အမေရိကန်ရဲတွေ လူသတ်ရင် ဘာလို့ပြစ်ဒဏ်ချခံရမှု နည်းတာလဲ

အမေရိကန်နိုင်ငံက ရဲတွေရဲ့ သတ်ဖြတ်မှု ၉၉%လောက်မှာ ကျူးလွန်တဲ့ ရဲတွေကို ဘယ်အမှုနဲ့မှ စွဲချက်တင်ခံရတာ မရှိခဲ့

ဓာတ်ပုံ ရင်းမြစ်, EPA

ဓာတ်ပုံ ပုံစာ,

အမေရိကန်နိုင်ငံက ရဲတွေရဲ့ သတ်ဖြတ်မှု ၉၉%လောက်မှာ ကျူးလွန်တဲ့ ရဲတွေကို ဘယ်အမှုနဲ့မှ စွဲချက်တင်ခံရတာ မရှိခဲ့

ရေးသားသူ - ပါဘလို အူချိုဝါ

အမေရိကန်နိုင်ငံက ရဲတွေဟာ တနှစ်ကို သတ်ဖြတ်မှု ၁၂၀ဝ ပတ်ဝန်းကျင်လောက် ကျူးလွန်တယ်လို့ ခန့်မှန်းလေ့လာချက်တွေ ရှိထားပေမယ့် ဒီအမှုတွေရဲ့ ၉၉%လောက်မှာ ကျူးလွန်တဲ့ ရဲတွေကို ဘယ်အမှုနဲ့မှ စွဲချက်တင်ခံရတာ မရှိခဲ့ပါဘူး။

လတ်တလော ဂျော့ဖလွိုက်ကို ရဲတွေက သတ်ဖြတ်မှုမှာတော့ အများပြည်သူတွေရဲ့ ဖိအားပေးမှု၊ ဆန္ဒပြမှုနဲ့ အဓိကရုဏ်းတွေ ဖြစ်လာတာနဲ့အတူ ကျူးလွန်တဲ့ ရဲတွေကို တရားဝင်စွဲချက်တင်တာလည်း ရှိလာခဲ့ပါတယ်။

အဲဒီ စွဲချက်တင်ခံထားရတဲ့ အထဲက ရဲတဦးဟာ ပြီးခဲ့တဲ့ မေလ ၂၅ ရက်နေ့က မင်နီယားပိုလိစ်မြို့က လမ်းပေါ်မှာ မှောက်လျက် အနေအထားရှိနေတဲ့ ဂျော့ဖလွိုက်ရဲ့ ဇက်ကို ဒူးနဲ့နင်းထားလို့ သေဆုံးစေခဲ့တဲ့အတွက် လူသတ်မှုနဲ့ စွဲချက်တင်ခံထားရပါတယ်။

အခုလို ဖြစ်ချိန်မှာ အနီးနားမှာ ရှိနေကြတဲ့ ရဲသုံးဦးလည်း ဒီလူသတ်မှုကို ကူညီ အားပေးရာရောက်တဲ့ ပြစ်မှုနဲ့ စွဲချက်တင် ခံထားရပါတယ်။

ဒီလေးယောက်စလုံးဟာ မေလ ၈ ရက်နေ့မှာ တရားရုံးမှာ အမှုရင်ဆိုင်ရမှာ ဖြစ်ပါတယ်။

ဂျော့ဖလွိုက်သေဆုံးမှုနဲ့ ပတ်သက်ပြီး ဆန္ဒပြနေကြသူတွေကတော့ ဒီသေဆုံးမှုကြောင့် တာဝန်ချိန်မှာ သတ်ဖြတ်တဲ့ ရဲတွေကို ဥပဒေရဲ့ သက်ရောက်မှု ကြီးကြီးမားမား အပြောင်းအလဲ ဖြစ်မယ်လို့ မျှော်လင့်နေကြပါတယ်။

ဘာဖြစ်လို့လည်း ဆိုတော့ အခုလို ရဲတွေ တရားဝင်စွဲချက်တင်ခံရတာကိုက ရှိနေတဲ့ ဥပဒေရဲ့ ချွင်းချက်ဖြစ်စဉ် ဖြစ်နေလို့ ဖြစ်ပါတယ်။

