Cerddwr wedi marw ar fynydd

Cyhoeddwyd
ffynhonnell y llun, (C) British Broadcasting Corporation
disgrifiad o’r llunCludodd hofrennydd Sea King o'r Fali dimau achub

Mae cerddwr yn ei dridegau wedi marw oherwydd anafiadau i'w ben ar ôl cwympo 500 o droedfeddi ar Fynydd y Garn uwchben Dyffryn Ogwen yn Eryri.

Fe gafodd timau achub eu galw ychydig wedi 2pm brynhawn Sadwrn.

Roedd hofrennydd Sea King o Ganolfan yr Awyrlu yn y Fali wedi cludo Tîm Achub Dyffryn Ogwen ac un yr Awyrlu i fan lle gallai lanio 2,000 o droedfeddi i fyny'r mynydd.

Dywedodd Chris Lloyd o Dîm Achub Dyffryn Ogwen: "Mi oedd y dyn wedi cyfarfod dwy fyfyrwraig ac wedi trafod y ffordd ora i lawr.

"Ond mi gerddodd y tri ar hyd darn o eira gan feddwl mai tir cadarn oedd o.

'Sgubo'

"Mi gafodd cwymp eira ei achosi ac mi gafodd y dyn a myfyrwraig eu sgubo i lawr."

Ni chafodd y fyfyrwraig ei hanafu, meddai.

"Mae hyn yn anffodus iawn ond mae'n hawdd gwneud y camgymeriad - meddwl bod darn o eira'n gadarn.

"A deud y gwir, mae'n drychinebus yr adeg hon o'r flwyddyn.

"Rhywle ni fydd anrhegion yn cael eu hagor o dan y goeden Nadolig."

Arweinydd mynydd roddodd wybod i'r gwasanaethau brys, meddai.

"Mi abseiliodd i lawr a mynd â'r ferch i dir diogel ond pan aeth o'n ôl i'r dyn mi oedd o wedi marw."