Her newydd i bêl-droedwyr Cymru yn ôl y rheolwr

Gareth Bale ac Aaron Ramsey yn dathlu Image copyright Huw Evans picture agency
Image caption Gareth Bale ac Aaron Ramsey yn dathlu wedi buddugoliaeth yn erbyn Montenegro

Dywed rheolwr tîm pêl-droed Cymru y bydd ei chwaraewyr yn wynebu math newydd o bwysau yn eu dwy gêm nesaf.

Yn ôl Gary Speed mae hyder y tîm wedi codi ar ôl buddugoliaeth yn erbyn Montenegro a pherfformiad canmoladwy wrth golli i Loegr yn gynharach yn y mis.

Cyn y gemau hynny roedd Cymru yn wynebu beirniadaeth ar ôl gostwng i safle 117 yn rhif detholion y byd.

"Nawr mae'r disgwyliadau yn fwy, mae yna bwysau gwahanol," meddai Speed.

Bydd Cymru gartre yn erbyn Y Swistir ar Hydref 7 ac yn teithio i Fwlgaria pedwar niwrnod yn ddiweddarach.

Fe allai'r Swistir gyrraedd rowndiau terfynol Pencampwriaeth Ewro 2012 pe bai nhw'n gorffen yn ail yn y grŵp ac yn ennill y gemau ail gyfle.

Gobaith Cymru yw gorffen yn drydydd yn y grŵp.

"Mae'n rhaid i ni barhau i wella," meddai'r rheolwr.

"Mae'n mynd i i fod yn anodd ond parhau i wella ydi'r peth pwysig."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.