Abertawe 0-1 Manchester United

Javier Hernandez Image copyright Reuters
Image caption Hernandez gymrodd fantais o dim Abertawe oedd yn sigleidg ar y dechrau

Ergyd gynnar Javier Hernandez ddaeth a diwedd i rediad Abertawe o beidio colli gartref yn yr Uwchgynghrair.

Manchester United oedd yr ymwelwyr i Stadiwm Liberty ddydd Sadwrn.

Dyma o bosib un o'r gemau mwyaf i'r ddinas.

Mae'r gôl hefyd yn sicrhau bod Manchester United yn parhau gyda'r pwysau ar eu cymdogion Manchester City, sydd â phum pwynt o fantais ar y brig.

Camgymeriad gan Angel Rangel arweiniodd at y Cymro Ryan Giggs yn croesi i Hernandez wnaeth ganfod y gôl wedi 10 munud.

United wnaeth reoli gweddill yr hanner cyntaf er i Scott Sinclair wastraffu cyfle gwych i'r Elyrch wrth iddo fethu'r ergyd wedi 22 munud.

Fe wnaeth Wayne Routledge groesi'n berffaith o'r postyn pella' ond methodd Sinlcair o chwe llath cyn i United glirio.

Arbed

Roedd Giggs a Michael Carrick - y ddau yn cychwyn eu gêm gynghrair gyntaf o'r tymor - yn rheoli'r canol wrth iddyn nhw gael lle ac amser i wneud hynny.

Fe wnaeth y Cymro chwarae am 75 munud cyn cael ei eilyddio.

Image copyright AP
Image caption Dyma un o gemau mwyaf y tymor i ddinas Abertawe

Yr unig ymgais a gafwyd at gôl Abertawe cyn yr hanner oedd ergyd isel Patrick Evra ond llwyddodd gôl-geidwad Yr Elyrch, Michel Vorm, i'w harbed.

Roedd Abertawe llawer cryfach yn yr ail hanner ac fe gafwyd sawl ymgais at y gôl.

Roedden nhw'n gryf ar yr ystlys wrth i Nathan Dyer roi cyfnod anghysurus i Evra.

Cafodd Y Ffrancwr ei eilyddio yn fuan yn yr ail hanner ar ôl derbyn cerdyn melyn, yr unig chwaraewr i gael cerdyn drwy gydol y gêm.

Doedd Joe Allen ddim yn dechrau i Abertawe oherwydd anaf ond daeth ymlaen yn yr ail hanner yn lle Wayne Routledge.

Ac fe aeth yn syth i ferw'r gêm wrth iddo basio at Sinclair a gorfodi David de Gea i arbed i'r ymwelwyr.

Methodd Hernandez a dyblu'r sgôr yn ddiweddarach ac roedd rhaid i de Gea wneud sawl ergyd wrth i Abertawe bwyso.

Yn yr ail hanner daeth dau ymgais am gôl gan Wayne Rooney.

Methodd Phil Jones a rhwydo wrth i'r bêl daro'r postyn pella ac fe wyrodd ergyd Luis Nani heibio'r gôl.

Doedd hwn ddim yn berfformiad gwych gan United wrth iddyn nhw fethu unwaith eto i gydlynu tua diwedd y gêm.

Dyma oedd buddugoliaeth gyntaf Manchester United yn erbyn Abertawe.

Roedden nhw wedi colli chwech ac wedi cael dwy gêm gyfartal yn y gorffennol.

Tabl Uwchgynghrair Barclays

Gemau Gwahaniaeth Goliau Pwyntiau
1. Manchester City 12 +31 34
2. Manchester United 12 +17 29
3. Newcastle 12 +7 25
4. Chelsea 11 +9 22
-----------------------------------------------------------------------------------------
5. Tottenham 10 +6 22
6. Arsenal 12 +3 22
7. Lerpwl 11 +4 19
13. ABERTAWE 12 -4 13

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.