Rhanbarthau rygbi'n cyfyngu ar gyflogau

Gethin Jenkins ac Adam Jones Image copyright Huw Evans picture agency
Image caption Gallai Gethin Jenkins ac Adam Jones symud i Ffrainc

Mae pedwar rhanbarth rygbi Cymru yn cyhoeddi cyfyngiad ar gyflogau chwaraewyr yng nghanol pryderon y bydd chwaraewyr yn gadael i chwarae yn Ffrainc.

Mae Rhanbarthau Rygbi Cymru, sy'n cynrychioli'r pedwar rhanbarth, wedi ymgynghori gydag Undeb Rygbi Cymru am y newid.

Mae'r ddau brop Gethin Jenkins ac Adam Jones ymhlith y rhai sydd wedi cael eu cysylltu gyda symudiad i Ffrainc i ddilyn James Hook, Lee Byrne, Mike Phillips a Luke Charteris.

Fe fydd cyfyngiad o £3.5 miliwn y tymor.

Mae Undeb Rygbi Cymru wedi creosawu'r cyhoeddiad.

Arian ychwanegol

Mae ffigyrau amlwg gyda'r rhanbarthau unigol - Y Gleision, Y Dreigiau, Y Gweilch a'r Scarlets - wedi mynegi barn ar y mater.

Maen nhw wedi galw am arian ychwanegol gan Undeb Rygbi Cymru er mwyn perswadio'r chwaraewyr gorau i beidio symud i glybiau yn Ffrainc, Lloegr neu wledydd eraill.

Mae sibrydion fod Aled Brew, asgellwr y Dreigiau, yn darged i glwb Perpignan, ac mae'r Scarlets yn poeni y bydd eu sêr ifanc Rhys Priestland, George North, Jonathan Davies a Scott Williams yn cael eu denu gan glybiau tramor.

Mae hyfforddwr Cymru, Warren Gatland, wedi rhybuddio chwaraewyr y gallai eu gobeithion rhyngwladol ddioddef os fyddan nhw'n chwarae i glybiau y tu allan i Gymru.

Fe wnaeth annog unrhyw chwaraewyr sy'n symud i sicrhau bod eu cytundebau yn caniatáu iddyn nhw gyflawni eu holl ddyletswyddau chwarae a hyfforddi gyda Chymru.

Bythefnos cyn Pencampwriaeth y Chwe Gwlad, bydd Cymru'n teithio i Wlad Pwyl am wersyll hyfforddi, ac mae Gatland wedi dweud y gallai chwaraewyr sydd ddim ar gael i fynd yno gael eu diystyru ar gyfer y gystadleuaeth.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.