Gleision yn ennill ond Scarlets yn colli

Ashley Beck yn sgorio cais yn erbyn Treviso

London Irish 15-22 Gleision

Roedd y fuddugoliaeth i'r Gleision yn un galed brynhawn Sadwrn, ond yn un sy'n cadw'u gobeithion o gyrraedd rowndiau terfynol Cwpan Heineken yn fyw.

Brwydr gicio oedd yr hanner cyntaf. Dwy gic gosb Leigh Halfpenny gadwodd yr ymwelwyr yn y gêm wrth i Adrian Jarvis gicio tair.

Ond yn fuan wedyn daeth unig gais y gêm gyda neb llai na chapten Cymru, Sam Warburton, yn croesi.

Ychwanegodd Halfpenny'r trosiad i agor bwlch dros y gwrthwynebwyr.

Ond fe ddaeth y tîm cartref yn ôl o fewn pwynt diolch i gic Delon Armitage ac roedd rhaid dibynnu ar Halfpenny eto am y pwyntiau.

Daeth tair cic gosb arall iddo i fynd â'r Gleision yn ol i frig eu grŵp.

Scarlets 17-29 Northampton

Pylu mae gobeithion y Scarlets o gyrraedd rowndiau terfynol Cwpan Heineken eleni.

Collodd tîm Nigel Davies i Northampton ar Barc y Scarlets er iddyn nhw fod ar y blaen yn gynnar.

Sgoriodd Rhys Priestland bedair gwaith gyda chiciau cosb, ac fe greodd gais i Viliame Iongi.

Ond yn fuan wedi'r egwyl, croesodd Soane Tonga'uiha i'r ymwelwyr, ac fe giciodd Stephen Myler Northampton ar y blaen o bum pwynt.

Er i'r Scarlets bwyso, fe gafodd pas lac ei ryng-gipio ac fe sgoriodd Ben Foden gais hwyr o goroni'r fuddugoliaeth.

Gweilch 44-17 Treviso

Nos Wener, fe wnaeth y Gweilch guro Treviso a chipio pwynt bonws yn Stadiwm Liberty nos Wener.

Er mai prin yw'r gobeithion o gyrraedd y rownd nesa - mae'r canlyniad yn golygu nad yw'r cyfan drosodd eto.

Daeth cais cynnar i Tommy Bowe ar ôl iddo ryng-gipio pas Eoardo Gori ar y llinell hanner.

Roedd yna ddau gais i'r canolwr ifanc Ashley Beck.

Gymaint oedd goruchafiaeth y Gweilch fe welwyd yr ymwelwyr yn ildio dau gais cosb.

Daeth cais arall i Kahn Fotuali'i ar ôl bylchiad Matthew Morgan.