တာဝန်ချိန်မှာ လူသတ်မှု ကျူးလွန်တဲ့ အမေရိကန်ရဲအများစုကြီးဟာ အမေရိကန်ဥပဒေရဲ့ အကာအကွယ်ပေးမှုကြောင့် ပြစ်ဒဏ်ချခံရဖို့ ဝေးလို့ တရားဝင်စွဲချက်တင်တာတောင် မခံခဲ့ရပါဘူး။

ဓာတ်ပုံ ရင်းမြစ်, Getty Images

ဓာတ်ပုံ ပုံစာ,

၂၀၁၃-၁၉ အတွင်း ဂျော့ဖလွိုက်ကို သတ်ဖြတ်မှုလို ၇၆၆၆မှု ထဲက ၉၉ မှုမှာသာ ရဲတွေ စွဲချက်တင်ခံရပြီး ဒီအထဲကမှ ၂၅ မှုမှာပဲ ပြစ်ဒဏ်ချခံရမှု ရှိခဲ့

စွဲချက်တင်မခံရပဲ အကာအကွယ် ရနေခြင်း

ရဲများ အကြမ်းဖက်မှု ခြေရာကောက်ခြင်းဆိုတဲ့ စီမံချက်က အမေရိကန်နိုင်ငံအတွင်း ၂၀၁၃ ခုနှစ်ကနေ ၂၀၁၉ အထိ ရဲတွေရဲ့ လူသတ်မှုကျူးလွန်ခြင်းကို မှတ်တမ်းတင်ခဲ့ရာမှာ စုစုပေါင်း ၇၆၆၆မှု ထဲက ၉၂%က ဂျော့ဖလွိုက်ကို သတ်ဖြတ်မှုလို မတရားသတ်ဖြတ်ခြင်း ခံရတာဖြစ်တယ်လို့ တက်ကြွလှုပ်ရှားသူတွေက ပြောပါတယ်။

အဲဒီအထဲက ၁.၂% သာဖြစ်တဲ့ ၉၉ မှုမှာသာ ရဲတွေ စွဲချက်တင်ခံရပြီး ဒီအထဲကမှ ၂၅ မှုမှာပဲ ပြစ်ဒဏ်ချခံရမှု ရှိခဲ့တယ်လို့ ဆိုပါတယ်။

အမေရိကန်နိုင်ငံ ဝါရှင်တန်မြို့က ရာဇဝတ်ရေး တရားမျှတမှုဆိုင်ရာ ကာတိုအဖွဲ့ရဲ့ ဒုဥက္ကဌ ကလာ့ခ် နီးလ်လီ ကလည်း အခု ဂျော့ဖလွိုက်အမှုမှာလို အစိုးရရှေ့နေတွေက ရဲတွေကို စွဲချက်တင်တယ်ဆိုတာ တော်တော် ရှားပါးတဲ့ ဖြစ်စဉ်ဖြစ်တယ်လို့ ဘီဘီစီကို ပြောပါတယ်။

အစိုးရရှေ့နေတွေအနေနဲ့ ဒီလို အမှုတွေကို စစ်ဆေးရာမှာ ရဲတွေနဲ့ ပူးပေါင်း လုပ်ဆောင်ရပြီး အမှုမှန်ပေါ်ဖို့နဲ့ ရုံးတင်စစ်ဆေးခြင်း ကိစ္စတွေမှာလည်း ရဲတွေကို မှီခိုရတယ်လို့ သူက ပြောပါတယ်။

တဖက်မှာလည်း ရဲတွေဘက်က ရာဇဝတ်မှုမြောက်ခြင်းမရှိပဲ သေစေနိုင်တဲ့ အင်အားသုံးခွင့် ရှိနေပါတယ်။

ဗီဒီယို ပုံစာ,

အမေရိကန် မင်နီယာပိုလစ်မြို့က အဓိကရုဏ်း

အသတ်ခံရသူတွေအနေနဲ့ ရဲတွေကို တရားရုံးမှာ နစ်နာမှုနဲ့သာ တရားစွဲစရာ အကြောင်းရှိတယ်လို့လည်း သူက ပြောပါတယ်။

