Dyfodol dwy amgueddfa yn y fantol

Amgueddfa Parc Howard Image copyright Other
Image caption Cafodd Parc Howard ei adeiladu yn 1885

Mae'n bosib y bydd dwy amgueddfa yn gorfod cau fel rhan o ymdrechion Cyngor Sir Caerfyrddin i arbed £8.5 miliwn y flwyddyn nesa.

Yn Ionawr bydd cynghorwyr yn penderfynu dyfodol amgueddfa Parc Howard, Llanelli, ac amgueddfa Sir Gaerfyrddin yn Abergwili.

Byddai cau'r ddau le yn arbed tua £150,000.

Mae'r sir wrthi'n cynnal arolwg o'i holl wasanaethau er mwyn gweld lle mae modd arbed arian.

'Cyllideb anodd'

Dywedodd Kevin Madge, is arweinydd y Cyngor, nad oedd modd diystyru'r posibilrwydd o gau'r amgueddfeydd.

"Rydym yn wynebu cyllideb anodd iawn y flwyddyn hon.

"Mae'n rhaid i ni benderfynu beth sy'n angenrheidiol, a phethau sydd ddim yn angenrheidiol," meddai.

"Wrth fynd trwy'r holl restr mae'n bosib y byddwn yn gallu achub ambell i wasanaeth, ond y bydd yn rhaid rhoi'r gorau i eraill."

Cafodd Parc Howard ei godi yn 1885 a'i rhoi fel rhodd i dre Llanelli gan Sir Stafford a'r Foneddiges Howard yn 1912.

Ar hyn o bryd mae'n gartre i gasgliad o grochenwaith Llanelli, celfyddyd a dogfennau hanes.

Mae Amgueddfa Sir Gaerfyrddin yn cynnwys bwyelli o'r Oes Gerrig, esgyrn mamoth ac aur Rhufeinig. Mae'r adeilad yn dyddio nôl i 1290.

Pe bai'r ddau le yn cau byddai chwech o bobl yn colli eu gwaith.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.