Yr ornest ryfeddol sy'n 'rhy agos'

Sam Warburton a Brian O'Driscoll Image copyright Huw Evans picture agency
Image caption "Fe fydd hi'n ornest agos rhwng bechgyn Warburton ac O'Driscoll"

Mae wedi bod fel gêm o Where's Wally? drwy'r wythnos ond does dim prinder sgarffiau coch a gwyn yn Wellington erbyn hyn.

Ro'dd Calon Lân yn atseinio o amgylch un o fariau'r brifddinas neithiwr - yn sychedig ac uchel eu cloch mae cefnogwyr Cymru wedi cyrraedd.

Mor agos yw'r ornest rhwng bechgyn Warburton ac O'Driscoll fel bod y New Zealand Herald yn ceisio rhagweld y canlyniad drwy gymharu cryfderau'r ddwy wlad oddi ar y cae chwarae.

Mae'r Manics, Shirley a Shakin' Stevens yn rhagori dros fandiau fel y Corrs a'r Cranberries ond does dim cymhariaeth, mae'n debyg, rhwng y ffilm How Green Was My Valley a Bloody Sunday.

Mae'n gwbwl gyfartal rhwng yr actorion Richard Burton a Peter O'Toole sy'n golygu mai yn yr ardd lysiau mae'r ornest hon am gael ei hennill neu ei cholli a chan nad oes modd gwneud stwnsh gyda chennin, y Gwyddelod a'u tato sy'n mynd â hi, yn ôl y papur poblogaidd.

Dwy botel

Yn anffodus, mae Richie McCow yn cytuno.

Fel y mae'r enw'n awgrymu, buwch yw Richie sydd drwy gydol Cwpan y Byd wedi bod yn dyfalu canlyniadau'r gemau'n gymharol lwyddiannus.

Yn syml, mae dwy botel laeth ac arnyn nhw faneri dwy wlad sy'n wynebu ei gilydd yn cael eu rhoi gerbron y tipster a hwnnw yn ei dro yn cymryd llwnc o un neu'r llall.

Hyd yma mae Richie wedi cael 75% o'r canlyniadau'n gywir - dim ond gobeithio wrth ddewis Iwerddon y tro hwn fod ei rediad ar fin gwaethygu.

Yn bersonol, mae gen i fwy o ffydd yn Colin Meads, John Kirwan a Wayne Shelford - y tri yn arwyr cenedlaethol ac yn gyn-Grysau Duon a'r tri'n disgwyl buddugoliaeth Gymreig.

Syndod

Mae'n debyg yng Nghymru fod cryn syndod gyda phenderfyniad Warren Gatland i beidio â chynnwys James Hook yn y tîm fydd yn dechrau ddydd Sadwrn.

Dyw'r un teimlad ddim yma yn Wellington.

Ma'r Prif Hyfforddwr wedi cyfaddef y byddai Hook wedi cael cyfle fel maswr yn gynt yn y gystadleuaeth pe na bai'r chwaraewr amryddawn wedi cael anaf.

Ond mae chwaraewyr fel Rhys Priestland a Leigh Halfpenny wedi chwarae cystal wrth gyrraedd y chwarteri ac fe fyddai wedi bod yn annheg iawn i beidio â pharhau gyda nhw.

Pen tost

Roedd tasg dewis 15 i wynebu Iwerddon yn llawer anoddach na'r arfer ac, yn ôl Gatland, fe gymerodd hi oriau cyn dod i benderfyniad.

Roedd ganddo un o'r pennau tost yna sy'n bleserus o boenus i hyfforddwyr pan mae mwy o chwaraewyr teilwng nac o grysau ar gael.

Cyrraedd Auckland yw'r nod lle bydd tŵr uchel yn newid ei liw'n gyson dros y penwythnos i ddynodi pa dimau sydd ar y blaen yn y chwarteri.

Fe fyddai'n edrych yn fendigedig yn goch.