ဒါပေမယ့် တရားရုံးတွေဘက်က ဒီလိုသာ တရားစွဲစရာကျန်တဲ့ အခြေအနေကိုပါ ‘အကျုံးဝင်တဲ့ လွတ်ငြိမ်းခွင့်’ ဆိုတဲ့ ဥပဒေကျင့်ထုံးသုံးပြီး ပုံမှန် ပိတ်ပင်လေ့ရှိတယ်လို့ နီးလ်လီက ပြောပါတယ်။

ဒီဥပဒေကျင့်ထုံးအရ အသတ်ခံရသူကို အကာအကွယ်ပေးနိုင်တဲ့ အခွင့်အရေးတွေကို ရှင်းရှင်းလင်းလင်း မတည်ဆောက်ပြနိုင်ရင် ရဲတွေဘက်က အသတ်ခံရသူရဲ့ အခွင့်အရေးကို ချိုးဖောက်တယ် ဆိုရင်တောင် တရားစွဲမခံရဖို့ အကာအကွယ်ပေးနေတာ ဖြစ်ပါတယ်။

ဒါပေမဲ့ ဘယ်လို အခြေအနေမျိုးကို ဥပဒေစီရင်ထုံးအဖြစ် သတ်မှတ်တယ် ဆိုတဲ့ ကန့်သတ်ချက်က အများပြည်သူ့အကျိုးဆောင် ဝန်ထမ်းကို နစ်နာမှုနဲ့ တရားစွဲဖို့ မဖြစ်နိုင်သလောက် ဖြစ်အောင် လုပ်ထားတယ်လို့ နီးလ်လီက ဆိုပါတယ်။

ဓာတ်ပုံ ရင်းမြစ်, Getty Images

ဓာတ်ပုံ ပုံစာ,

ဘယ်လို အခြေအနေမျိုးတွေမှာ တရားရုံးက ရဲတွေကို လွတ်လပ်စွာ ချိုးဖောက်ခွင့် ပေးနေသလဲဆိုတာ အံ့အားသင့်စရာ ဖြစ်နေ

Skip ပေါ့ဒ်ကတ်စ် and continue reading
ပေါ့ဒ်ကတ်စ်
ဘီဘီစီမြန်မာပိုင်း ညနေခင်းသတင်းအစီအစဉ်

နောက်ဆုံးရ သတင်းနဲ့ မျက်မှောက်ရေးရာအစီအစဉ်များ

ပေါ့ဒ်ကတ်စ်အစီအစဉ်များ

End of ပေါ့ဒ်ကတ်စ်

လွတ်လပ်စွာ ချိုးဖောက်ဖို့ အခွင့်အရေးရနေခြင်း

၂၀၁၄ ခုနှစ်မှာ အေမီ ကောဘစ်ဆိုတဲ့ အမျိုးသမီးဟာ သူ့အိမ်နောက်ဖေးကို ဝင်လာသူနဲ့ လိုက်ဖမ်းတဲ့ရဲတို့ရဲ့ ပဋိပက္ခအကြားမှာ မထင်မှတ်ပဲ ဓားစာခံ ဖြစ်ခဲ့ရပါတယ်။

လက်နက်ကိုင်ရဲတွေ သူ့အိမ်နောက်ဖေးကို ရုတ်တရက် ဝင်လာချိန်မှာ သူ့ရဲ့ သားသမီးတွေက အဲဒီမှာ ဆော့ကစားနေကြတာ ဖြစ်ပြီး ရဲတွေက အားလုံးဝပ်နေကြဖို့ အမိန့်ပေးခဲ့ပါတယ်။

အဲဒီအချိန်မှာ အေမီရဲ့ ခွေးဖြစ်သူ ဘရုစ် ရောက်လာခဲ့ပြီး ရဲတွေကို ရန်ပြုမယ့် ပုံစံ မပြပါဘဲလျက် ရဲတယောက်က သတိမပေးပဲ သေနတ်နဲ့ နှစ်ချက်ဆင့် ပစ်ခဲ့ပါတယ်။

