Ysgol Dyffryn Taf ac Ysgol Lewis yn ennill gwobrau addysgu

Mae'r canolwr Jonathan Davies yn gyn ddisgybl Ysgol Uwchradd Dyffryn Taf Image copyright Getty Images
Image caption Mae'r canolwr Jonathan Davies yn gyn ddisgybl Ysgol Uwchradd Dyffryn Taf

Mae dwy ysgol uwchradd yng Nghymru wedi ennill gwobrau cenedlaethol.

Mae ysgol sy'n gallu brolio bod dau o chwaraewyr rygbi Cymru ym mhencampwriaeth Cwpan y Byd ymysg eu cyn-ddisgyblion wedi ennill gwobr addysgu genedlaethol.

Mae'r tîm addysg gorfforol yn Ysgol Uwchradd Dyffryn Taf yn Hendy-gwyn ar Daf yn Sir Gaerfyrddin wedi ennill "tîm eithriadol y flwyddyn" yng Ngwobrau Addysgu Pearson.

Enillodd yr ysgol arall, Ysgol Lewis, Pengam ym Margoed, Caerffili, yn y categori "ffilmio fy ysgol".

Cafodd Ysgol Dyffryn Taf ei henwebu gan gyn-ddisgybl, Dan Newton, sy'n chwarae i dîm Y Scarlets.

"Fel chwaraewr rygbi proffesiynol, rwyf wedi elwa o ffrwyth eu llafur.

'Cydnabod gwaith caled'

"Rwy'n sylweddoli y rhan bwysig y maen nhw wedi ei gael yn fy llwyddiant ac rwyf am ddiolch iddyn nhw a chydnabod eu gwaith caled a'u hymrwymiad."

Mae'r mewnwr Mike Phillips a'r canolwr Jonathan Davies, yn gyn-ddisgyblion.

Dywedodd y prifathro, Dr Robert Newsome, bod y ddau "yn hoff o'u hardal enedigol ac yn gwneud tipyn i'r gymuned leol".

"Maen nhw'n gymeriadau gwahanol iawn ond mae'r ddau ohonyn nhw wedi bod yn ôl yma i wneud cyflwyniadau ac i siarad â'n myfyrwyr."

Yn Ysgol Lewis, Pengam, fe wnaeth y disgyblion greu ffilm gyda'r neges "dylai dysgu fod yn hwyl - dyma sut mae gwneud hynny".

Mae'r ffilm ddwy funud yn dangos arbrofion mewn labordy, cadw'n heini yn y gampfa a gwers hanes yn yr awyr agored.

Cafodd y seremoni yn Llundain nos Sul ei chyflwyno gan y digrifwr Lenny Henry, ac fe wnaed ymddangosiad hefyd gan y Gymraes Alex Jones ynghyd â'i phartner ar Strictly Come Dancing y BBC, James Jordan.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.