Tîm Cymru yn disgyn dau le ar y rhestr detholion

Cymru yn siomedig wedi colli yn erbyn Ffrainc a methu cyrraedd y rownd derfynol

Er bod tîm rygbi Cymru wedi gorffen yn bedwerydd yng Nghwpan y Byd yn Seland Newydd mae'r tîm cenedlaethol wedi disgyn i'r wythfed safle ar restr detholion y Bwrdd Rygbi Rhyngwladol.

Roedden nhw'n chweched cyn y bencampwriaeth.

Er bod Awstralia wedi gorffen yn drydydd ar ôl curo Cymru maen nhw yn ail yn y rhestr y tu ôl i'r pencamwpwyr Seland Newydd.

Ffrainc su'n drydydd, De Affrica yn bedwerydd a Lloegr yn bumed.

Mae Iwerddon, a gollodd yn erbyn Cymru yn y bencampwriaeth, wedi codi i'r chweched safle ac mae'r Ariannin wedi codi i'r seithfed safle.

Llwyddodd Cymru i gyrraedd y pedwar olaf yn y bencampwriaeth.

Un pwynt oedd rhyngddyn nhw â Ffrainc enillodd eu lle yn y rownd derfynol a hynny er gwaetha chwarae'r rhan fwyaf o'r gêm gydag 14 dyn wedi i Sam Warburton gael cerdyn coch.

Er gwaetha' ymdrechion arwrol tîm Warren Gatland yn y bencampwriaeth, Cymru yw'r unig wlad ymhlith y 10 uchaf i ddisgyn.

Tonga sy'n nawfed a'r Alban sy'n 10fed.