Heddlu'n ymchwilio i ladd ci

Eira Thomas a Bella Image copyright Other
Image caption Y perchennog: 'Mi daflodd un o'r cŵn Bella i'r awyr'

Mae Heddlu'r Gogledd yn apelio am dystion ar ôl i gi farw wedi i bump Rottweiler ymosod yn Ninas Dinlle, ger Caernarfon.

Dywedodd yr heddlu fod yr ymosodiad pan oedd y perchennog yn mynd â'i chi Cocker Spaniel am dro.

Mae'r perchennog, Eira Thomas, 22 oed, wedi dweud bod perchnogion y cŵn wedi gadael mewn fan Transit goch.

Fe gafodd hi driniaeth oherwydd brathiadau a chleisiau ond bu'n rhaid i'w chi Bella gael ei roi i gysgu.

Roedd yr ymosodiad tua 1.30pm ddydd Sul.

'Lladd'

Dywedodd yr heddlu y dylai tystion ffonio 101.

"Mi gyrhaeddodd y cŵn bron heb i fi sylweddoli," meddai Ms Thomas. "Mi daflodd un o'r cŵn Bella i'r awyr.

"Doedden nhw ddim yn cyfarth ond eu bwriad oedd lladd."

Dywedodd hi fod y cŵn i gyd yn edrych arni hi. "Doeddwn i erioed wedi teimlo cymaint o ofn.

"Yna cyrhaeddodd dyn a dweud: 'Mae'n ddrwg gennyf, wnes i ddim sylwi arnoch chi.'

"Fo oedd piau'r cŵn. Roeddwn yn meddwl y dylwn i aros er mwyn cael ei enw, ond unwiath i mi weld yr holl waed mi oeddwn yn gwybod bod rhaid mynd i'r milfeddyg.

"'Sa un neu ddau gi, mi fyddai'r sefyllfa o bosib wedi bod yn wahanol. Ond gyda phac o gŵn roedd yn amhosib amddiffyn Bella."

"Doedd y cŵn ddim o dan reolaeth."