Seland Newydd yn bencampwyr

Piri Weepu yn llongyfarch Tony Woodock ar ôl cais Seland Newydd Image copyright Getty Images
Image caption Piri Weepu yn llongyfarch Tony Woodock

Seland Newydd yw pencampwyr rygbi'r byd ar ôl curo Ffrainc mewn gem hynod agos yn Auckland.

Hwn yw'r eildro i'r Crysau Duon ennill y gystadleuaeth, y nhw oedd y pencampwyr cyntaf 24 o flynyddoedd yn ôl.

Roedd Seland Newydd ar y blaen 5-0 ar yr egwyl gyda Woodcock yn croesi o 5 metr ar ôl derbyn y bêl yn dilyn tafliad i'r llinell.

Er i Seland Newydd ymestyn eu mantais gyda chig gosb fe darodd Ffrainc yn ôl gyda chais gan Dusautoir.

Hwn, o bell ffordd, oedd perfformiad gorau Ffrainc yn y gystadleuaeth.

Roedd y Ffrancwyr wedi colli ddwywaith yn y gemau agoriadol ac wedi bod yn ffodus i guro Cymru'r wythnos diwethaf.

Ond ddydd Sul fe lwyddodd Ffrainc i sicrhau gem derfynol hynod agos.

Croesodd Dusautoir gyda 30 munud yn weddill.

Ar ôl hynny methodd Francois Trinh-Duc gyda chig cosb o bellter a bu'n rhaid i'r Crysau Duon ddibynnu ar amddiffyn cryf er mwyn sicrhau'r fuddugoliaeth.