Gemydd i gynllunio'r Goron

Bydd y Goron yn cael ei dadorchuddio yn yr Eisteddfod ym mis Awst 2012

Ddyddiau'n ôl yr oedd Anne Morgan yn gwerthu ei gwaith mewn marchnad yn yr ysgol lle mae ei phlant yn ddisgyblion.

Erbyn hyn, mae'r fam yn i ddwy'n un o grŵp dethol o artistiaid ar ôl iddi gael ei dewis i gynllunio'r Goron ar gyfer Eisteddfod Genedlaethol y flwyddyn nesaf.

Gan fod y Brifwyl yn Llandŵ, ym Mro Morgannwg, mae'n addas bod gemydd o Benarth wedi'i ddewis i lunio Coron y bardd buddugol.

Cafodd Anne, sy'n fam i Lilly chwech oed a Poppy bedair oed, ei henwi'n swyddogol fel y cynllunydd mewn seremoni yn Yr Adran Gelf, sef canolfan celfyddydau cymunedol ym Mhenarth.

Dadorchuddio

"Dwy i erioed wedi cynnig cynllun ar gyfer comisiwn mor safonol," meddai hi.

"Roeddwn i ar bigau drain. Mae'n ffantastig felly, ei fod e wedi'i ddewis.

"Eto i gyd, pan rwy'n meddwl am y rhai fu'n llunio'r Goron yn y gorffennol, mae tipyn o ofn arna' i."

Bydd y Goron werth £4,780 dan nawdd Cyngor Bro Morgannwg, yn cael ei dadorchuddio yn yr Eisteddfod ym mis Awst y flwyddyn nesaf a bydd y cynllun yn gyfrinachol tan hynny.

Wyth o artistiaid gyflwynodd gynlluniau a chafodd y rheiny eu hasesu gan banel a oedd yn cynnwys Arweinydd Cyngor Bro Morgannwg, y Cynghorydd Gordon Kemp, Swyddog Datblygu Celfyddydau'r Cyngor, Tracey Harding a Mererid Velios, sy'n aelod o bwyllgor celfyddydau gweledol yr Eisteddfod.

'Yn fendigedig'

Dywedodd y Cynghorydd Kemp oedd yn y seremoni swyddogol: "Roedd yn fendigedig gweld rhywun o'r Fro'n cael ei ddewis, yn enwedig o wybod bod y sir am groesawu'r ŵyl hon sy'n hawlio'r prif le yng nghalendr diwylliannol y Cymry."

Tasg Anne oedd creu cynllun a oedd wedi'i ysbrydoli gan amlinell glannau'r Fro, ac yr oedd hynny'n ail natur iddi am y bydd yn aml yn casglu gwrthrychau o draethau cyfagos i'w defnyddio yn ei chynlluniau.

"Y testun oedd Bro Morgannwg ac roedden nhw wedi awgrymu fy mod yn cael golwg ar amlinell y glannau a'r bryniau."

Fe fydd gwaith Anne cyn yr Eisteddfod mewn arddangosfa yn Nhŷ Tredegar, Casnewydd, rhwng Rhagfyr 2 a 4.