Apêl wedi cyrch ar archfarchnad ar ddiwrnod Nadolig

Cyhoeddwyd
ffynhonnell y llun, Other
disgrifiad o’r llunFe wnaeth yr heddlu ryddhau'r lluniau teledu cylch cyfyng yma o un o'r ddau berson y maen nhw'n chwilio amdano

Mae'r heddlu yn gofyn am gymorth y cyhoedd i ganfod dau berson wnaeth falurio ffenest archfarchnad ar ddiwrnod Nadolig.

Fe wnaeth y ddau fygwth staff diogelwch siop Tesco Llansamlet ger Abertawe gyda bar metel hefyd.

Ymosodwyd ar y siop gyda chlogfaen tua 7.20pm ar ôl cyrraedd yno ar feiciau.

Cafodd un o'r ddau eu dal gan staff diogelwch a wnaeth ei ryddhau ar ôl cael ei fygwth gan yr ail berson.

Cafodd un ei weld yn ceisio agor y silffoedd sigarets oedd wedi ei gloi.

Wnaeth yr un o'r ddau lwyddo i ddwyn dim byd.

Cafodd un dyn ei ddisgrifio fel rhywun o faint canolog a thua 6 troedfedd o daldra ac roedd yn gwisgo helmed beic modur melyn a glas.

Roedd ganddo dop beic modur du a glas a throwsus a bŵts du.

Roedd y dyn arall o faint bach a thua 5 troedfedd 10 modfedd o daldra ac yn gwisgo helmed beic modur du.

Roedd ganddo got dri chwarter glas, trowsus du ac esgidiau rhedeg gwyn.

"Dwi'n apelio ar unrhyw un a oedd allan ddiwrnod Nadolig ac a welodd y ddau neu sydd ag unrhyw wybodaeth berthnasol i gysylltu gyda ni," meddai'r Ditectif dros dro Trudi Meyrick, o Orsaf Treforys.

Os oes gan unrhyw un wybodaeth fe ddylen nhw gysylltu gyda Heddlu De Cymru ar 101 neu Taclo'r Tacle ar 0800 555 111.

Dolenni perthnasol ar y we

Dyw'r BBC ddim yn gyfrifol am gynnwys gwefannau allanol