Abertawe 1-1 Chelsea

Image copyright Other

Siom funud olaf i Abertawe

Abertawe 1-1 Chelsea

Wedi buddugoliaeth yn erbyn Arsenal yn eu gêm ddiwethaf yn Stadiwm Liberty, roedd yr Elyrch yn llawn hyder wrth groesawu Chelsea yno nos Fawrth.

Roedd Chelsea yn ffodus o beidio mynd ar ei hôl hi yn gynnar, gyda thacl hwyr Ivanovic yn atal Danny Graham rhag sgorio.

Ivanovic ddaeth i'r fei i glirio ergyd Gulfi Sigurdsson oddi ar y llinell, cyn i Petr Cech yn y gôl arbed cynnig Joe Allen.

Fe ddilynodd cyfnod o bwyso gan yr ymwelwyr gyda Mata, Luiz a Romeu yn methu cyfleoedd, ond yna fe ddaeth ymosodiad llewyrchus i Abertawe.

O gic rydd Sigurdsson, daeth y bêl at Scott Sinclair, ac fe sgoriodd yntau ei seithfed gôl y tymor hwn a hynny yn erbyn ei gyn glwb.

Ymateb

Roedd disgwyl ymateb gan yr ymwelwyr ac fe ddaeth hynny wedi'r egwyl.

Daeth cyfres o gyfleoedd wrth i Chelsea bwyso, ond fe ddaeth yr eilydd Michael Essien yn agos gyda chynnig aeth fodfeddi dros y trawst.

Gwellodd pethau i Abertawe wrth i Ashley Cole weld y cerdyn coch gyda phedwar munud o'r gêm yn weddill am ail drosedd wael.

Ond aeth torcalon i'r Elyrch yn eiliadau olaf yr amser ychwanegwyd am anafiadau.

Wrth i Neil Taylor geisio clirio'r bêl yn ei gwrt cosbi ei hun, llwyddodd i'w gosod yn ei rwyd ei hun.

Bydd ffyddloniaid y Liberty yn falch o'r un pwynt, ond yn mynd adref yn credu y dylen nhw fod wedi cael tri.

Tabl yr Uwchgynghrair

Gemau Gwahaniaeth Goliau Pwyntiau
1. Man City 23 +41 54
2. Man United 23 +35 54
3. Tottenham 23 +19 49
4. Chelsea 23 +15 42
-----------------------------------------------------------------------------------------
14. ABERTAWE 23 -4 27

Chwefror 2, 2012.