BBC Cymru Fyw

Goleuadau Nadolig yn dychwelyd i dref

Published
image copyrightbbc
image captionMae busnesau Aberteifi wedi casglu £12,000 i dalu am y goleuadau.

Ar ôl absenoldeb y llynedd mae goleuadau Nadolig wedi dychwelyd i brif stryd Aberteifi eleni.

Roedd seremoni goleuo y tu allan i Neuadd y Dref nos Iau.

Y llynedd doedd hi ddim yn bosib gweld y goleuadau oherwydd rhesymau iechyd a diogelwch.

Doedd yr hen fachau oedd yn dal goleuadau ddim yn ddigon cryf i ddal pwysau goleuadau newydd.

£12,000

Mae busnesau Aberteifi wedi casglu £12,000 i dalu am y goleuadau.

Talodd Cyngor Ceredigion £5,500 am fachau newydd gafodd eu gosod rai wythnosau yn ôl.

Dywedodd perchnogion busnes eu bod yn falch o weld y goleuadau yn ôl, gan y byddan nhw'n denu pobl i'r siopau.

"Yn fy marn i, mae pobl Aberteifi a masnachwyr y dre yn meddwl ei bod hi'n bwysig cael goleuadau Nadolig," meddai Cadeirydd Siambr Fasnach Aberteifi, Paul Oakley.

"Maen nhw'n denu pobl i wario arian yn y dref yn ogystal â nodi dechrau Gŵyl y Nadolig."

'Tipyn o hwb'

Dywedodd Maer Aberteifi, Catrin Miles, y byddai'r goleuadau yn "rhoi tipyn o hwb" i'r dref.

Dywedodd cigydd lleol, Keith Davies: "Rwy'n hapus dros ben, yn enwedig ar ôl y llynedd pan aeth y cynllun yn draed moch."

Dywedodd Miriam James, sy'n gweithio yn siop lyfrau Awen Teifi: "Roedd hi'n sefyllfa siomedig y llynedd ond rydyn ni'n gobeithio y bydd strydoedd Aberteifi yn llawn siopwyr eleni."

Roedd siopau yn aros ar agor tan 10.30pm nos Iau, Rhagfyr 1.

Straeon perthnasol

  • Taflu goleuni ar y sefyllfa