'Aros rhy hir' am gadair olwyn
Image copyright
BBC news grab
Honnir fod defnyddwyr cadeiriau olwyn yng Nghymru yn aros yn rhy hir am gadeiriau newydd neu waith atgyweirio.
Dywedodd llefarydd y Ceidwadwyr ar iechyd, Darren Millar, bod y Gwasanaeth Iechyd yn gadael cleifion i lawr er gwaetha' adroddiad beirniadol 18 mis yn ôl.
Ychwanegodd fod amseroedd aros am gadeiriau neu waith atgyweirio wedi tyfu.
Dywed Llywodraeth Cymru eu bod yn buddsoddi £2.2 miliwn yn ychwanegol bob blwyddyn i'r gwasanaeth gan wella ymarferion gwaith a hyfforddi staff newydd.
Yn 2010, fe ddaeth Pwyllgor Iechyd y Cynulliad i'r casgliad fod loteri cod post yn bodoli gyda phobl yng ngogledd Cymru yn aros yn hirach i gael cadeiriau olwyn na phobl y de.
Cadeirydd y pwyllgor ar y pryd oedd Mr Millar, a dywedodd wrth BBC Cymru ei fod yn derbyn fod y gwasanaeth wedi gwella i ddefnyddwyr newydd, ond nid o safbwynt uwchraddio neu atgyweirio cadeiriau presennol.
Dirywio
"Rwy'n credu fod y gwasanaeth yn gadael pobl i lawr," meddai.
"Mae'r amserlen i gael uwchraddiad neu waith atgyweirio yn dirywio'n gyflym.
"Does dim dwywaith fod arian wedi cael ei fuddsoddi a dwi'n croesawu hynny.
"Mewn gwirionedd mater o sut y mae'r gwasanaeth yn cael ei reoli a'i fonitro yw hyn er mwyn i'r llywodraeth sicrhau eu bod yn delifro."
Mae gan Zoe Walker, 16 oed o Landrillo-yn-Rhos yn Sir Conwy, gyflwr prin ar ei chyhyrau o'r enw Congenital Fibre Type Disproportion sy'n golygu ei bod angen cadair olwyn.
Ond mae hi'n aros ers tro am waith i gael ei wneud ar ei chadair drydan a'r un gyffredin.
"Roedd cael y gadair drydan yn golygu y gallwn fynd i'r coleg ar fy mhen fy hun, ac roedd felly'n rhoi annibyniaeth i mi," dywedodd.
"Nawr ei fod wedi torri, does gen i ddim annibyniaeth.
"Mae'n rhwystredig iawn."
Dywedodd ei thad Phil bod hi'n cymryd misoedd ar fisoedd er mwyn datrys y problemau lleiaf.
"Mae fy merch yn ddewr iawn a byth yn cwyno am ei hanabledd.
"Ond mae'n rhaid i ni frwydro a brwydro."
'Gwella safonau'
Dywedodd Llywodraeth Cymru fod 1,000 o therapyddion wedi cael eu hyfforddi ar draws Cymru er mwyn cyflymu'r broses gychwynnol, a bod clinigau ychwanegol wedi agor yng nghanolbarth a gorllewin Cymru er mwyn lleihau amseroedd teithio ac aros i gleifion.
"Yn dilyn ein hadolygiad o wasanaethau cadair olwyn yng Nghymru, rydym wedi buddsoddi £2.2 miliwn ychwanegol i leihau amseroedd aros yn enwedig i blant a phobl ifanc," meddai llefarydd.
"Rydym yn dyblu nifer y staff clinigol ar draws Cymru sy'n asesu unigolion, ac yn eu galluogi i gael y gadair fwyaf addas ar gyfer eu hanghenion.
"Ar yr un pryd, rydym yn mabwysiadu ymarferion gwaith newydd er mwyn gwella safonau."