အဲဒီ ကျည်ဆံတွေက ခွေးကို မထိခဲ့ပေမယ့် ကျည်ဆံတခုက တပေခွဲလောက် အထိ နီးနီးကပ်ကပ် နေရာမှာ ရဲတွေ အမိန့်ပေးချက်အတိုင်း လှဲလျောင်း ဝပ်တွားနေတဲ့ အေမီရဲ့ ၁၀ နှစ်အရွယ်သားဖြစ်သူ ဒါကိုတာကို ထိသွားခဲ့တယ်လို့ တရားရုံး မှတ်တမ်းတွေမှာ ဖော်ပြထားပါတယ်။

အခုလို ထိသွားတဲ့ ကလေးငယ် အသက်မသေခဲ့ပေမဲ့ ခြေထောက်မှာ ဆိုးဆိုးဝါးဝါး ဒဏ်ရာ ရတာနဲ့အတူ စိတ်ဒဏ်ရာလည်း ရသွားခဲ့ပါတယ်။

ဒီအမှုမှာ ရဲအရာရှိတွေကို တရားစွဲတဲ့ အေမီရဲ့ လျှောက်လဲချက်ကို တရားရုံးက ပယ်ချခဲ့ပြီး “ရဲတွေ အဲဒီလူကို ဖမ်းဆီးဖို့ ကြိုးစားချိန်မှာ မတော်တဆ အင်အားသုံးမှုကနေ အေမီတို့ မိသားစုက လွတ်မြောက်ခွင့် ရှင်းရှင်းလင်းလင်း မတည်ဆောက်နိုင်ဘူး” ဆိုပြီး အကြောင်းပြခဲ့ပါတယ်။

နောက်ထပ် လူသိများ ထင်ရှားတဲ့ အမှုကတော့ ကိုယ်ဝန် ၈ လ ရှိနေတဲ့ကြားက ၁၁ နှစ် အရွယ် သားဖြစ်သူ ရှေ့မှောက်မှာပဲ ရဲတွေရဲ့ လျှပ်စစ်သေနတ်နဲ့ သုံးကြိမ် အပစ်ခံရ၊ ကားပေါ်က ဆွဲချခံရပြီး လမ်းပေါ်မှာ မျက်နှာအပ်ပြီး လက်ထိပ်ခတ် ခံခဲ့ရတဲ့ မလိုင်ကာ ဘရွတ်က်စ် ရဲ့ အမှု ဖြစ်ပါတယ်။

သူဟာ တနာရီ မိုင် ၂၀ သာ ကားမောင်းရမယ့် နယ်မြေထဲမှာ ၃၂ မိုင် မောင်းမိတဲ့အတွက် ရဲက ရပ်တန့်စေခဲ့ပြီး အဲဒီ အချိန်မှာ ကားအမြန်မောင်းမိကြောင်း လက်မှတ်ထိုးဖို့ ငြင်းဆန် အပြီး အခုလို အလုပ်ခံခဲ့ရတာ ဖြစ်ပါတယ်။

အပြစ်ရှိကြောင်း ဝန်ခံရမှာ ကြောက်တဲ့အတွက် အခုလို ငြင်းခဲ့တာလို့ မလိုင်ကာ ဘရွတ်က်စ်က ပြောဆိုခဲ့ပါတယ်။

သူ့ရဲ့ ရဲတွေကို တရားစွဲဆိုမှုကိုလည်း “လျှပ်စစ်သေနတ်ကို ဘယ်လို အသုံးရမယ်” ဆိုတဲ့ ရှင်းလင်းတဲ့ အခွင့်အရေး တည်ဆောက်ထားတာ မရှိတဲ့အတွက် ဆိုပြီး တရားရုံးက ပယ်ချခဲ့ပါတယ်။

နောက် ၁၀ နှစ် အထိ အကြာမှ ရဲတွေနဲ့ တရားရုံးပြင်ပ ညှိနှိုင်းမှု အရ မလိုင်ကာ ဘရွတ်က်စ် က အမေရိကန်ဒေါ်လာ လေးသောင်းခွဲ နစ်နာကြေး ရရှိခဲ့ပါတယ်။

