Corff milwr yn dychwelyd i Brydain

Image copyright Other

Image caption Roedd Richard Scanlon yn 31 oed ac yn dod o Rymni, Sir Caerffili

Mae corff milwr a fu farw tra ar ddyletswydd yn Afghanistan yn dychwelyd i Brydain.

Roedd yr Is-Gorporal Richard Scanlon yn 31 oed ac yn dod o Rymni, Sir Caerffili.

Mae disgwyl i'r awyren lanio am 12.30pm ym maes awyr yr awyrlu yn Brize Norton ddydd Iau.

Ar ôl seremoni breifat yno fe fydd yr orymdaith yn arwain i Ysbyty John Radcliff yn Rhydychen, gan basio'r Gerddi Coffa tua 3.30pm.

Bydd cyrff tri milwr arall hefyd yn cael eu hebrwng yn ôl.

'Cymeriad arbennig'

Mae teulu a ffrindiau wedi rhoi teyrngedau i'r Is-Gorporal Scanlon, oedd yn aelod o Fataliwn Cyntaf Gwarchodlu Dragwniaid Y Frenhines.

Roedd yn un o ddau filwr a fu farw ddydd Iau yr wythnos ddiwethaf yn nhalaith Helmand.

Dywedodd y Weinyddiaeth Amddiffyn bod eu cerbyd wedi cael ei daro gan ffrwydrad yn ardal Yakchai yn ardal Nahr-e-Saraj.

Mewn datganiad, dywedodd teulu Mr Scanlon ei fod yn "gymeriad arbennig".