Cwmni bwyd yn cael gwared ar 200 o swyddi

Bar siocled Dairy Milk Image copyright AP
Image caption Fe brynodd Kraft fusnes Cadbury yn 2010

Bydd cwmni bwyd Kraft yn cael gwared ar 200 o swyddi fel rhan o broses ad-drefnu, gan gynnwys swyddi yn Y Waun, Sir Wrecsam.

Mae'n rhan o gynllun buddsoddi £50m mewn cynhyrchu siocled a bisgedi.

Cadarnhaodd y cwmni, sy'n berchen ar Cadbury, y byddai swyddi'n diflannu yn eu safleoedd yn Y Waun; yn Bournville yn Birmingham a Marlbrook yn Sir Henffordd.

Bydd y swyddi'n cael eu colli drwy adleoli a diswyddiadau gwirfoddol dros gyfnod o ddwy flynedd o fis Mawrth nesa'.

Yn ôl y cwmni, bydd casgliad newydd o fisgedi'n cael ei gynhyrchu yn eu ffatri yn Sheffield, gan greu 20 o swyddi.

Dywedodd Kraft y bydden nhw'n "buddsoddi'n sylweddol" mewn pedwar safle dros y ddwy flynedd nesa'.

Fis Mawrth y llynedd, wedi i'r cwmni brynu Cadbury, fe wnaeth Kraft gyfres o addewidion i staff, gan gynnwys addo na fydden nhw'n cau unrhyw safle pellach nac yn cyflwyno diswyddiadau gorfodol yn y DU am ddwy flynedd.

Pwysleisiodd y cwmni fod yr ymrwymiadau yna'n parhau ac nad oedd y cyhoeddiad am golli'r swyddi yn effeithio ar hynny.

'Cyflogwyr pwysig'

Dywedodd Ken Skates, yr Aelod Cynulliad Llafur dros Dde Clwyd, y byddai'n gweithio gyda'r cwmni i geisio lleihau nifer y swyddi fydd yn mynd yn y ffatri yn Y Waun, sy'n cyflogi 150 o bobl ar hyn o bryd.

"Rwy'n hynod bryderus y gallai rhai swyddi pwysig gael eu colli yn y ffatri Cadbury dros y ddwy flynedd nesa'.

"Tra bod y cyhoeddiad am fuddsoddiad newydd yn y safle yn Y Waun yn cael croeso, mae clywed am golli swyddi'n newyddion hynod o ddrwg i'r staff a'r ardal leol ar yr adeg anodd yma.

"Mae Cadbury yn gyflogwyr pwysig yn Y Waun ac fe fydda' i'n gwneud popeth posib i gefnogi'r gweithwyr lleol."

Yn ôl Nick Ramsay AC, llefarydd y Ceidwadwyr ar Fusnes, Mentergarwch, Technoleg a Gwyddoniaeth:

"Mae hyn yn newyddion ofnadwy i'r staff a'u teuluoedd, dim ond wythnosau cyn y Nadolig.

"Mae angen i Lywodraeth Cymru gynnig cefnogaeth i'r gweithwyr hyn i'w helpu i ddod o hyd i waith arall neu gyfleoedd hyfforddiant."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.