'Newid trywydd Cwpan Y Byd 2011'

Dan Carter Image copyright Getty Images
Image caption Mae Dan Carter wedi ei anafu a fydd o ddim yn chwarae dros ei wlad yng ngweddill y bencampwriaeth

Ro'n i hanner ffordd ar draws yr Iwerydd pan fflachiodd y neges ar sgrin fach y Boeing 777. 'Dan Carter i fethu gweddill Cwpan y Byd'.

Chwe awr ynghynt ro'n i'n darllen erthygl ar sut y byddai maswr gorau'r byd a 'pin-up' Seland Newydd yn siŵr o gipio Tlws Webb Ellis dros ei wlad.

Ar yr un pryd, roedd eu Prif Hyfforddwr, Graham Henry, yn serennu fel peilot ar ffilm ddiogelwch yr awyren a Capten McCaw wrth ei ochr yn y cockpit yn dangos y ffordd.

Ond dyma newyddion allai newid trywydd cystadleuaeth y Crysau Duon yn llwyr.

Mae'r ffaith bod manylion yr anaf wedi'n cyrraedd ni 30,000 o filltiroedd yn yr awyr yn brawf o bwysigrwydd Carter i'r ffefrynnau.

Dyw tîm gorau'r chwarter canrif ddiwetha' heb ennill Cwpan y Byd ers y fuddugoliaeth ar dir cartre' ym 1987.

Mae amheuon unwaith eto'n cronni.

Pwy yw'r 'lleill'?

'Gall y Crysau Duon lwyddo heb Dan?' oedd cwestiwn plaen y NZ Herald dydd Llun, ac yn ôl y cyn-fewnwr Justin Marshall mae'r anaf wedi troi ffefrynnau clir yn dîm sydd cystal ond yn ddim gwell na rhai o'r lleill.

Image copyright Huw Evans picture agency
Image caption Nid yw Shaun Edwards yn barod i fynd adre.

Ydy Cymru ymhlith y 'lleill'?

Wel does dim amheuaeth bod pobl yn dechrau cymryd ymgyrch Gatland a'i griw o ddifri.

Ac mae digon o reswm am wneud - dim ond Seland Newydd gynilodd fwy o bwyntiau yn ystod y gemau grŵp, a De Affrica'n unig a ildiodd lai.

Cymru ac Iwerddon yw'r ddau dîm sy'n amlwg yn gwella wrth i'r gystadleuaeth fynd yn ei blaen, ac am y tro cynta' ers amser mae'n debyg y bydd gan brif hyfforddwr y cochion ddewis o 30 chwaraewr holliach i wynebu'r Gwyddelod nos Sadwrn.

Hyder

Mae yna hyder anarferol a phenderfyniad amlwg ymhlith carfan Cymru.

Pan mae Shaun Edwards yn edrych i fyw eich llygaid (fel y gwnaeth i mi mewn cynhadledd newyddion heddiw) gan ddweud nad yw e'n barod i fynd adre eto, mae'n anodd credu mai i Heathrow yn hytrach nac Auckland fydd Cymru'n hedfan ymhen wythnos.

Ac mi fydd hi'n dipyn o wythnos wrth i'r Awstraliaid, y Springboks, y Gwyddelod a Chymry di-ri ymgasglu a chymysgu yn Wellington ar gyfer y chwarteri.

Gall perchennog unig dŷ tafarn Cymreig honedig yr holl hemisffer edrych 'mlaen at ymddeoliad cynnar, tra bod un o eglwysi'r brifddinas hefyd yn mynd i hwyl pethau.

Ar boster mawr y tu fas mae'r geiriau 'Car dy gymydog...cefnoga'r Aussies!'

Mae gweddi neu ddwy am wellhad gwyrthiol i goes Dan Carter yn llawer mwy tebygol.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.