Craig Bellamy'n clodfori camp Abertawe

Craig Bellamy ac Ashley Williams Image copyright Huw Evans picture agency
Image caption Y ddau Gymro Bellamy ac Ashley Williams yn ystod gêm rhwng Caerdydd ac Abertawe

Dywedodd ymosodwr Lerpwl, Craig Bellamy, ei fod yn teimlo balchder wrth weld sut y mae Abertawe wedi dechrau eu tymor cyntaf yn yr Uwchgynghrair.

Mae hynny'n gryn dipyn o glod gan un o gyn chwaraewyr Caerdydd.

Bydd tîm Brendan Rodgers, sy'n cynnwys nifer o gyd chwaraewyr Bellamy gyda Chymru, yn teithio i Anfield i wynebu Lerpwl ddydd Sadwrn.

Dywed Bellamy fod yr Elyrch wedi profi eu bod yn haeddu eu lle ar y lefel uchaf.

'Aros i fyny'

Dywedodd: "Yr unig rai oedd yn amau hynny oedd pobl o'r tu allan i Gymru mwy na thebyg....pobl sydd ddim yn deall Abertawe fel clwb.

"Am eu bod allan o'r ffordd, dydyn nhw ddim yn cael y sylw y mae clybiau eraill yn ei gael, mae hynny'n amlwg.

"Ond mae unrhyw un sydd wedi dilyn hynt a helynt Abertawe yn gwybod bod yr Uwchgynghrair yn eu siwtio i'r dim.

"Mae'r Uwchgynghrair yn eu siwtio nhw'n well na'r Bencampwriaeth oherwydd eu dull o chwarae a'r chwaraewyr sydd ganddyn nhw.

"I mi, gyda'r chwaraewyr sydd ganddyn nhw a'u dull o chwarae fe fyddan nhw'n aros i fyny - dwi wir yn credu hynny."

'Dechrau sylwi'

Nid yw Abertawe wedi ennill oddi cartre' hyd yma'r tymor hwn, ond yn Stadiwm Liberty maen nhw wedi ennill tair a chael dwy gêm gyfartal gan ildio dim ond un gôl - mae hynny wedi eu gadael yn ddegfed yn y tabl.

Ychwanegodd Bellamy: "Mae llawer yn dechrau sylwi ar yr hyn maen nhw'n ei wneud ac yn sylweddoli eu bod yn dîm pêl-droed da iawn.

"Bydd yr Uwchgynghrair yn well gydag Abertawe ynddo.

"Dwi'n gwybod mai dyn Caerdydd ydw i, ac fe fyddai'n well o lawer gen i weld Caerdydd yn gwneud hyn - wrth gwrs hynny.

"Ond ar yr un pryd, dwi'n Gymro, ac mae dilyn Abertawe a gweld y ffordd y maen nhw'n chwarae yn rhoi balchder i mi hefyd."

Treuliodd Bellamy y tymor diwethaf ar fenthyg yng Nghaerdydd o'i glwb ar y pryd - Manchester City - cyn symud i Anfield am ei ail gyfnod yno yn ystod yr haf.

Mae Lerpwl wedi cael dechrau da i'r tymor, ac yn chweched yn y tabl ar hyn o bryd.

Eu huchelgais mae'n debyg yw gorffen ymhlith y pedwar uchaf er mwyn sicrhau lle yng Nghynghrair y Pencampwyr y tymor nesaf.

Mae'n debyg mai uchelgais Abertawe yw aros yn yr Uwchgynghrair am dymor arall, ond fe fyddai hynny'n gamp llawn cystal.

Tabl Uwchgynghrair Barclays

Gemau Gwahaniaeth Goliau Pwyntiau
1. Manchester City 10 +28 28
2. Manchester United 10 +15 23
3. Newcastle 10 +8 22
4. Chelsea 10 +8 19
-----------------------------------------------------------------------------------------
6.Lerpwl 10 +4 18
10. ABERTAWE 10 -3 12

Straeon perthnasol