Chwilio am geidwaid i'r camlesi

Traphont ddŵr Poncysyllte Image copyright Other
Image caption Mae'r ymddiriedolaeth yn chwilio am wirfoddolwyr

Mae ymddiriedolaeth yn chwilio am wirfoddolwyr i gadw llygad ar lociau camlesi Cymru.

Mae yna dros 116 cilometr (72 o filltiroedd) o gamlesi yng Nghymru ac mae angen gwirfoddolwyr i roi cymorth i'r miloedd o ymwelwyr sy'n eu defnyddio bob blwyddyn.

Cafodd arbrawf llwyddiannus ei gynnal drwy ddefnyddio gwirfoddolwyr ar hyd camlas Swydd Amwythig.

Dywed yr ymddiriedolaeth mai'r cam nesa yw dod o hyd i geidwaid ar gyfer loc byd-enwog pont ddŵr Pontcysyllte ar gamlas Llangollen ac ar gyfer lociau Llangynidr, camlas Sir Fynwy a Brycheiniog.

"Camlas Sir Fynwy a Brycheiniog yw'r un mwyaf prydferth ym Mhrydain, ac felly mae o'n un poblogaidd iawn," meddai Nick Worthington, o Ddyfrffyrdd Prydain.

Bydd Dyfrffyrdd Prydain yn trosglwyddo cyfrifoldeb am y camlesydd i ymddiriedolaeth Glandŵr Cymru yn Ebrill eleni.

"Bydd y gwirfoddolwyr hefyd yn helpu gyda'r gwaith pwysig o ddiogelu'r dŵr yn y gamlas, yn enwedig mewn cyfnod o haf poeth pan mae'r dŵr yn gallu mynd yn isel iawn."

Dywedodd y gall pobl wirfoddoli am hanner diwrnod neu fwy bob wythnos, heb yr angen am brofiad o waith ar y camlesydd.

"Mae'r ymddiriedolaeth newydd yn bwriadu gweithio'n llawer agosach gyda'r cymunedau lleol," meddai Mr Worthington.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.