Archesgob i gysegru canolfan addysg crefyddol newydd

Eglwys San Silyn, Wrecsam
Image caption Bydd y ganolfan newydd tu fewn i eglwys Sant Silyn

Bydd canolfan addysg newydd yn cael ei chysegru Archesgob Cymru, Dr Barry Morgan, mewn gwasanaeth arbennig yn Wrecsam ddydd Sadwrn.

Mae'r ganolfan ar gyfer Addysg Crefyddol a Datblygu Ffydd wedi ei lleoli yn eglwys y plwyf, Sant Silyn.

Nod y ganolfan £500,000 yw hybu addysg grefyddol mewn ysgolion.

Bydd hefyd yn cynorthwyo yng ngwaith yr eglwys gyda phobl ifanc.

'Ysbrydoli'

Dywedodd Dr Morgan: "Mae dysgu am wahanol grefyddau a beth y gall pobl ifanc weld fod cymryd crefydd o ddifrif yn ogystal â gweld bywyd o safbwyntiau eraill yn bwysicach nag erioed heddiw.

"Yr her i'r ganolfan newydd yma fydd i ddarparu deunyddiau o ansawdd uchel fydd yn ennyn diddordeb ac yn ysbrydoli plant a phobl ifanc.

"Rwyf yn falch iawn i'w gysegru ac yn dymuno bob llwyddiant iddi."

Mae ysgolion eisoes yn ymweld â'r ganolfan ac mae'r tîm addysg wedi datblygu 21 gweithdy i addysgu pobl ifainc.

Gavin Craigen yw cyfarwyddwr gweithredol y ganolfan.

"Ein nod yw gweld Addysg Crefyddol yn cael ei ddysgu'n fwy effeithiol i blant a phobl ifainc - nid yn unig yn Wrecsam ond ledled Gymru." meddai.

Mae'r prosiect wedi ei sefydlu mewn cysylltiad gyda Chanolfan y Santes Fair yn Abergwyngregyn, Sefydliad Addysg Blwyfol Wrecsam ac Eglwys Sant Silyn.

Bydd y gwasanaeth cysegru yn cael ei gynnal am 3pm ar ddydd Sadwrn, Ionawr 14.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.