Cerddwr 50 oed wedi marw ar Fannau Brycheiniog

Bannau Brycheiniog Image copyright (C) British Broadcasting Corporation

Mae dyn 50 oed wedi marw ar gopa mynydd ym Mannau Brycheiniog.

Roedd yn cerdded gyda chriw o bobl yn eu harddegau o sir Dorset ar fynydd Corn Du pan gafodd y gwasanaethau brys eu galw am 1:30pm ddydd Sadwrn.

Fe gafodd dau dîm achub mynydd, yr heddlu a'r ambiwlans awyr eu galw i'r digwyddiad.

Dywedodd Penny Brockman o Dîm Achub Mynydd Canol y Bannau fod yr achubwyr wedi cyrraedd y dyn o fewn munudau ond ei bod hi'n rhy hwyr.

Eglurodd: "Roedd ein tîm yn darparu cefnogaeth i ddigwyddiad deuddydd ar y mynydd, ac roedden nhw yno o fewn munudau gydag offer meddygol da.

"Hoffwn dalu teyrnged i aelodau o'r cyhoedd a gyrhaeddodd y safle yn gynnar a gwneud popeth o fewn eu gallu i helpu'r dyn."

"Hoffwn gynnig ein cydymdeimlad i deulu'r dyn," ychwanegodd wrth ddweud fod pawb wedi gadael mewn sioc oherwydd y digwyddiad prin yma.

Corn Du yw'r ail gopa uchaf yn Ne Cymru ar 2,864 troedfedd (873m).

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.