့ဒ်ကတ်စ်အစီအစဉ်များ

End of ပေါ့ဒ်ကတ်စ်

ကိုရိုနာဗိုင်းရပ်စ်ရဲ့အဓိကလက္ခဏာတွေ အဖြစ် အခုအခါ သိထားကြတဲ့ ချောင်းခြောက်ဆိုးတာ၊ အဖျားရှိတာ၊ အသက်ရှူကြပ်တာ စတဲ့ ရောဂါလက္ခဏာတွေ အဲဒီတုန်းက သူ့မှာ ပြခဲ့ပါတယ်။

ဒီဇင်ဘာလ ၂၇ ရက်နေ့မှာ သူ ဆေးရုံရောက်လာပါတယ်။ အဲဒီအချိန်ဟာ တရုတ်နိုင်ငံ ဝူဟန်မြို့မှာ အရင်ကမသိခဲ့ဖူးတဲ့ အဆုတ်အအေးမိရောဂါ အမျိုးအစားသစ် ကူးစက်ဖြစ်ပွားနေကြောင်း တရုတ်နိုင်ငံမှာရှိတဲ့ ကမ္ဘာ့ကျန်းမာရေးအဖွဲ့ရဲ့ ဌာနေရုံးကို အကြောင်းမကြားခင် ၄ ရက်အလို ဖြစ်ပါတယ်။

အဲဒီလူနာက သူ နေမကောင်းမဖြစ်ခင်မှာ ဘယ်ကိုမှ ခရီးမထွက်ခဲ့ဘူးလို့ ပြင်သစ် BFMTV ရုပ်မြင်သံကြားဌာနကို ပြောပြပါတယ်။

အဲဒီလူနာရဲ့ကလေးတွေထဲက နှစ်ဦး နေမကောင်းဖြစ်ခဲ့ပေမဲ့ ဇနီးသည်ကတော့ ဘာရောဂါလက္ခဏာမှမပြခဲ့ဘူးလို့ ဒေါက်တာ ကိုဟန် က ပြောပါတယ်။ ဒါပေမဲ့ ဇနီးသည်ဟာ ရှားလ် ဒီဂေါလ် လေဆိပ်နားကစူပါမားကက်တစ်ခုမှာ အလုပ်လုပ်တဲ့အတွက် တရုတ်နိုင်ငံကနေ ရောက်လာတဲ့ သူတွေနဲ့ ထိတွေ့ဆက်ဆံခဲ့ဖွယ် ရှိတယ်လို့ ဒေါက်တာကိုဟန် က ပြောပါတယ်။

"တစ်ခါတစ်လေ လက်ဆွဲသေတ္တာတွေနဲ့ လေဆိပ်ကနေ တန်းလာပြီး ဆိုင်မှာ ဈေးလာဝယ်သူတွေ ရှိတယ်"လို့ လူနာရဲ့ ဇနီးက ပြောပြပါတယ်။

လူနာရဲ့ဇနီးဟာ ရောဂါလက္ခဏာ မပြခဲ့တာများလားဆိုတာ သူတို့ တွေးမိတယ်လို့ ဒေါက်တာကိုဟန်ကပြောပါတယ်။

ဆက်နွယ်နိုင်ဖွယ် ရှိတာတွေကို နောက်ထပ် စုံစမ်းစစ်ဆေးဖို့ သူက တိုက်တွန်းလိုက်ပါတယ်။

ဓာတ်ပုံ ရင်းမြစ်, AFP

ဓာတ်ပုံ ပုံစာ,

ပဲရစ်မြို့က ကိုဗစ် ၁၉ ရောဂါ ကုသရေး ဆရာဝန်တွေ

ဒီကိစ္စက ဘာ့ကြောင့်အရေးပါသလဲ

ပြင်သစ်နိုင်ငံမှာ ပထမဆုံး ကိုရိုနာဗိုင်းရပ်စ် ကူးစက် ဖြစ်ပွားသူ ၃ ဦးကို ဇန်နဝါရီလ ၂၄ ရက်နေ့မှာ စစ်ဆေးအတည်ပြု တွေ့ခဲ့တာလို့ ခုချိန်ထိ သိထားတာပါ။

အဲဒီထဲက နှစ်ဦးဟာ ရောဂါ ပထမဆုံး စဖြစ်ခဲ့တဲ့ ဝူဟန်မြို့ကို သွားခဲ့သူတွေ ဖြစ်ပြီး ကျန်တဲ့တစ်ဦးကတော့ မိသားစုအရင်းအချာ တစ်ယောက် ဖြစ်ပါတယ်။

