Cwmni am fynd i ddwylo'r gweinyddwyr

Pencadlys Peacocks yng Nghaerdydd Image copyright BBC news grab
Image caption Mae'r cwmni yn cyflogi 400 o staff yng Nghaerdydd

Mae cwmni dillad Peacocks wedi dweud eu bod am fynd i ddwylo'r gweinyddwyr.

Dywedodd y cwmni fod trafodaethau'n parhau â buddsoddwyr posib wrth geisio ailstwythuro benthyciadau o tua £240 miliwn.

"Ers tro," meddai llefarydd, "mae'r bwrdd a'i ymgynghorwyr wedi trafod ailstrwythuro â'r benthycwyr.

"Yn anffodus, mae'r trafodaethau wedi dod i ben heb gytuno."

Gan nad oedd gweinyddwyr wedi eu hapwyntio, meddai, doedd y rheolwyr ddim wedi newid.

Mae'r cwmni'n cyflogi mwy na 400 yn ei bencadlys yng Nghaerdydd ac mae Kevin Brennan, AS Gorllewin Caerdydd, wedi galw ar Lywodraeth San Steffan i ymyrryd.

'Ergyd fawr'

"Gallai hon fod yn ergyd fawr i bobol Caerdydd a de Cymru," meddai, "a byddai'n niweidio economi Cymru'n fawr iawn.

"Dwi'n galw ar Lywodraeth y Deyrnas Gyfunol i wneud popeth posib, nid yn unig i annog mwy o drafodaethau rhwng y cwmni a'u banciau a'u benthycwyr ond hefyd helpu'r cwmni i ddiogellu swyddi."

Eisoes mae ymgynghorwyr annibynnol KPMG wedi adolygu llyfrau'r cwmni â 550 o siopau ym Mhrydain.

Yng Nghaerdydd mae pencadlys Peacocks ers 72 o flynyddoedd ond yn Sir Gaer y ffurfiodd Albert Peacock y cwmni yn 1884.

Cyhoeddodd y cwmni fod 17% yn fwy o werthiant dros y Nadolig.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.