BBC Cymru Fyw

Organ anghywir: Rheithfarn naratif

Published
image copyright(C) British Broadcasting Corporation
image captionRoedd Amy Francis yn wraig weddw 77 oed
Fe gafodd rheithfarn naratif ei chofnodi yn achos gwraig weddw 77 oed o Gasnewydd fu farw wedi i lawfeddyg geisio tynnu'r organ anghywir o'i chorff.
Fe glywodd y cwest yng Nghasnewydd fod llawfeddyg wedi ceisio tynnu afu Amy Francis yn lle ei haren yn Ysbyty Brenhinol Gwent.
Bu farw ar ôl cael trawiad ar y galon a cholli gormod o waed yn ystod y llawdriniaeth ar Orffennaf 21,2010.
Y llawfeddyg oedd Dr Adam Carter. Clywodd y cwest fod dau uwchlawfeddyg wedi eu galw ond nid oedd eu hymdrechion yn llwyddiannus.
Dywedodd Crwner Gwent, David Bowen: "Yn ystod y llawdriniaeth, yn anfwriadol ac ar gam, fe gafodd iau Mrs Francis ei rwygo a'i niweidio'n fawr a'r canlyniad oedd ei marwolaeth."
Dywedodd mab y claf, Alan Francis, 52 oed: "Rydyn ni'n derbyn y penderfyniad ac yn derbyn bod Mr Carter a'i dîm wedi ceisio achub ei bywyd hi.

'Gonestrwydd'

"Hefyd rydyn ni'n gwerthfawrogi ei onestrwydd ac yn dymuno pob llwyddiant iddo yn y dyfodol.
"Roedd hwn yn gamgymeriad onest."
Dywedodd llefarydd ar ran Bwrdd Iechyd Aneurin Bevan eu bod yn derbyn yn llawn benderfyniad y Crwner.
"Mae hwn yn achos trasig iawn ac mae ein meddyliau â theulu a chyfeillion Mrs Francis."
Mae ymchwiliad mewnol wedi ei gynnal ynglŷn â'r hyn ddigwyddodd cyn ac ar ôl y llawdrinaieth.
"Rydym wedi rhannu'r wybodaeth gafodd ei chasglu yn Brydeinig ac wedi cysylltu â llawfeddygon eraill sy'n tynnu arennau.
"Fe wnaeth y tîm meddygol bob ymdrech i geisio achub bywyd Mrs Francis."