ဘယ်လို အခြေအနေမျိုးတွေမှာ တရားရုံးက ရဲတွေကို လွတ်လပ်စွာ ချိုးဖောက်ခွင့် ပေးနေသလဲဆိုတာ လေ့လာကြည့်မယ်ဆိုရင် လုံးဝ အံ့အားသင့်ပြီး ပါးစပ်အဟောင်းသား ဖြစ်စရာပါပဲ၊ တရားဥပဒေ စိုမိုးရေးအပိုင်း ကိုယ်တိုင်က လုံးဝနီးပါး တာဝန်ယူ၊ တာဝန်ခံမှု မရှိဘူးလို့ပဲ ဆိုရမှာပါလို့ နီးလ်လီက ပြောပါတယ်။

ဓာတ်ပုံ ရင်းမြစ်, Getty Images

ဓာတ်ပုံ ပုံစာ,

ဒီလိုသတ်ဖြတ်မှုဟာ ဖွဲ့စည်းပုံ အခြေခံ ဥပဒေနဲ့ မညီဘူးလို့ ဆုံးဖြတ်ထားတဲ့ စီရင်ထုံးမျိုး ဂျော့ဖလွိုက်မိသားစုက ရှာမတွေ့ဘူးဆိုရင် တရားစွဲလို့တောင် မရတဲ့ အခြေအနေဖြစ်သွားနိုင် )

ဖလွိုက်အတွက် တရားမျှတမှု ရရေး

အကျုံးဝင်တဲ့ လွတ်ငြိမ်းခွင့် ဥပဒေကျင့်ထုံးကြောင့် ဖလွိုက်ရဲ့ မိသားစုက တရားမျှတမှု ရဖို့ ခဲယဉ်းနိုင်တယ်လို့လည်း နီးလ်လီက ပြောပါတယ်။

တစုံတဦးရဲ့ လည်ပင်းရိုးကို ကိုးမိနစ်ကြာအောင် ဖိထားပြီး အလျှော့ပေးပါ ဆိုပြီး လက်နဲ့ ပုတ်ပြတဲ့ အထိ၊ နောက်ဆုံး သေဆုံးစေတဲ့အထိ ဖြစ်စေတာဟာ ဖွဲ့စည်းပုံ အခြေခံ ဥပဒေနဲ့ မညီဘူးလို့ ဆုံးဖြတ်ထားတဲ့ စီရင်ထုံးမျိုး သူတို့ မိသားစုက ရှာမတွေ့ဘူးဆိုရင် အကျုံးဝင်တဲ့ လွတ်ငြိမ်းခွင့် ဥပဒေကျင့်ထုံးကြောင့် အရင်စီရင်ထုံး မရှိတဲ့အတွက် တရားစွဲလို့တောင် မရပါဘူး ဆိုတဲ့ အခြေအနေ ဖြစ်သွားမယ်လို့ လည်း သူက ဆိုပါတယ်။

အမေရိကန်နိုင်ငံလုံးဆိုင်ရာ ရဲအရာရှိများ အစည်းအရုံးကို လက်ရှိ သတင်းဆောင်းပါး မဖော်ပြခင်မှာ ဘီဘီစီက အကြိမ်ကြိမ် ဆက်သွယ်ဖို့ ကြိုးစားခဲ့ပေမယ့် အကြောင်းမပြန်ခဲ့ပါဘူး။

ဒီအစည်းအရုံးရဲ့ ဥက္ကဌဖြစ်သူ မိုက်ကယ် မက်ဟေးကတော့ ဂျော့ဖလွိုက် ကြုံခဲ့ရတာဟာ တော်တော် ဆိုးရွားပြီး ကျူးလွန်သူ ရဲအရာရှိတွေဘက်က ဥပဒေအရရော၊ ကိုယ့်ကိုယ်ကိုယ် ကာကွယ်ခွင့်အရရော၊ လူ့စာရိတ္တ အရပါ ခုခံ ကာကွယ်ပေးလို့ ရတဲ့ အကြောင်းရင်းခံမရှိပါဘူးလို့ အစောပိုင်းမှာ ပြောဆိုထားပါတယ်။

