ဇီကာပိုးနဲ့ ဦးခေါင်းသေးမှု အဆက်အစပ်ကို လေ့လာ

ဓာတ်ပုံ မူပိုင် AP

ဘရာဇီး နိုင်ငံမှာ ကိုယ်ဝန်ဆောင် အမျိုးသမီးတွေ ပါဝင်တဲ့ လေ့လာ စမ်းသပ်ချက် တစ်ခုအရ ဦးခေါင်း သေးတဲ့ ကလေးတွေ မွေးဖွားလာမှုဟာ ဇီကာ ဗိုင်းရပ်စ်နဲ့ ဆက်စပ်တယ် ဆိုတဲ့ အယူအဆကို ပိုမို ခိုင်မာ လာစေတယ်လို့ ပညာရှင်တွေက ပြောပါတယ်။

ကိုယ်ဝန်ဆောင်စဉ် ကာလအတွင်း ဇီကာပိုး ကူးစက်ခံရတဲ့ လက္ခဏာတွေ ပြခဲ့တဲ့ အမျိုးသမီး နှစ်ဦးရဲ့ ရေမြွာရည်ထဲမှာ ဇီကာ ဗိုင်းရပ်စ် ရောက်ရှိ နေတာကို အဲဒီ လေ့လာချက်က အတည်ပြုခဲ့ပါတယ်။

ဒါကြောင့် သန္ဓေသားကိုလည်း ဇီကာ ဗိုင်းရပ်စ် ကူးစက်နိုင်တယ် ဆိုတာ ဒီတွေ့ရှိချက်က ဖော်ပြတယ်လို့ ဘရာဇီး ပညာရှင်တွေက ဆိုပါတယ်။

ဒါပေမယ့် ကမ္ဘာ့ ကျန်းမာရေးအဖွဲ့ WHO က ပညာရှင်တွေကတော့ အဲဒီလို ဇီကာ ဗိုင်းရပ်စ်နဲ့ ဦးခေါင်း သေးတဲ့ ကလေးတွေ အကြား အဆက်အစပ်ကို သက်သေ မပြနိုင်သေးပါဘူးလို့ သတိပေးခဲ့ပြီး၊ လာမယ့် သီတင်းပတ် အနည်းငယ်အတွင်း အသေးစိတ် အချက်တွေ ထပ်ထွက်လာမယ်လို့ မျှော်လင့်ထား ပါတယ်။

ဘရာဇီး နိုင်ငံမှာ ပြီးခဲ့တဲ့ နှစ်အတွင်း ဇီကာ ဗိုင်းရပ်စ် ကူးစက်ခံရသူ အရေအတွက် များလာခဲ့ သလို ဦးခေါင်းအရွယ် ပုံမှန်ထက် သေးငယ်တဲ့ ကလေးတွေ မွေးဖွားမှုလည်း တိုးလာခဲ့ကာ တချို့ ကလေးတွမှာ ဦးနှောက် ဖွံ့ဖြိုးမှုကိုပါ ထိခိုက်ခဲ့တယ်လို့ ဆိုပါတယ်။

ဒါကြောင့် အဲဒီ ပြဿနာရဲ့ နောက်ကွယ်မှာ ဇီကာ ဗိုင်းရပ်စ် တကယ် ရှိနေသလား ဆိုတာကို အတည်ပြုနိုင်ဖို့ လေ့လာ စမ်းသပ်မှုတွေ ပြုလုပ် လာကြတာ ဖြစ်ပါတယ်။

ဒီသတင်းနဲ့ပတ်သက်သမျှ