Cyn esgob wedi marw

Image copyright Other

Image caption Bu farw Ivor Rees yn ei gartref ddydd Mercher.

Mae cyn Esgob Tyddewi, Ivor Rees, wedi marw yn ei gartref yn Hwlffordd.

Hunodd Mr Rees ddydd Mercher yn 85 oed yn dilyn salwch.

Cafodd ei eni yn Llanelli a bu'n aelod o'r Llynges Frenhinol yn ystod yr Ail Ryfel Byd.

Bu'n Ddeon Eglwys Gadeiriol Bangor pan oedd y canwr Aled Jones yn aelod o'r côr.

Rheithor

Bydd angladd Mr Rees yn breifat ac fe gynhelir gwasanaeth coffa ar ddyddiad sydd heb ei bennu.

Cafodd ei ordeinio ym 1953 a dechreuodd ei yrfa fel curad yn Sir Benfro.

Ymysg ei blwyfi roedd Abergwaun, Llangathen, Slebets ac Uzmaston, ger Hwlffordd cyn iddo wasanaethu yng ngogledd Cymru.

Bu'n ficer yn Llangollen a rheithor yn Eglwys Gadeiriol Llanelwy cyn iddo gael ei benodi'n Ddeon Eglwys Gadeiriol Bangor.

Dychwelodd i Sir Benfro pan gafodd ei benodi'n Esgob Cynorthwyol Tyddewi.

Cafodd ei benodi'n Esgob Tyddewi ym 1991 a phenderfynodd ymddeol bedair blynedd yn ddiweddarach.