သူ့လိုပဲ မြင်တဲ့ နိုင်ငံရေးသမားတွေလည်း ရှိနေပြီး မက်ဆာချူးဆက်ပြည်နယ်က အမတ်တဦးဖြစ်သူ အိုင်ယန်းနား ပရက်စလေက ပြီးခဲ့တဲ့ မေလ ၂၉ ရက်နေ့ လွှတ်တော်မှာ တင်သွင်းတဲ့ ရဲတွေရဲ့ ရက်စက်မှုကို ရှုတ်ချမှု အဆို မတင်သွင်းခင်မှာ အခုလို တွစ်တာမှာ ပြောဆိုခဲ့ပါတယ်။

“လူမည်း၊ လူညိုတွေ မို့လို့ ရဲတွေက တမင် ရွေးချယ် စစ်မေးမှုခံရ၊ စောင့်ကြည့် ထိန်းချုပ်ခံရ၊ အသက်မရှူနိုင်တဲ့အထိ ချုပ်နှောင်ခံရ၊ ရက်စက်စွာ ဝိုင်းဝန်း သတ်ဖြတ် ခံရတာတွေ တော်တော်ကြာနေပြီ ဖြစ်တဲ့အတွက် ဒီလို လူ့အသက်သေစေတဲ့ တရားမမျှတမှုတွေကို မစစ်ဆေး မခံရပဲ ဖြစ်နေတာကို ခွင့်မပြုသင့်တော့ ပါဘူး” ဆိုပြီး အိုင်ယန်းနား ပရက်စလေက ပြောဆိုခဲ့တာ ဖြစ်ပါတယ်။

ဗီဒီယို ပုံစာ,

အမေရိကန်မှာ ရဲနဲ့ ဆန္ဒပြသူတွေ ထိပ်တိုက်တွေ့

အများပြည်သူရဲ့ ဖိအားက အာဏာပိုင်တွေဘက်က ဖလွိုက်အမှု ကိုင်တွယ်ပုံကို သက်ရောက်မှုရှိတယ် ဆိုပေမယ့် ဒီထက် နက်ရှိုင်းတဲ့ ပြုပြင်ပြောင်းလဲမှုတွေ လုပ်ဖို့လည်း လိုနေပါသေးတယ်။

ကျွမ်းကျင်သူတွေနဲ့တကွ စာနယ်ဇင်းဖော်ပြချက်တွေကတော့ တရားရုံးချုပ် ကိုယ်တိုင်က အကျုံးဝင်တဲ့ လွတ်ငြိမ်းခွင့် ဆိုတဲ့ ဥပဒေကျင့်ထုံးအား နားလည်သဘောပေါက်ထားပုံကို ပြန်လည် သုံးသပ်နိုင်တယ်လို့ ပြောဆိုနေကြပါတယ်။

တက်ကြွလှုပ်ရှားသူတွေကလည်း ရဲတွေက လူတိုင်းကို အပြည့်အဝ သတိထား စောင့်ရှောက်ခြင်း ဆိုင်ရာ အက်ဥပဒေ ပြဋ္ဌာန်းပေးဖို့ အမေရိကန် ကွန်ဂရက် လွှတ်တော်ကို တောင်းဆိုနေကြပါတယ်။

အဲဒီ ဥပဒေ မူကြမ်းအရ နိုင်ငံလုံးဆိုင်ရာ ဥပဒေစိုးမိုးရေး ဆောင်ရွက်တဲ့ ဝန်ထမ်းများအနေနဲ့ ကျိုးကြောင်း လျော်ညီတဲ့ နည်းလမ်းမှန်သမျှ သုံးလို့ မရတော့ဘဲ သေစေနိုင်တဲ့ အားသုံးမှုသာလျှင် ရွေးချယ်စရာနည်းလမ်း အဖြစ်ကျန်တော့မှ အဲဒီ အင်အား သုံးခွင့်ရမှာ ဖြစ်ပါတယ်။

