Cyhoeddi tîm rygbi Cymru i wynebu Fiji

Cafodd Scott Williams dri chais yn y gêm yn erbyn Namibia ddydd Llun

Mae hyfforddwr rygbi Cymru Warren Gatland wedi enwi tîm cryf i wynebu Fiji yng Nghwpan Rygbi'r Byd ddydd Sul.

Mae 'na saith newid yn ogystal â dau newid safle o'r tîm wnaeth guro Namibia 81-7 ddydd Llun.

Mae Jamie Roberts yn ôl yn safle'r canolwr ac yn ymuno gyda fo y mae Scott Williams o'r Scarlets ar ôl croesi am dri chais yn y gêm ddiwetha'.

Dyw Shane Williams ddim wedi ei gynnwys oherwydd anaf a'r newyddion o'r garfan yw ei fod o'n gwella fel y mae Dan Lydiate (ffêr) a James Hook (ysgwydd) o'u hanafiadau.

Bydd George North, Rhys Priestland a Mike Phillips yn cychwyn y gêm.

Wrth i North gychwyn fe fydd Leigh Halfpenny yn newid asgell.

Ymysg y blaenwyr mae Gethin Jenkins ac Adam Jones yn dechrau yn y rheng flaen.

Ar y fainc y mae Stephen Jones a Jonathan Davies.

'Ennill yn gyfforddus'

Does 'na ddim lle i Travis Knoyle ac Aled Berw yn y 22.

"Mae'n bosib y byddai Shane ar gael i ni ond fe fyddai'n rhaid i ni ei wthio, er mai prin iawn mae o wedi bod yn rhan o'r ymarferion yn ystod yr wythnos," meddai Gatland.

"Rydym yn hynod o hapus gyda'r tri yn y cefn.

"Gan fod Alun Wyn Jones a Jonathan Davies wedi dechrau'r tair gêm hyd yma, rydym wedi gwneud dipyn o newid i'r ail reng ond maen nhw ar y fainc rhag ofn y byddwn eu hangen.

"Rydym yn canolbwyntio ar wynebu Fiji, ac os allwn ni ennill ac ennill yn gyfforddus, mae modd i ni gyrraedd y chwarteri," ychwanegodd.

Dydd Gwener fe lwyddodd De Affrica i guro Samoa 13-5.

Mae'r canlyniad yn golygu fod Cymru i bwrpas drwodd i'r wyth olaf.

Byddai'n rhaid iddyn nhw golli o sgôr anferthol i Fiji er mwyn i hynny beidio â digwydd.

Fe fydd gêm olaf Cymru yn grŵp D yn Stadiwm Waikato yn Hamilton ddydd Sul am 6pm (amser lleol) 6am (amser Cymru).

CYMRU: Lee Byrne; George North; Scott Williams; Jamie Roberts; Leigh Halfpenney; Rhys Priestland; Mike Phillips; Gethin Jenkins; Huw Bennet; Adam Jones; Bradley Davies; Luke Charteris; Ryan Jones; Sam Warburton; Toby Faletau.

EILYDDION: Lloyd Burns; Paul James; Alun Wyn Jones; Andy Powell; Lloyd Williams; Stephen Jones; Jonathan Davies.