အယ်လ်ခိုင်ဒါ အိန္ဒိယ အဖွဲ့ခွဲ ခေါင်းဆောင်ကို ဖမ်းမိ

ဓာတ်ပုံ မူပိုင် SITE
Image caption အယ်လ်ခိုင်ဒါ ခေါင်းဆောင် Ayman al-Zawahiri

အယ်လ်ခိုင်ဒါ အိန္ဒိယ အဖွဲ့ခွဲရဲ့ အရေးပါသူ ၂ ယောက်ကို ဖမ်းမိ ခဲ့တယ်လို့ အိန္ဒိယ နိုင်ငံ၊ မြို့တော် ဒေလီ ရဲတပ်ဖွဲ့က ပြောပါတယ်။

အခု ဖိဆီးမှုကြောင့် အိန္ဒိယ တိုက်ငယ်ပေါ်က အယ်ခိုင်ဒါ အဖွဲ့ခွဲရဲ့ လှုပ်ရှားမှုတွေကို အထိနာစေမှာ ဖြစ်တယ်လို့ ဒေလီ ရဲတွေက ပြောပါတယ်။

ဖမ်းမိသူ ၂ ဦး အနက် တစ်ဦးဟာ အယ်လ်ခိုင်ဒါ အိန္ဒိယ အဖွဲ့ခွဲကို ထူထောင်သူ တစ်ဦး ဖြစ်တဲ့ မိုဟာမက် အဆစ်ဖ် Muhammad Asif ဆိုသူ ဖြစ်တယ်လို့ ရဲတွေက ဆိုပါတယ်။

အယ်လ်ခိုင်ဒါ အဖွဲ့ဟာ ပြီးခဲ့တဲ့ တစ်နှစ်ကျော်က ဒေသတခွင်က စစ်သွေးကြွ အုပ်စုတွေကို ပူးပေါင်း ပေးဖို့အတွက် ဆိုပြီး တောင်အာရှ လှုပ်ရှားမှုကို စတင် ခဲ့တာပါ။

ဘင်္ဂလားဒေ့ရှ်က ဘလော့ဂါ လေးယောက် အသတ်ခံရမှုနဲ့ ပါကစ္စတန်က တိုက်ခိုက်မှုတွေဟာ သူတို့ လက်ချက် ဖြစ်တယ်လို့ ဒီအဖွဲ့ခွဲက ပြောခဲ့ပါတယ်။

အခု ဖမ်းမိတဲ့ လူ ၂ ယောက်ဟာ အိန္ဒိယ လူငယ်တွေကို ဒီအဖွဲ့ထဲ ဝင်ဖို့ စည်းရုံး သိမ်းသွင်းသူတွေ ဖြစ်တယ်လို့ အိန္ဒိယ အာဏာပိုင်တွေက ပြောပါတယ်။

အယ်လ်ခိုင်ဒါ ခေါင်းဆောင် ဇာဝါဟီရီ Ayman al-Zawahiri က အိန္ဒိယ အဖွဲ့ခွဲ ထူထောင်မှုဟာ မြန်မာ၊ ဘင်္ဂလားဒေ့ရှ်နဲ့ အိန္ဒိယ နိုင်ငံတွေက မွတ်ဆလင်တွေ အတွက် သတင်းကောင်း ဖြစ်တယ်လို့ ပြောခဲ့ဖူးပါတယ်။

ဒီသတင်းနဲ့ပတ်သက်သမျှ