စစ်တပ်သုံး လက်နက်တွေကို ရဲဘက် လွှဲပြောင်းခွင့် ပိတ်ပင်တဲ့ မူကြမ်းတခုကိုလည်း ထောက်ခံတဲ့ ကွန်ဂရက်လွှတ်တော် အမတ်တချို့ ရှိနေပြီ ဖြစ်ပြီး အခြားအလားတူ ဥပဒေ မူကြမ်းတွေကိုလည်း လွှတ်တော်မှာ ဆက်လက် ဆွေးနွေးနေကြပါတယ်။

ဓာတ်ပုံ ရင်းမြစ်, Getty Images

ဓာတ်ပုံ ပုံစာ,

အများပြည်သူရဲ့ ဖိအားကအာဏာပိုင်တွေဘက်က ဖလွိုက်အမှု ကိုင်တွယ်ပုံကို သက်ရောက်မှုရှိတယ် ဆိုပေမယ့် ဒီထက် နက်ရှိုင်းတဲ့ ပြုပြင်ပြောင်းလဲမှုတွေ လုပ်ဖို့လည်း လို

ရဲတာဝန် ထမ်းဆောင်မှု ပုံစံအသစ် ဖြစ်လာမလား

အမေရိကန် ပြည်သူ့လွတ်လပ်ခွင့် သမဂ္ဂ (ACLU) ရဲ့ တရားမျှတရေး ဌာနခွဲ ဒါရိုက်တာ အူဒီ အိုဖာကတော့ အခုလို ဥပဒေတွေ ပြဌာန်းရုံနဲ့ မလုံလောက်ပဲ အမေရိကန်တနိုင်ငံလုံးက ရဲတွေရဲ့ အခန်းကဏ္ဍကို ထားရှိတဲ့ သဘောထားနဲ့ ထုံးတမ်း အယူအဆကို ပြောင်းလဲဖို့ လိုတယ်လို့ ဆိုပါတယ်။

လက်ရှိစနစ်အရ အမေရိကန်ရဲတာဝန်ချမှုဟာ ဗဟိုချုပ်ကိုင်မှု မရှိတာများပြီး တချို့မြို့တွေရဲ့ အသုံးစရိတ် ၄၀% လောက်အထိကို ရဲဌာနမှာ အသုံးပြုနေတယ်လို့ ဆိုပါတယ်။

လက်နက်ကိုင်ရဲတွေကိုတာဝန်ချရာမှာလည်း ရဲရှိနေရင် ပဋိပက္ခ ပိုပြီး ရှုပ်ထွေးသွားနိုင်တဲ့ နေရာအမျိုးမျိုးမှာ ချထားမှုတွေ ရှိနေပြီး ကျောင်းတွေ နားမှာ ကင်းလှည့်ဖို့နဲ့၊ သာမန် အများပြည်သူကို အနှောက်အယှက်ဖြစ်တဲ့ အပြုအမူမျိုးကို ထိန်းချုပ်ရာမှာပါ လက်နက်ကိုင် ရဲတွေကို ချထားတာမျိုး ဖြစ်တယ်လို့ ဆိုပါတယ်။

အမေရိကန်နိုင်ငံမှာ သုံးစက္ကန့်ကို တယောက်နှုန်းနဲ့ ရဲတွေက ဖမ်းဆီးမှုတွေ ရှိနေပြီး အမေရိကန် နိုင်ငံလုံးဆိုင်ရာ စုံစမ်းစစ်ဆေးရေး ဗျူရို (FBI)ရဲ့ ခန့်မှန်းချက်အရ ၂၀၁၈ ခုနှစ်အတွင်းမှာ နိုင်ငံတဝန်း ဖမ်းဆီးမှု ၁၀.၃ သန်း ရှိခဲ့တယ်လို့ ဆိုပါတယ်။

အိုဖာရဲ့ အဆိုအရ အဲဒီလို ဖမ်းဆီးခံရသူ အများစုဟာ ကြမ်းတမ်းတဲ့ ရာဇဝတ်မှုနဲ့ စွပ်စွဲ အဖမ်းခံရတာ မဟုတ်ဘူးလို့ ဆိုပါတယ်။

လတ်တလော အသတ်ခံရတဲ့ ဂျော့ဖလွိုက်ဟာလည်း ဆိုင်တဆိုင်မှာ ပိုက်ဆံ အတုနဲ့ ဝယ်ဖို့ ကြိုးစားတယ်လို့ အစွပ်စွဲခံခဲ့ရတာ ဖြစ်ပါတယ်။

