Norofirws yn taro pum ward yng Nghasnewydd

Ysbyty Brenhinol Gwent Image copyright bbc
Image caption Cafodd wardiau yn Ysbyty Brenhinol Gwent eu heffeithio

Mae pum ward mewn dau ysbyty yng Nghasnewydd wedi dioddef oherwydd firws gaeafol Norofirws dros y penwythnos.

Dywed Bwrdd Iechyd Aneurin Bevan bod wardiau yn Ysbyty Brenhinol Gwent ac Ysbyty Sant Gwynllwg wedi cael eu heffeithio gan yr haint.

Daeth cais i ymwelwyr beidio mynd ar y wardiau os ydynt wedi gweld symptomau dros y 48 awr blaenorol neu wedi dod i gysylltiad agos gyda rhai sydd wedi cael symptomau.

Mae Norofirws yn heintus dros ben ac yn achosi cyfog, chwydu a'r dolur rhydd.

Mae'r symptomau yn dechrau rhwng 12 a 48 awr wedi i'r person gael eu heintio, ac yn para am rhwng 12 a 60 awr.

Ysbyty Brenhinol Gwent yw ysbyty cyffredinol rhanbarthol yr ardal gyda thua 775 o welyau, ac mae'n delio gyda chleifion allanol, cleifion dydd a chleifion mewnol.

Ysbyty cymunedol a iechyd meddwl yw Sant Gwynllwg gyda phum ward meddygaeth gymunedol a thair ward iechyd meddwl.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.