Llechi yn cynhyrfu archeolegwyr

Mae arbenigwyr yn credu bod y naddu wedi digwydd rhwng 1170 a 1190

Mae'n bosib y gallai darnau o lechi ddatgelu mwy o wybodaeth am hanes castell yn Sir Benfro a'r bobl oedd yn byw yno.

Cafwyd hyd i'r llechi, sydd â lluniau arnyn nhw, wrth i archeolegwyr gloddio yng Nghastell Nanhyfer ger Trefdraeth.

Hon yw'r bedwaredd flwyddyn yn olynol i archeolegwyr archwilio'r safle am dair wythnos yn yr haf.

Tîm o Brifysgol Durham sy'n arwain y cloddio, gan gydweithio gydag Awdurdod Parc Cenedlaethol Arfordir Penfro ac Ymddiriedolaeth Archeolegol Dyfed.

Mae'r castell yn eiddo i'r cyngor cymuned leol.

Adeilad pwysig

Dywed Dr Chris Caple, o Brifysgol Durham, eu bod wedi dod o hyd i'r llechi ger mynedfa sy'n dyddio'n ôl i'r 12fed Ganrif.

Mae archeolegwyr wedi bod yn cloddio yn y castell

Roedd sêr a darluniau eraill wedi eu naddu ar y llechi.

"Mae'r llechi yn hynod o ddiddorol," meddai.

"Dim ond mewn un safle yn y castell yr oedden nhw i'w gweld - gan awgrymu eu bod yno i gadw bwganod draw."

Dywedodd Phil Bennett, o Awdurdod Parc Cenedlaethol Arfordir Penfro, eu bod yn gobeithio gallu cadw'r eitemau yn Nanhyfer, a hynny yng ngofal y cyngor cymuned.

Yn ôl Dr Caple, roedd Nanhyfer yn adeilad pwysig yn y 12fed Ganrif.

"Byddai pawb oedd yn mynd o Aberteifi i Dŷ Ddewi yn gallu gweld y castell mawreddog a'r brif fynedfa.

"Bydd rhagor o waith yn cael ei wneud ar y llechi ac mae'n siŵr y cawn fwy o wybodaeth am fywyd pobl yn y 12fed Ganrif."