ကလေးတစ်ဦးမူဝါဒ ဖြေလျှော့မှုကို သတိနဲ့ ကြိုဆို

ဓာတ်ပုံ မူပိုင် Reuters

တရုတ် နိုင်ငံမှာ ဆယ်စုနှစ် များစွာ ကျင့်သုံး လာခဲ့တဲ့ တစ်အိမ်ထောင် ကလေးတစ်ယောက် မူဝါဒကို ဖျက်သိမ်းတော့မယ် ဆိုတဲ့ သတင်းဟာ တရုတ် နိုင်ငံသားတွေရဲ့ ဆန္ဒကို ထင်ဟပ်တဲ့ သတင်း ဖြစ်တယ်လို့ တရုတ်ပိုင် သတင်း မီဒီယာက ဖော်ပြ ကြိုဆို ခဲ့ပါတယ်။

ဒါပေမယ့် လူ့အခွင့်အရေး အဖွဲ့တွေ ကတော့ ဒီကြေညာချက်ဟာ သိပ် ခရီး မရောက်သေးဘဲ ကန့်သတ်ထားတဲ့ စည်းမျဉ်းတွေကိုပါ ပယ်ဖျက် ပေးသင့်တယ်လို့ ပြောကြပါတယ်။

တရုတ် ဇနီးမောင်နှံ အားလုံးကို ကလေး ၂ ယောက် အထိ ယူနိုင်ဖို့ အဲဒီ မူဝါဒကို ဖြေလျှော့ပေးမယ်လို့ တရုတ် အစိုးရက ကြာသပတေးနေ့မှာ ကြေညာ ခဲ့တာပါ။

ကလေး ၂ ယောက် ယူနိုင်မယ့် မူဝါဒ အသစ်မှာ အကျုံးဝင်တဲ့ ဇနီးမောင်နှံ အိမ်ထောင်စုပေါင်း သန်း ၉၀ လောက် ရှိတယ်လို့ တရုတ် အမျိုးသား ကျန်းမာရေးနဲ့ မိသားစု စီမံကိန်း ကော်မရှင်က ကြေညာချက် ထုတ်ပြန် ခဲ့ပါတယ်။

ဒါပေမယ့် အဲဒီ မူဝါဒကို ဘယ်အချိန်မှာ စတင် အကောင်အထည် ဖော်မလဲ ဆိုတာကိုတော့ ဖော်ပြ မထားပါဘူး။

လက်ရှိအချိန်ထိ ဒုတိယမြောက် ကလေး ယူချင်တဲ့ မိသားစုတွေ အနေနဲ့ ခွင့်ပြုချက် ရဖို့ လျှောက်လွှာ တင်နေရဆဲ ဖြစ်ပါတယ်။ ဒါပေမယ့် သဘောတူ ခွင့်ပြုပေးတဲ့ စနစ် အစား စာရင်းသွင်း မှတ်ပုံတင်တဲ့ စနစ်နဲ့ ပြောင်းလဲ ပေးဖွယ် ရှိတယ်လို့တော့ အဲဒီ ကော်မရှင်က ပြောပါတယ်။

ဒီသတင်းနဲ့ပတ်သက်သမျှ