အိုဖာအနေနဲ့ သူတို့ ACLU အဖွဲ့ရဲ့ အမြင်အရ ဒီလို အမှုမျိုးတွေမှာ ရဲတွေ ပါဝင် မပတ်သက်သင့်ဘူးလို့ ဆိုပါတယ်။

ဓာတ်ပုံ ရင်းမြစ်, Reuters

ဓာတ်ပုံ ပုံစာ,

လမ်းပေါ်ရောက် လူတွေရဲ့ ဒေါသကို ကြီးမားတဲ့ အသွင်ပြောင်း ပြောင်းလဲရေးအထိ ဖြစ်လာအောင် တက်ကြွလှုပ်ရှားသူတွေက လမ်းကြောင်းပြောင်းချင်ကြ

အမေရိကန်နိုင်ငံ အနေနဲ့ ရဲဌာနတွေအတွက် အမေရိကန်ဒေါ်လာ ဘီလျံ ဆယ်နဲ့ချီပြီး အသုံးပြုနေမယ့်အစား ရဲတွေက သမိုင်းကြောင်းနဲ့ချီပြီး အဓိက ပစ်မှတ်ထားခြင်း ခံနေရတဲ့ လူမှုအသိုင်းအဝိုင်းတွေမှာ အဲဒီငွေတွေကို ရင်းနှီးမြုပ်နှံသင့်တယ်လို့လည်း သူက ပြောပါတယ်။

ရဲတွေဘက်က အပြစ်ဝန်ခံမှု စံသတ်မှတ်ချက်ကို မြှင့်တင်တာမျိုးက တချို့ တပ်ဖွဲ့တွေအတွက် အလုပ်ဖြစ်နိုင်တယ် ဆိုပေမယ့် ဒီလို တာဝန်ယူ တာဝန်ခံမှု လုပ်တဲ့ စနစ်က အပေါ်ယံ သကာဖြူးပြတာမျိုးသာ ဖြစ်တယ်လို့ အိုဖာရော နီးလ်လီတို့ နှစ်ယောက်စလုံးက ရှုမြင်ကြပါတယ်။

ကိုဗစ်-၁၉ ဗိုင်းရပ်စ်ပိုးအန္တရာယ်ရှိတဲ့ကြားက ဂျော့ဖလွိုက်အမှုက လှုံ့ဆော်လိုက်တဲ့ ဆန္ဒပြပွဲတွေ လျော့သွားမယ့် အလားအလာ မရှိသေးတဲ့ အခုလိုအချိန်မှာ လမ်းပေါ်ရောက် လူတွေရဲ့ ဒေါသကို ကြီးမားတဲ့ အသွင်ပြောင်း ပြောင်းလဲရေးအထိ ဖြစ်လာအောင် တက်ကြွလှုပ်ရှားသူတွေက လမ်းကြောင်းပြောင်းပေးချင်ကြပါတယ်။

“ကျွန်တော်တို့ အမေရိကန်နိုင်ငံမှာ ရဲတွေရဲ့ ကြမ်းကြမ်းတမ်းတမ်း ဆောင်ရွက်မှုနဲ့ သူတို့ရဲ့ လူမျိုးရေးခွဲခြားမှုတွေနဲ့ ပတ်သက်လို့ အခြေခံကျ နက်ရှိုင်းတဲ့ ပြဿနာတွေ ရှိနေပါတယ်။”

“ဒီပြဿနာတွေကို ဆယ်စုနှစ်ပေါင်းများစွာ ထိန်းချုပ်ဖို့ ကြိုးစားလာပေမယ့် ဒီတိုက်ပွဲကို ကျွန်တော်တို့ မနိုင်သေးပါဘူး။ ရဲတဦးတယောက်ကို အပြစ်ပေးနိုင်ရုံနဲ့လဲ ဒီတိုက်ပွဲကို နိုင်မှာ မဟုတ်ပါဘူး” လို့ အိုဖာက အဆုံးသတ် မှတ်ချက်ပေးခဲ့ပါတယ်။