အခုလူနာမှာ ကိုရိုနာဗိုင်းရပ်စ်ရောဂါပိုးရှိခဲ့တယ်ဆိုတာ အတည်ပြုတွေ့ရတာဟာ ပြင်သစ်နိုင်ငံမှာ ဟိုးအစောပိုင်းကတည်းကိုက ဗိုင်းရပ်စ်ပိုးရောက်နေတဲ့ သဘောဖြစ်ပီး ရောဂါပိုး ပျံ့နှံရောက်လာပုံနဲ့ပတ်သက်လို့ အရင်က နားလည်ထားမှုကို ပြောင်းလဲသွားစေမှာ ဖြစ်ပါတယ်။

ဥရောပဒေသတွင်း ကိုရိုနာဗိုင်းရပ်စ် ပထမဆုံး လူလူချင်းကူးစက်မှုဟာ ဂျာမနီ နိုင်ငံမှာ ဖြစ်ပြီးဇန်နဝါရီလ ၂၉ ရက်နဲ့ ၂၂ ရက်အကြား ဂျာမနီနိုင်ငံကို လာလည်ခဲ့သူ တရုတ် လုပ်ဖော်ကိုင်ဖက် တစ်ဦးဆီကနေ ဂျာမန် အမျိုးသားတစ်ဦးကို ကူးခဲ့တာလို့ ယူဆထားတာပါ။

အမေရိကန်နိုင်ငံမှာလည်း ဖလော်ရီဒါပြည်နယ်မှာ သေဆုံးသူတစ်ဦးရဲ့ အလောင်းကို ရင်ခွဲစစ်ဆေးခဲ့မှုအရ ကိုရိုနာဗိုင်းရပ်စ်ကြောင့် အမေရိကန်မှာ လူသေဆုံးမှုဟာ ကနဦးထင်ထားတာထက် တစ်လနီးပါးမတိုင်ခင်ကတည်းက ရှိနေတာကို တွေ့ခဲ့ရပါတယ်။

ဒီကိစ္စကို ဘယ်လို ထုတ်ဖော်တွေ့ခဲ့တာလဲ

ဒေါက်တာ ကိုဟန် က ဒီဇင်ဘာလနဲ့ ဇန်နဝါရီလအကြား တုပ်ကွေးနဲ့ ဆင်တူတဲ့ ရောဂါလက္ခဏာတွေနဲ့ဆေးရုံရောက်လာတဲ့လူနာတွေရဲ့ ဖိုင်တွဲတွေကို အခုရက်ပိုင်းအတွင်း သူလှန်လှော ကြည့်ခဲ့တယ်လို့BFMTV ရုပ်မြင်သံကြားဌာနကို ပြောပြပါတယ်။

စုစုပေါင်း လူနာ ၁၄ ဦးရဲ့ တို့ဖတ်နမူနာတွေကို သူစစ်ဆေးစမ်းသပ်ခဲ့တယ်လို့ ဆိုပါတယ်။

"ကိုရိုနာဗိုင်းရပ်စ်ကို ခြေရာခံဖို့အတွက် အဲဒီအချိန်လောက်က တခြားရောဂါဖြစ်ခဲ့သူတွေမှာ စမ်းသပ်ခဲ့တဲ့ နှာခေါင်းတို့ဖတ်စတွေကို ကျွန်တော်တို့ ပြန်စစ်ဆေးခဲ့ပါတယ်"

"လူနာ ၁၄ ယောက်ထဲက တစ်ယောက်မှာ ကိုရိုနာဗိုင်းရပ်စ်ပိုး ရှိခဲ့တယ်ဆိုတာကို အတည်ပြု တွေ့ခဲ့ရပါတယ်၊ အမှားမရှိအောင် နောက်ထပ် နှစ်ခါထပ်စစ်ခဲ့ပါတယ်၊ နှစ်ခါစလုံး အတည်ပြု နိုင်ခဲ့ပါတယ်"

ပြင်သစ်နိုင်ငံရဲ့ ARS ကျန်းမာရေးဌာနကို သူအကြောင်းကြားထားပြီး တခြားဆေးရုံတွေမှာလည်း ကိုဗစ်၁၉ ရောဂါအတွက် တို့ဖတ်စတွေ ပြန်စစ်ဆေးကြဖို့ကိုလည်း တခြားရောဂါပိုးပညာရှင်တွေကို တိုက်တွန်းထားတယ်လို့ ဒေါက်တာ ကိုဟန် ပြောပါတယ်။

ဒီကိစ္စနဲ့ပတ်သက်တဲ့ အစီရင်ခံစာ အပြည့်အစုံ အခုသီတင်းပတ်ကုန်မှာ ထွက်လာဖို့ရှိပြီး နိုင်ငံတကာ Antimicrobial Agents ဂျာနယ်ကနေ ထုတ်ပြန်မှာဖြစ်တယ်လို့ သူက ပြောပါတယ်။