Cerbyd ar gopa: Llys y Goron

Y cerbyd ar gopa'r Wyddfa ar Fedi 29

Bydd achos dyn sydd wedi ei gyhuddo o yrru cerbyd gyriant pedair olwyn i gopa'r Wyddfa ddwywaith yn mynd i Lys y Goron.

Mae Craig Williams, 39 oed o Cheltenham, yn wynebu dau gyhuddiad o yrru'n beryglus yn ei Vauxhall Frontera.

Roedd o eisoes wedi ymddangos gerbron ynadon ar gyhuddiad o yrru'n beryglus ar fynydd uchaf Cymru ar Fedi 3.

Ddydd Gwener roedd gerbron ynadon Caernarfon eto i wynebu cyhuddiad tebyg rhwng Medi 27 a 30.

Dywed yr ynadon eu bod yn credu fod yr achos yn rhy ddifrifol iddynt ddelio ag ef, a chafodd ei anfon i Lys y Goron.

Mae Mr Williams yn gwadu'r cyhuddiadau.

Dywed yr erlyniad fod y car wedi difrodi rhan o reilffordd Yr Wyddfa a llwybr troed.

Cafodd yr achos ei ohirio tan Ragfyr 2.