Arian loteri yn hwb i eglwysi Conwy

Mae Eglwys Sant Elian yn dyddio yn ôl i'r 13eg ganrif

Mae bron i £100,000 wedi ei ddyfarni i ddwy eglwys sydd angen eu hadfer yn Sir Conwy.

Bydd Eglwys Sant Elian yn Llanelian-yn-Rhos ac Eglwys Sant Cynfran yn Llysfaen yn defnyddio'r arian a ddyfarnwyd gan Gronfa Dreftadaeth y Loteri i ymdrin â phroblemau lleithder.

Dywedodd y Parchedig Manon Parry, rheithor Llysfaen, byddai'r £52,000 a ddyfarnwyd i Eglwys Sant Cynfran yn diogelu dyfodol yr eglwys.

Bydd Eglwys Sant Elian yn derbyn £39,000 bydd yn cael ei ddefnyddio i gynnal a chadw tu allan yr adeilad.

'adeilad hanesyddol'

Mae Eglwys Sant Elian yn dyddio yn ôl i 13eg ganrif ac mae ganddi ffenestri sy'n dyddio yn ôl i'r canol oesoedd, yn ôl Ymddiriedolaeth Archaeolegol Clwys-Powys.

Maen nhw'n dweud fod eglwys wedi bodoli yn Llysfaen ers yr wythfed ganrif.

Dywedodd y Parchedig Parry: "Rydyn ni ar ben ein digon am ein bod wedi cael y grant gan Gronfa Dreftadaeth y Loteri.

"Bydd yr arian yn debygol o sicrhau dyfodol yr adeilad hanesyddol hwn sy'n gwasanaethu cymunedau Llysfaen, Penmaen rhos a Pheulwys."

Mae Cyngor Conwy hefyd yn gwneud cyfraniad i helpu ariannu'r "cynlluniau hollbwysig" hyn.

Dywedodd rheithor Llanelian, y Parchedig Phil Attack: "Rydyn ni wedi bod yn aros am fisoedd am y newyddion hyn.

"Dydych chi ddim yn gallu bod yn sicr bod eich cais i Gronfa Dreftadaeth y Loteri yn mynd i fod yn llwyddiannus.

"Felly roedd yn anhygoel i dderbyn yr e-bost a gadarnhaodd y grant."